اكادەميك الكەي مارعۇلاننىڭ شاكىرتى امانقۇل مۇساتاي ۇلى بالقاش قالالىق تاريحي-ولكەتانۋ مۋزەيىنىڭ قورىنا اتاقتى عالىمنان قالعان ءبىرتالاي زاتتى ءوز قولىمەن تاپسىرعان ەكەن. سونىڭ ىشىندەگى قۇندى جادىگەردىڭ ءبىرى – قاسيەتتى دومبىرا.
مۋزەيدىڭ باس قور ساقتاۋشىسى اسىل يحاشوۆانىڭ ايتۋىنشا, بۇل دومبىرانى اكادەميككە ك.تۋلەكەەۆ دەگەن ازامات قوتاڭبا جازىپ, سىيعا تارتقان كورىنەدى. وكىنىشكە قاراي, بۇل ادامنىڭ كىم ەكەنى تۋرالى دەرەك ەش جەردە ساقتالماعان. ال مۋزىكالىق اسپاپتى اقتوعايدىڭ تۋماسى, ولكەتانۋشى, سۋرەتشى امانقۇل مۇساتاي ۇلى مۋزەيگە 2002 جىلى تاپسىرىپتى. بۇل كىسى اكادەميك الكەي مارعۇلاننىڭ ءوزى ۇيىمداستىرىپ, ءوزى باسقارعان ورتالىق قازاقستان ەكسپەديتسياسىنىڭ ارقا جەرىندەگى قۇرمەتتى مۇشەسى بولعان. ءومىرىنىڭ سوڭعى جىلدارى بالقاش قالاسىندا تۇرىپتى.
بالقاش مۇراجايىندا دومبىرادان باسقا, الكەي مارعۇلاننىڭ فوتوسۋرەتتەرى, جەكە انىقتاما قاعازدارى, امانقۇل مۇساتاي ۇلىنا جازعان حاتى, كوزىلدىرىگى جانە ساقال قىرعىشى دا ساقتالعان.
قاراعاندى وبلىسى,
بالقاش قالاسى