«شاعالا» جاڭا بارلاۋ ۇشقىشسىز اۆياتسيا كەشەنىنىڭ سىناق ۇشۋلارى ورىندالدى. بۇل ۇشقىشسىز ۇشۋ اپپاراتىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ اسكەري عالىمدارى جاساعان, دەپ حابارلايدى Egemen.kz.
قازىرگى زامانعى اسكەري قاقتىعىستاردا ۇشقىشسىز ۇشۋ اپپاراتتارىن قولدانۋى, وسىنداي قۇرىلعىلار جاساۋ قاجەتتىگىن دالەلدەدى. ۇلتتىق قورعانىس ۋنيۆەرسيتەتىندە قارسىلاستىڭ بروندى تەحنيكاسى مەن كۇشىنە قارسى ءتيىمدى قارۋ رەتىندە تەك بارلاۋ دروندارىن عانا ەمەس, سونىمەن قاتار سوققى بەرۋشى ۇشقىشسىز ۇشۋ اپپاراتىن قولدانۋعا دا تالداۋ جاسادى.
«شاعالا» بارلاۋشى ۇشقىشسىز ۇشۋ اپپاراتىنىڭ تاجىريبەدەگى نۇسقاسى باعدارلامالىق-اپپاراتتىق بايلانىس ارناسىمەن, بايلانىس ارناسى قورعالعان جەكە كريپتوگرافيالىق حاتتامامەن جابدىقتالعان.
– ۇشقىشسىز ۇشۋ اپپاراتى اۋقىمىندا اسكەرلەردى وتاندىق ازىرلەمەلەرمەن قامتاماسىز ەتۋگە دەگەن ۇمتىلىس قۋانتادى. دەگەنمەن, بۇل وسىنداي شەتەلدىك قۇرىلعىلارمەن بىردەي بولماۋى كەرەك. وتاندىق اپپاراتتاردىڭ تاكتيكالىق-تەحنيكالىق سيپاتتامالارىن ازىرلەۋ كەزىندە قازاقستاندىق ارميانىڭ بارلىق قاجەتتىلىكتەرىن, ءبىزدىڭ قورعانىس ماقساتىنداعى گەوگرافيالىق ەرەكشەلىكتەردى ەسكەرۋ قاجەت, - دەپ اتاپ ءوتتى قر قورعانىس ءمينيسترىنىڭ ورىنباسارى گەنەرال-لەيتەنانت تيمۋر داندىباەۆ.
زەرتتەۋگە ارنالعان ۇلگىنى پوليگوندا سىناقتان وتكىزۋ كەزىندە اسكەري عالىمدار تومەن تەمپەراتۋراعا ءتوزىمدى قۋات كوزىنىڭ جاڭا ءونىمىن سىناقتان وتكىزدى. ەرەكشە اككۋمۋلياتور باتارەيالارى – ۇلتتىق قورعانىس ۋنيۆەرسيتەتى ماماندارىنىڭ ويلاپ تاپقاندارى.
قورعانىس ءمينيسترىنىڭ ورىنباسارى قازاقستاندىق ۇشقىشسىز ۇشۋ اپپاراتتارىنىڭ ءوندىرىسى قازاقستاندا جاسالمايتىن توراپتار مەن اگرەگاتتاردىڭ يمپورتىن بارىنشا ازايتا وتىرىپ, وتاندىق قورعانىس ونەركاسىبىنىڭ مۇمكىندىكتەرىن تەرەڭ ينتەگراتسيالاۋدى كوزدەيتىنىنە نازار اۋداردى.
«شاعالا» ۇشقىشسىز ۇشۋ اپپاراتىن شىعارۋ ءۇشىن وتاندىق قورعانىس-ونەركاسىپ كەشەنىنىڭ مۇمكىندىكتەرىن ەسكەرە وتىرىپ, قىزمەت كورسەتۋ, تەحنيكتەر مەن وپەراتورلاردى وقىتۋ باعدارلامالارى, سونداي-اق قارۋلى كۇشتەردىڭ وقۋ ورىندارى مەن بولىمدەرىندە ونى ەنگىزۋ ءۇشىن ۇشقىشسىز ۇشۋ اپپاراتى وپەراتورلارىنىڭ جاۋىنگەرلىك دايارلىق كۋرسى ازىرلەندى.
اسكەري عىلىمي-زەرتتەۋ ورتالىعىنىڭ باستىعى پولكوۆنيك قۋاندىق اقشولاقوۆتىڭ ايتۋىنشا «شاعالا» ۇشقىشسىز ۇشۋ اپپاراتى, وسىعان ۇقساس شەتەلدىك اپپاراتتاردىڭ تەحنيكالىق سيپاتتامالارىنان كەم تۇسپەيدى, كەرىسىنشە وزىندىك ارتىقشىلىقتارعا يە.
- ۇشقىشسىز ۇشۋ اپپاراتىنىڭ ۇشۋ قاشىقتىعى 30 شاقىرىمعا دەيىنگى ارالىقتى قۇرايدى. اۋادا ول ەكى جارىم ساعاتقا دەيىن بولادى, جەلدىڭ ەكپىنى سەكۋندىنا 14 مەترگە دەيىن كۇشەيگەن كەزدە, اۋادا ءوزىن تۇراقتى ۇستايدى. بولاشاقتا ءبىز ونى ۆزۆودتان باتالونعا دەيىنگى بۋىنداعى اسكەرلەردىڭ قارۋ-جاراق قاتارىنا قوسۋدى جوسپارلاپ وتىرمىز, - دەدى اسكەري عىلىمي-زەرتتەۋ ورتالىعىنىڭ باستىعى پولكوۆنيك قۋاندىق اقشولاقوۆ
سىناق رەتىندەگى ۇشۋلار باعدارلاماسىندا «شاعالا» ۇشقىشسىز ۇشۋ اپپاراتىن دايىنداۋدىڭ ءارتۇرلى كەزەڭدەرى مەن جۇمىس رەجيمدەرى ۇسىنىلدى.
عىلىمي جۇمىستىڭ ناتيجەلەرى پاتەنتتەلگەن جانە دە تاجىريبە اياقتالعاننان كەيىن بارلىق اتقارىلعان جۇمىستار قازاقستاننىڭ قورعانىس-ونەركاسىبى كەشەنىنە بەرىلەتىن بولادى.