«قازاقستان رەسپۋبليكاسىنداعى ۇكىمەتتىك ەمەس ۇيىمدارعا ارنالعان مەملەكەتتىك الەۋمەتتىك تاپسىرىس, گرانتتار جانە سىيلىقاقىلار تۋرالى» زاڭعا وزگەرىستەر مەن تولىقتىرۋلار ەنگىزۋدى تالقىلاۋ بويىنشا جۇمىس توبىنىڭ ءبىرىنشى وتىرىسى ءوتتى, دەپ حابارلايدى Egemen.kz.
جۇمىس توبىنىڭ قۇرامىنا ازاماتتىق قوعام سالاسىنداعى ساراپشىلار, ۇەۇ, حالىقارالىق ۇيىمداردىڭ باسشىلارى جانە مەملەكەتتىك ورگانداردىڭ وكىلدەرى كىرەدى.
اقپارات جانە قوعامدىق دامۋ مينيسترلىگى گرانتتىق مەحانيزمنىڭ ترانسپارەنتتىلىگىن ارتتىرۋ, مەجەلەنگەن گرانتتار جۇيەسىن ەنگىزۋ جانە تيىمدىلىكتى باعالاۋ بولىگىندە زاڭنامانى جەتىلدىرۋ بويىنشا نەگىزگى تاسىلدەردى تانىستىردى.
ءبىرىنشى وتىرىستا گرانتتىق جوبالاردى قالىپتاستىرۋ مەحانيزمىنىڭ ماسەلەلەرى تالقىلاندى.
زاڭ جوباسىن ازىرلەۋشىلەر ۇەۇ-دان, ازاماتتار مەن ساراپشىلاردان ۇسىنىستار جيناۋ, قاجەتتىلىكتەردى تالداۋ جانە الەۋمەتتىك زەرتتەۋلەردىڭ ناتيجەلەرى نەگىزىندە پروبلەمالاردى سارالاۋ ارقىلى گرانتتاردى «تومەننەن جوعارىعا قاراي» قاعيداتى بويىنشا قالىپتاستىرۋدى قامتاماسىز ەتۋدى ۇسىنادى.
سونداي-اق ازاماتتىق باستامالاردى قولداۋ ورتالىعىنىڭ (ابقو) سايتىندا گرانتتار باعىتتارىن جاريا تالقىلاۋ جانە ۋاكىلەتتى ورگان جانىنداعى ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىنىڭ, وسىعان ۇقساس وڭىرلىك ۇەۇ كەڭەستەرى مەن قوعامدىق كەڭەستەردىڭ وتىرىستارىندا تالقىلاۋ ۇسىنىلدى.
تالقىلاۋ بارىسىندا قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازيەۆا گرانتتىق قارجىلاندىرۋ مەحانيزمدەرىن جەڭىلدەتۋ جانە ازاماتتىق باستامالارعا باسىمدىق بەرۋ قاجەتتىگىن اتاپ ءوتتى. ونىڭ ايتۋىنشا, گرانتتىق جوبالاردىڭ باستى مىندەتى –جۇمىستىڭ ناتيجەسى مەن ساپالى ورىندالۋى.
ءوز كەزەگىندە «ورتالىق ازيانىڭ ەۋرازيا قورى» كورپوراتيۆتىك قورىنىڭ اتقارۋشى ديرەكتورى ريناد تەمىربەكوۆ تاپسىرىس بەرۋشى تەك تاقىرىپ پەن ماقساتتى ايقىنداپ, پروبلەمالاردى شەشۋ تەتىكتەرىن ۇەۇ ۇسىنعان كەزدە گرانتتارعا دەگەن كوزقاراستى وزگەرتۋ قاجەت ەكەندىگىنە باسا نازار اۋداردى. سونداي-اق ر.تەمىربەكوۆ ابقو ۇەۇ مەن ازاماتتاردىڭ ۇسىنىستارىن زەردەلەۋ بويىنشا ادىستەمەلىك جانە تالداۋ جۇمىستارىن جۇرگىزەتىن ۇەۇ ءۇشىن رەسۋرستىق ورتالىق ءرولىن اتقارۋى ءتيىس ەكەنىن اتاپ ءوتتى.
قاراعاندى وبلىسىنىڭ ازاماتتىق اليانسىنىڭ باسشىسى گۇلنار قۇربانباەۆا گرانتتىق جوبالاردى جوسپارلاۋ بويىنشا ناقتى ۇسىنىستار ەنگىزدى.
تالقىلاۋ بارىسىندا قوعام وكىلدەرىنەن كوپتەگەن ۇسىنىستار مەن پىكىرلەر ءتۇستى.