اقتوبە قالالىق ىشكى ىستەر دەپارتامەنتىنىڭ باستىعى, پودپولكوۆنيك قايرات مىرزابەكوۆكە قىزمەت بولمەسىندە قاراماعىندا ىستەيتىن پوليتسەي قىزدى ۇردى دەگەن ايىپ تاڭىلىپ جاتىر. بۇل تۋرالى «دياپوزون» گازەتى جازدى.
باسىلىم بەتىندە جازىلعانداي, ينتسيدەنت 24 قاراشا كۇنى ورىن العان. وسى وقيعاعا بايلانىستى ءبىراز جاراقتات العان 30 جاستاعى پوليتسەي قىزدىڭ اۋرۋحاناعا تۇسكەندىگى تۋرالى اقپار جەرگىلىكتى جەرگە لەزدە تاراپ كەتتى. ارتىنان وبلىستىق ىشكى سىتەر دەپارتامەنتىنە ءوزىنىڭ باستىعىنىڭ ۇستىنەن ارىز جازعانى ءمالىم بولدى. پوليتسيا باسىندا بۇل وقيعاعا بايلانىستى بۇقارالىق اقپارات قۇرالدارى وكىلدەرىنە تۇسىنىكتەمە بەرۋدەن باس تارتىپتى. جەلتوقساننىڭ 6-سى كۇنى عانا شاعىن حابار ايتىلدى.
«فاكتى بويىنشا قىلمىستىق ءىس قوزعالدى. تەرگەۋمەن ىشكى قاۋىپسىزدىك باسقارماسى اينالىسىپ جاتىر. قىلمىستىق ءىستىڭ بۇگە-شىگەسى تەرگەۋ مۇددەسىنە بايلانىستى قۇپيا ۇستالادى», – دەدى پوليتسياداعىلار.
رەسمي ەمەس دەرەك كوزدەرى قالانىڭ باس پوليتسەيىن قاماۋ جونىندە سوت سانكتسياعا قول قويعانىن العا تارتادى. ال قالالىق ىشكى ىستەر باسقارماسىنىڭ كەزەكشى ءبولىمى باستىقتىڭ ەمدەلىپ جاتقانىن مالىمدەگەن.
بۇل ارالىقتا سوققى العان قىزدىڭ جانساقتاۋ بولىمىنە ءتۇسىپ قالعانى, ونىڭ ەسىگىن ەكى پوليتسەيدىڭ كۇزەتىپ وتىرعانى تۋرالى دا قاۋەسەت تارادى. الايدا, اۋرۋحانا دارىگەرلەرى وسى ايتىلعاندى جوققا شىعاردى. ولار قىزدىڭ ءبىر كۇننەن كەيىن-اق اۋرۋحانادان شىعىپ كەتكەنىن جەتكىزىپتى.
قايرات مىرزابەكوۆ اقتوبە قالاسى ىشكى ىستەر باسقارماسىنا پولكوۆنيك ەسەن ەسماحانوۆ زەينەتكە كەتكەننەن كەيىن, بىلتىرعى جىلدىڭ قازان ايىندا باستىق بولىپ كەلگەن. بۇعان دەيىن حرومتاۋ اۋداندىق ىشكى ىستەر ءبولىمىن باسقارعان ەكەن.
باقىتبەك كەنەش ۇلى.
دەرەككوز: «دياپوزون» گازەتى.