پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا سالىقتىق جانە كەدەندىك اكىمشىلەندىرۋ ماسەلەلەرى قارالدى, دەپ حابارلايدى Egemen.kz.
«بيزنەستى قولداۋ ءۇشىن وتكەن جىلى قازاقستاندا 700 مىڭنان استام زاڭدى تۇلعالار مەن جەكە كاسىپكەرلەردى قامتي وتىرىپ, سالىقتىق ىنتالاندىرۋدىڭ اۋقىمدى شارالارى ىسكە اسىرىلدى», — دەدى ا. مامين.
قازىرگى كەزدە ميكرو جانە شاعىن بيزنەس سۋبەكتىلەرىن تەكسەرۋگە 3 جىلدىق موراتوري جالعاسىپ جاتىر (2023 جىلعى 1 قاڭتارعا دەيىن) جانە ارنايى سالىق رەجيمدەرىن قولداناتىن شوب سۋبەكتىلەرى تابىس سالىعىنان بوساتىلدى. بۇل شارالار كاسىپكەرلەرگە 3 جىل ىشىندە ءوز بيزنەسىن كەڭەيتىپ, دامىتۋعا شامامەن 400 ملرد تەڭگە جۇمساۋعا مۇمكىندىك بەرەدى.
مەملەكەت باسشىسىنىڭ تاپسىرماسى بويىنشا بيىلعى 1 قاڭتاردان باستاپ ەرىكتى تۇردە قولدانىلاتىن بولشەك سالىقتىڭ جاڭا ارنايى سالىق رەجيمى ەنگىزىلدى. سالىق مولشەرلەمەسى الىنعان كىرىستىڭ 3% كولەمىندە بەلگىلەنگەن. ۇكىمەت وسى رەجيمدى قولدانۋ ءۇشىن قىزمەت تۇرلەرىنىڭ تىزبەسىن انىقتادى. تىزبەدە پاندەميا كەزەڭىندە كارانتيندىك شەكتەۋ شارالارى قولدانىلعان قىزمەت تۇرلەرى قاراستىرىلعان. رەجيم شوب سۋبەكتىلەرىنە سالىق جۇكتەمەسىن ازايتۋدى قامتاماسىز ەتۋ جانە بيۋدجەتكە تولەمدەر مەن سالىق تولەۋ ءتارتىبىن وڭتايلاندىرۋ ءۇشىن داعدارىسقا قارسى شارا رەتىندە 2 جىلعا ەسەپتەلگەن.
جەكە تۇلعالاردىڭ سالىق مىندەتتەمەلەرىن ورىنداۋىن جەڭىلدەتۋ ءۇشىن بيىلعى جىلدان باستاپ م ۇلىك پەن جەرگە سالىناتىن سالىقتار بىرىڭعاي تولەمگە بىرىكتىرىلىپ, كوپپاتەرلى تۇرعىن ۇيلەردىڭ مەنشىك يەلەرى ءۇشىن جەر سالىعى الىنىپ تاستالدى.
ۇكىمەت باسشىسى قارجى مينيسترلىگىنە تسيفرلىق دامۋ مينيسترلىگىمەن بىرلەسىپ, سالىقتىق اكىمشىلەندىرۋدىڭ اقپاراتتىق جۇيەلەرىن جاڭعىرتۋ جانە ولاردى باسقا مەملەكەتتىك ورگاندارمەن زاماناۋي ادىستەردى, سونىڭ ىشىندە بلوكچەين مەن ۇلكەن دەرەكتەردى قولدانا وتىرىپ ينتەگراتسيالاۋ جونىندە پارمەندى شارالار قابىلداۋدى تاپسىردى.
«سالىق تولەۋشىلەر مەن بيزنەسكە ىڭعايلى بولۋ ءۇشىن ازىرلەنگەن “ە-Salyq Azamat” (سالىق ءاميانى) جانە “E-Salyq Business” تەگىن ءموبيلدى قوسىمشالارىن بەلسەندى تۇردە ىلگەرىلەتۋ كەرەك. مەملەكەت باسشىسىنىڭ تاپسىرماسى اياسىندا قارجى مينيسترلىگىنە جەكە كاسىپكەرلەر ءۇشىن ونلاين-بكم مەن POS-تەرمينالداردى پايدالانۋ كەزىندە ەسەپتىلىكتى اۆتوماتتى تۇردە تولتىرۋ ماسەلەسىن ساپالى تۇردە پىسىقتاۋ قاجەت», — دەدى ا. مامين.
پرەمەر-مينيستر مەملەكەت باسشىسىنىڭ تاپسىرماسىن ورىنداۋ اياسىندا وسى جىلدىڭ ناۋرىز ايىنىڭ سوڭىنا دەيىن شەكاراداعى زاڭسىز ساۋدا اينالىمىنا قارسى ءىس-قيمىلدىڭ كەشەندى جوسپارىنا ۇسىنىستار دايىنداۋ قاجەتتىگىن اتاپ ءوتتى.
بيىل رەفورمالار جونىندەگى جوعارى كەڭەستىڭ وتىرىسىندا (بيىلعى 29 قاڭتاردا) قارالعان شوب قولداۋ جونىندەگى قوسىمشا شارالاردى ىسكە اسىرۋ ماقساتىندا پرەمەر-مينيستر بيىلعى 1 ناۋرىزعا دەيىن سالىق زاڭناماسىنا قاجەتتى تۇزەتۋلەر دايىنداۋدى تاپسىردى.
«ۇسىنىلىپ وتىرعان وزگەرىستەر 500 مىڭعا جۋىق جالدامالى قىزمەتكەردى رەسمي جۇمىسقا تارتۋعا, ەڭبەكاقى تولەۋ قورىنا جۇكتەمەنى ازايتۋعا, سالىق مىندەتتەمەلەرىن ورىنداۋ ءتارتىبىن جەڭىلدەتۋگە جانە رەسپۋبليكا ەكونوميكاسىنا جاڭا ينۆەستيتسيالار تارتۋعا مۇمكىندىك بەرەدى», — دەدى ا. مامين.