قر دەنساۋلىق ساقتاۋ مينيسترلىگى قاراعاندى فارماتسەۆتيكالىق كەشەنى بازاسىندا وندىرىلەتىن «سپۋتنيك V» ۆاكتسيناسىنىڭ العاشقى دوزاسى شامامەن قاي ۋاقىتتا شىعاتىندىعىن جاريا ەتتى.
«قاراعاندى فارماتسەۆتيكالىق كەشەنى بازاسىندا وندىرىلەتىن «سپۋتنيك V» ۆاكتسيناسى شامامەن وسى جىلدىڭ اقپان ايىنىڭ سوڭىندا قولجەتىمدى بولادى. العاشقى جەتكىزىلىمنىڭ بولجامدى كولەمى 90 مىڭ دوزانى قۇرايدى. سودان كەيىن وسى جىلدىڭ شىلدە ايىنا دەيىن 2 ملن دوزا وندىرىلەدى. قاراعاندى فارماتسەۆتيكالىق كەشەنى بازاسىندا شىعارىلاتىن «سپۋتنيك V» ۆاكتسيناسىنىڭ كوممەرتسيالىق توپتاماسىن شىعارۋ 2021 جىلدىڭ 25 اقپانىندا 90 مىڭ دوزا مولشەرىندە بولادى دەپ كۇتىلەدى», دەلىنگەن اتالعان مينيسترلىكتىڭ تاراتقان اقپاراتىندا.
ەستەرىڭىزگە سالا كەتسەك, كەشە ورتالىق كوممۋنيكاتسيالار قىزمەتىندەگى ءباسپاسوز ءماسليحاتى بارىسىندا قر دەنساۋلىق ساقتاۋ ءمينيسترى الەكسەي تسويعا قازاقستاندا شىعارىلاتىن «سپۋتنيك V» ۆاكتسيناسىنا قاتىستى ساۋال قويىلىپ, ول جاۋابىن جازباشا بەرۋگە ۋادە ەتكەن ەدى.