11 اقپاندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ جاڭا مۋزەيىندە قازاقستان رەسپۋبليكاسىنىڭ ەڭبەك سىڭىرگەن قايراتكەرى, بەلگىلى كەسكىندەمەشى كامىل موللاشەۆتىڭ شىعارمالار كاتالوگىنىڭ تۇساۋكەسەرى جانە جەكە كورمەسىنىڭ اشىلۋ سالتاناتى ءوتتى.
«بۇگىن ەلىمىزدىڭ بەلگىلى قىلقالام شەبەرى كاميل موللاشەۆتىڭ جەكە كورمەسىنە كەلگەندەرىڭىزگە العىسىمدى بىلدىرەمىن. قازاق بەينەلەۋ ونەرىندە كامىل اعامىزدىڭ ورنى بولەك. ونىڭ شىعارماشىلىعىن ەلىمىزدە عانا ەمەس, شەتەلدە دە جاقسى تانيدى ءارى باعالايدى. ويتكەنى كامىل موللاشەۆ وزىندىك قولتاڭباسى بار ءىرى سۋرەتشىلەردىڭ ءبىرى. ونىڭ ونەرى مەن تۋىندىلارى تاڭعاجايىپ ەستەتيكالىق عانا ەمەس, تەرەڭ فيلوسوفيالىق مازمۇن تۇرعىسىنان دا ەرەكشە», دەپ اتاپ ءوتتى كورمەنى اشقان ەلباسى كىتاپحاناسىنىڭ ديرەكتورى باقىتجان تەمىربولات.
مادەنيەت جانە سپورت ءمينيسترى اقتوتى رايىمقۇلوۆانىڭ قۇتتىقتاۋ حاتىن ۆيتسە-مينيستر نۇرقيسا داۋەشوۆ وقىپ بەردى:
«قۇرمەتتى كامىل ءۋاليحان ۇلى! ءسىزدى نۇر-سۇلتان قالاسىندا «كامىل موللاشەۆتىڭ ونەر الەمى» اتتى جەكە كورمەڭىزدىڭ اشىلۋىمەن شىن جۇرەكتەن قۇتتىقتايمىن! قازاقستان رەسپۋبليكاسىنىڭ مادەنيەت جانە سپورت مينيسترلىگى سىزگە ەلىمىزدىڭ مادەنيەتىنە, سونىڭ ىشىندە كوركەمسۋرەت ونەرىنە قالتقىسىز قىزمەت ەتكەنىڭىز ءۇشىن شىن جۇرەكتەن العىسىن بىلدىرەدى», دەدى ول.
كەش بارىسىندا اۆتوگراف-سەسسيا دا جاسالدى. ك.ۋ. موللاشەۆتىڭ كاتالوگى قازاقستان رەسپۋبليكاسى مادەنيەت جانە سپورت مينيسترلىگى مەن «استانا» حالىقارالىق ۋنيۆەرسيتەتىنىڭ قولداۋىمەن باسىلىمعا شىققان.
«كامىل ءۋاليحان ۇلى, ءبىزدىڭ ۋنيۆەرسيتەتتە ءۇش جىلعا جۋىق جۇمىس ىستەپ, ونىڭ پروفەسسورى رەتىندە ءبىزدىڭ جۇمىسىمىزعا شىعارماشىلىقتىڭ ەرەكشە لەبىن اكەلگەنىن ايتقىم كەلەدى. ونىڭ جاسامپازدىقتى جالعاستىرىپ, ءبىزدىڭ وقۋ ورنىندا جاس تالانتتاردى وقىتاتىنى ءبىز ءۇشىن ۇلكەن قۇرمەت. بۇل كورمە مەن ونىڭ كاتولوگىنىڭ جارىققا شىعۋى اۆتوردىڭ شىعارماشىلىق كەزەڭدەگى وزىندىك ەسەبىندەي. كامىل ءۋاليحان ۇلى, ءسىزدىڭ ەڭ كەرەمەت كارتينالارىڭىز جانە ەڭ ۇزدىك وقۋشىلارىڭىز ءالى الدا ەكەنىنە سەنىمدىمىن, دەدى «استانا» حالىقارالىق ۋنيۆەرسيتەتىنىڭ پرەزيدەنتى سەرىك يرساليەۆ.
ءىس-شاراعا اۆستريا, بەلارۋس, نيدەرلاند, گەرمانيا, رەسەي, جاپونيا, ءۇندىستان, چەحيا, قىرعىزستان, كۋۆەيت, سولتۇستىك ماكەدونيا, تاتارستان ەلشىلەرى مەن باسقا دا ديپلوماتيالىق كورپۋستىڭ وكىلدەرى, گالەرەيالار, مۋزەيلەر مەن مادەني ورتالىقتاردىڭ باسشىلارى, كورنەكتى سۋرەتشىلەر, ونەرتانۋشىلار جانە ونەر قايراتكەرلەرى قاتىستى.
«كامىل موللاشەۆ – ەرەكشە كوزقاراسى بار ادام, ناعىز كەسكىندەمە شەبەرى. ول وتە نازىك سالادى, سونىمەن بىرگە انىق ءارى شىنايى. ونىڭ بارلىق شىعارمالارىندا ونىڭ جان-دۇنيەسى سەزىلەدى. مەنىڭ ويىمشا, بۇل شەبەردىڭ كارتينالارىن كورگەندەردىڭ ءبارى ونىڭ شىعارماشىلىعىنان ءلاززات الىپ, تالانتىنا ءتانتى بولادى», دەپ اتاپ ءوتتى نيدەرلاند كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى اندرە كارستەنس.
كورمەدە سۋرەتشىنىڭ 1974-2017 جىلدار ارالىعىندا جارىق كورگەن 30-عا جۋىق جۇمىسى ۇسىنىلدى. جانر, ستيل تۇرعىسىنان سانالۋان تۋىندىلار شەبەردىڭ دارىنىن ايشىقتاپ, «كامىل موللاشەۆتىڭ ونەر الەمىن» اشتى.
كورمە 2021 جىلدىڭ 27 اقپانىنا دەيىن جالعاسادى