ەلباسى ورنىقتى دامۋ ءۇشىن ءوزارا جاھاندىق ىقپالداستىق فورۋمىنىڭ قاتىسۋشىلارىنا ۇندەۋ جولدادى

ەلباسى ن. نازارباەۆتىڭ جولداۋىن قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى وقىپ بەردى.

قازاقستاننىڭ تۇڭعىش پرەزيدەنتى ءوزىنىڭ جولداۋىندا COVID-19 ىندەتىنىڭ بۇكىل الەمگە جىلدام تارالۋى, ونىڭ بۇرىن-سوڭدى بولماعان قايعىلى سالدارى مەن الەمدىك ەكونوميكاعا جويقىن اسەرى ءبىزدىڭ ەلدەرىمىزدىڭ قانشالىقتى ءوزارا تاۋەلدى ەكەنىن جانە پلانەتامىزدىڭ قانشالىقتى نازىك ەكەنىن ايقىن كورسەتكەنىن اتاپ ءوتتى.

وسىعان بايلانىستى ول بۇل جاھاندىق قاۋىپ-قاتەردى بۇكىل حالىقارالىق قوعامداستىقتىڭ كۇش-جىگەرىن ءار ءتۇرلى قىزمەت سالالارىندا بىرىكتىرۋ ارقىلى عانا جەڭۋگە بولاتىنىن باسا ايتتى. «وسىنداي بىرلەسكەن ءتاسىلدى قاجەت ەتەتىن باسىم شارالاردىڭ ءبىرى - COVID-19-عا قارسى ۆاكتسينانى تەڭ جانە ءادىل تاراتۋ», - دەدى ەلباسى.

نۇرسۇلتان نازارباەۆ اعىمداعى ونجىلدىق «بۇۇ-عا مۇشە بارلىق ەلدەر ءۇشىن ورتاق جاھاندىق كومپاس» بولىپ تابىلاتىن 2030 جىلعا دەيىنگى ورنىقتى دامۋ ماقساتتارىن (ودم) جۇزەگە اسىرۋ ءۇشىن وتە ماڭىزدى ەكەنىن ەسكە سالدى. الايدا, وسى ماقساتتارعا جەتۋ ءۇشىن مەملەكەتتەرگە قوسىمشا 700 ميلليارد اقش دوللارىنان استام قاراجات قاجەت بولادى. قاجەتتى رەسۋرستاردى تابۋ ءۇشىن ەلباسى قازاقستاننىڭ بارلىق ەلدەردىڭ اسكەري شىعىندارىن 1% ازايتۋ جانە ولاردىڭ دامۋ ماقساتتارىنا باعىتتاۋ تۋرالى باستاماسىنا قايتا ورالۋدى ۇسىندى. «مەن بۇل يدەيانى 1992 جىلدان بەرى بۇۇ مىنبەرىنەن بىرنەشە رەت كوتەردىم جانە بۇگىنگى كۇنى بۇل ەرەكشە وزەكتى بولىپ تابىلادى», - دەدى ول.

قازاقستاننىڭ تۇڭعىش پرەزيدەنتى سونىمەن قاتار 2021 جىلعى ءىس-شارانىڭ تاقىرىبى «قاۋىپسىزدىك ءۇشىن بەيبىتشىلىك, وركەندەۋ جانە سەرىكتەستىك» قازاقستاننىڭ ستراتەگيالىق ۇستانىمدارىنا تولىق سايكەس كەلەتىنىن اتاپ ءوتتى. بەلسەندى, بەيبىت ءارى جاۋاپتى سىرتقى ساياسات ارقىلى قازاقستان جاھاندىق انتيادرولىق قوزعالىسقا كوشباسشىلىق ەتۋ, قاقتىعىستاردى شەشۋ جانە ءبىزدىڭ ايماقتا جانە ودان تىس وڭىرلەردە دامۋعا كومەك كورسەتۋ ارقىلى حالىقارالىق قاۋىپسىزدىك پەن تۇراقتىلىققا ىقپال ەتۋدە. ەلباسىنىڭ باستاماسىمەن ازياداعى ءوزارا ءىس-قيمىل جانە سەنىم شارالارى جونىندەگى كەڭەس جانە الەمدىك جانە ءداستۇرلى دىندەر كوشباسشىلارىنىڭ سەزى ىسكە قوسىلدى.

مەملەكەتىمىزدىڭ ورنىقتى دامۋ سالاسىنداعى ىلگەرىلەۋىنە توقتالا وتىرىپ, نۇرسۇلتان نازارباەۆ قازاقستان الەۋمەتتىك-ەكونوميكالىق دامۋدىڭ كوپتەگەن كورسەتكىشتەرى بويىنشا ايتارلىقتاي تابىستارعا قول جەتكىزگەنىن جانە 2050 جىلعا قاراي الەمدەگى ەڭ دامىعان 30 ەلدىڭ قاتارىنا كىرۋ ماقساتىنا بىرتىندەپ ىلگەرىلەپ جاتقانىن اتاپ ءوتتى. ەلباسى حالىقتىڭ ءال-اۋقاتى مەن ءومىر ءسۇرۋ ساپاسىن جاقسارتۋدىڭ الداعى جوسپارلارى تۋرالى, ونىڭ ىشىندە دەنساۋلىق ساقتاۋ مەن بىلىمگە ينۆەستيتسيالاردى الداعى 5 جىلدا ءجىو-ءنىڭ 10% -نا دەيىن ۇلعايتۋ جانە ەكونوميكانى ءارتاراپتاندىرۋ تۋرالى باياندادى.

سونىمەن قاتار ءىس-شاراعا باستى سپيكەرلەر رەتىندە كولۋمبيا پرەزيدەنتى يۆان دۋكە ماركەس, بۇۇ باس حاتشىسىنىڭ ءبىرىنشى ورىنباسارى امينا موحاممەد جانە دۇنيەجۇزىلىك بانكتىڭ 12-پرەزيدەنتى دجيم يون كيم قاتىستى.