ەلىمىزدە ەپيدەميالىق احۋال كۇردەلەنىپ بارادى. كۇن سايىن بەيداۋا دەرتكە شالدىققانداردىڭ قاتارى كوبەيىپ جاتىر. قاڭتاردىڭ 24-ءى كۇنگى دەرەك بويىنشا ءبىر تاۋلىكتە پتر ارقىلى 1584 ادامنىڭ كوروناۆيرۋس جۇقتىرعانى انىقتالدى. ولاردىڭ باسىم بولىگى – قاۋپى جوعارى «قىزىل ايماقتا» تۇرعان وڭىرلەردەن. قازىر 7 ءوڭىر «قىزارىپ» تۇر, 3 ءوڭىر – «سارى ايماقتا», قالعانى – «جاسىل ايماق».
«قىزىل ايماقتا» نۇر-سۇلتان قالاسى, اقمولا, اتىراۋ, باتىس قازاقستان, قوستاناي, پاۆلودار, سولتۇستىك قازاقستان وبلىستارى تۇر. ەپيدەميالىق احۋال دابىل قاعارلىق جاعدايعا جەتكەن بۇل وڭىرلەردە قاۋىپسىزدىك شارالارى بارىنشا كۇشەيتىلىپ جاتىر. وڭىرلەردىڭ باس مەملەكەتتىك سانيتارلىق دارىگەرىنىڭ جاڭا قاۋلىلارى شىعىپ, تالاپ-ءتارتىپ قاتاڭداتىلدى.
پاۆلودار وبلىسىندا ءوڭىردىڭ باس سانيتارلىق دارىگەرىنىڭ جاڭا قاۋلىسىنا سايكەس قالاارالىق جانە اۋدانارالىق باعىتتا جولاۋشىلاردى تاسىمالداۋ توقتاتىلادى. پاۆلودار وبلىسى سانيتارلىق-ەپيدەميولوگيالىق باقىلاۋ دەپارتامەنتىنىڭ وكىلى عيزات ابەشەۆتىڭ ايتۋىنشا, اقسۋ – پاۆلودار باعىتىن قوسپاعاندا, وبلىس ىشىندەگى قالاارالىق جانە اۋدانارالىق اۆتوبۋس, شاعىن اۆتوبۋس جولاۋشىلار تاسىمالى توقتاتىلادى. قوعامدىق تاماقتانۋ ورىندارى تاپسىرىستى جەتكىزۋ نەمەسە وزىمەن بىرگە الىپ كەتۋ رەجىمىنە اۋىستىرىلادى. ساۋدا ورىندارى, تاكسيلەر مەن قوعامدىق كولىكتەردە سانيتارلىق دەزينفەكتسيا كۇشەيتىلەدى. حالىققا قىزمەت كورسەتۋ ورتالىقتارى ساعات 9.00-دەن 18.00-گە دەيىن الدىن الا جازىلۋ ارقىلى قىزمەت كورسەتەدى جانە سەنبى, جەكسەنبى, مەرەكە كۇندەرى جۇمىس كەستەسىنە تىيىم سالىنادى.
اقمولا وبلىسىندا دا ءوڭىردىڭ باس مەملەكەتتىك سانيتارلىق دارىگەرىنىڭ جاڭا قاۋلىسى شىعىپ, سوعان سايكەس حقو-لاردىڭ, سونىڭ ىشىندە مامانداندىرىلعان حقو, 1414 call-ورتالىعى جانە ۆيرتۋالدى اسسيستەنتتەردىڭ جۇمىسى رەتتەلەدى. ەندى جۇمىس كۇندەرى ولار 09.00-دەن 18.00-گە دەيىن جۇمىس ىستەيدى, ال سەنبى جانە جەكسەنبى كۇندەرى جۇمىسىن توقتاتادى. بۇل رەتتە ازاماتتاردى قابىلداۋ ەلەكتروندى ۇكىمەت پورتالى نەمەسە call-ورتالىق ارقىلى كەزەكتى الدىن الا برونداۋ ارقىلى جۇزەگە اسىرىلادى.
ىندەتتىڭ قايتا ءورشىپ, كەڭ تارالۋىنا ساقتىق شارالارىنا سالعىرت قاراپ, تالاپ, ءتارتىپتى جەتە ەسكەرمەۋ سەبەپ بولىپ جاتىر. باس پروكۋراتۋرا قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءباسپاسوز قىزمەتى حابارلاعانداي, كارانتيندىك شەكتەۋلەر ەنگىزۋ جانە سانيتارلىق تالاپتاردى قاتاڭداتۋ كەزەڭىندە ەلدىڭ دەنساۋلىق ساقتاۋ جۇيەسىنىڭ قىزمەتكەرلەرى انىقتاعان قۇقىق بۇزۋشىلىقتار سانى ارتتى. جالپى 3,6 ملرد تەڭگە سوماسىنا ايىپپۇل سالۋ تۋرالى قاۋلى شىعارىلدى, ونىڭ ىشىندە قۇقىق بۇزۋشىلار 3 ملرد تەڭگە تولەدى.
وسىنداي ايىپپۇلداردىڭ كوپشىلىگى تۇركىستان وبلىسىندا (5 014), الماتى قالاسىندا (4 775) جانە شىعىس قازاقستان وبلىسىندا (1 831) سالىنعان. ولاردىڭ ەڭ از سانى ماڭعىستاۋ (204), پاۆلودار (523) جانە جامبىل (590) وبلىستارىندا تىركەلگەن. ماسكا تاعۋ رەجىمىن بۇزعانى ءۇشىن 15 613 جەكە تۇلعا اكىمشىلىك جاۋاپكەرشىلىككە تارتىلدى. بۇل تۇرعىدا الماتى قالاسى (4 434), تۇركىستان (4 009) جانە شىعىس قازاقستان (1 126) وبلىستارى كوش باستاپ تۇر.