تۇركىستان وبلىسىنىڭ پوليتسەيلەرى ەسىرتكى تاسىمالداۋشىلاردان 10 كەلىگە جۋىق ماريحۋانا تاركىلەدى, دەپ حابارلايدى Egemen.kz Polisia.kz سايتىنا سىلتەمە جاساپ.
تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسى بىرلەسكەن وپەراتسيا بارىسىندا ءىرى كولەمدە ەسىرتكى قۇرالدارىن زاڭسىز تاسىمالداۋ جانە وتكىزۋ جايتىنىڭ جولىن كەستى.
انىقتالعانداي, كۇدىكتىلەر ەسىرتكىنى جامبىل وبلىسىنان كەنتاۋ قالاسىنا تاسىمالداماق بولعان. جەدەل-ىزدەستىرۋ ءىس-شارالارى بارىسىندا تۇركىستان وبلىسى پد ەققىقب قىزمەتكەرلەرى مەن كەنتاۋ قپب پوليتسەيلەرى بىرلەسىپ, اۆتوۆوكزالداردىڭ بىرىنەن ەكى كۇدىكتى ادامدى ۇستادى, ولار بۇرىن سوتتى بولعان جامبىل وبلىسىنىڭ جانە كەنتاۋ قالاسىنىڭ تۇرعىندارى. ولاردىڭ بىرەۋىنىڭ سومكەسىن ءتىنتۋ كەزىندە جەدەل ۋاكىلدەر قۇرامىندا وسىمدىك تەكتەس ەسىرتكى بار پاكەتتى تاۋىپ الىپ, تاركىلەدى. ساراپتاما قورىتىندىسىنا سايكەس الىنعان ەسىرتكى تەكتەس زات 10 كگ-عا جۋىق «كەپتىرىلگەن ماريحۋانا» ەكەنى انىقتالدى.
قازىرگى ۋاقىتتا اتالعان جايتقا قاتىستى قر قك-ءنىڭ 296-بابى (ەسىرتكى, پسيحوتروپتىق زاتتارمەن, ولاردىڭ انالوگتارىمەن وتكىزۋ ماقساتىنسىز زاڭسىز جۇمىس ىستەۋ) بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتىلەر قاماۋعا الىندى. تەرگەۋ وقيعانىڭ بارلىق ءمان-جايى مەن ەسىرتكى قۇرالدارىنىڭ جەتكىزۋ ارنالارىن انىقتايتىن بولادى.
ءوز كەزەگىندە تۇركىستان وبلىسىنىڭ پوليتسەيلەرى ازاماتتارعا ەسىرتكىنىڭ زاڭسىز اينالىمىنا بايلانىستى قىلمىس جاساعانى ءۇشىن زاڭدا جاۋاپكەرشىلىك قاراستىرىلعانىن ەسكەرتەدى. ەگەر سىزدە ەسىرتكىنى زاڭسىز ساقتاۋ نەمەسە ساتۋ جايتتارى تۋرالى اقپارات بولسا, تەز ارادا “102” ءنومىرى ارقىلى پوليتسياعا حابارلاسىڭىز.