جاس ۇرپاقتىڭ قيالىن ۇشتاپ, ءوز قولدارىمەن جاڭا نارسە جاساپ شىعارۋعا قۇلشىنۋى قۋانتادى. اقتاۋداعى نازارباەۆ زياتكەرلىك مەكتەبىنىڭ 10 «ا» سىنىپ وقۋشىسى ديانا قۋانباي جىلىجاي مەن كوگال سۋارۋعا ارنالعان ماشينا جاساپ شىعاردى.
ديانا بۇل جوبامەن 2019 جىلى اينالىسىپ باستاعان. ازىرگە جوبا روبوت ماكەت كۇيىندە دايىن تۇر.
– جۇمىس ىستەۋ پروتسەسى وڭايلاتىلعان. روبوت الدىمەن توپىراقتىڭ ىلعالدىلىعىن ولشەپ, وسىعان سايكەس سۋ مولشەرىن انىقتاپ, جەردى سۋارادى. ازىرگە ءبىلىم وردامىزداعى جىلىجايدا سىناپ ءجۇرمىز جانە روبوتتى جەتىلدىرۋ ۇستىندەمىز. وسى جوبامەن وبلىستىق عىلىمي بايقاۋلار جوباسىندا جۇلدەلى ورىننان كورىندىك, ەندى رەسپۋبليكا دەڭگەيىندەگى سايىستا قورعايمىن, – دەيدى ونەرتاپقىش.
ديانا قازىردە بىرەگەي جوباسىمەن ناۋرىز ايىندا وتەتىن رەسپۋبليكالىق بايقاۋعا دايىندالۋدا. روبوتقا قاۋىپسىزدىك GPS ساۋىتىن ورناتۋ جوسپارلانىپ وتىر.
16 جاستاعى ديانا قۋانباي بولاشاقتا IT سالاسىندا جوعارى ءبىلىم الۋ ءۇشىن ەۋروپاداعى بەدەلدى ۋنيۆەرسيتەتكە ءتۇسۋدى ويلايدى. وتباسىنداعى 4 بالانىڭ ۇلكەنى مەكتەپتى ابىرويلى ءتامامداپ, تۋعان ولكەنىڭ دامۋىنا ءوز ۇلەسىن قوسقىسى كەلەدى.
ماڭعىستاۋ وبلىسى