بىلتىرعى قاڭتار-جەلتوقسان ارالىعىندا ەلىمىزدە جەڭىل ونەركاسىپ ءوندىرىسىنىڭ كولەمى 15%-عا ءوسىپ, 128,7 ملرد تەڭگەگە جەتتى. ءوسىم اتالعان باعىتتىڭ بارلىق سالاسىندا, اتاپ ايتقاندا توقىما بۇيىمدارى وندىرىسىندە 4,5%-عا, كيىم وندىرىسىندە 5,5%- عا, سونداي-اق بىلعارى جانە ودان دايىندالاتىن ونىمدەر وندىرىسىندە 131,1%- عا جەتتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى حابارلادى.
ۆەدومستۆونىڭ دەرەگىنە سۇيەنسەك, بىلتىر 1,606 ملرد تەڭگەگە 6 ينۆەستيتسيالىق جوبا ىسكە قوسىلىپ, 1 145 جۇمىس ورنى قۇرىلدى. ونىڭ ىشىندە Turkistan Textile جشس تىگىن بۇيىمدارىنىڭ ءوندىرىسى, «بال دەكور» جشس كىلەم بۇيىمدارىنىڭ ءوندىرىسى, DALSAN (دالسان) جشس ىلعالدى مايلىقتار ءوندىرىسى, سپ «LUX SHOES جشس ۇلتان ءوندىرىسى, سونداي-اق FIBC Kazakhstan جشس ءپىشۋ تسەحى جانە «كۋبلەي» جشس تەرى وڭدەۋ تسەحى سىندى جوبالار قامتىلعان.
2020 جىلى حالىقتى بەتپەردەمەن قامتاماسىز ەتۋ ءۇشىن وندىرىسكە 70-تەن استام تىگىن كاسىپورنى تارتىلدى. ايتالىق, Dalatex جشس (قىزىلوردا), «بولشەۆيچكا» جشس (قوستاناي), «ەكو-فارم» جشس (شىمكەنت), «اس فارم» جشس (شىعىس قازاقستان), «تىنىس» اق (كوكشەتاۋ), «كازلەگپروم» جشس (الماتى), جانە «جانارىس» جشس (ماڭعىستاۋ) سەكىلدى جەڭىل ءوندىرىس ورىندارى سەلدىر ماتادان جانە بوزدەن كۇنىنە 700 مىڭ بەتپەردە ازىرلەۋدى جولعا قويدى.
تىگىن كاسىپورىندارىن شيكىزاتپەن قامتاماسىز ەتۋ ماقساتىندا Azala Textile جشس تاۋلىگىنە 10 مىڭ مەتر سەلدىر ماتا شىعاراتىن 9 ستانوكتى ىسكە قوستى. وندىرىستىك كەزەڭ مەملەكەتارالىق تالاپتارعا ساي اتقارىلىپ, سونداي-اق كاسىپورىن تىعىزدىعى تومەن اعارتىلعان ماقتا ماتاسىن ء(بوز, ميتكال) شىعاراتىنىن ايتا كەتۋ كەرەك.
بىلتىر اقپاندا قازاقستاندا ماقتا-توقىما كلاستەرىن قۇرۋ جونىندەگى جول كارتاسى بەكىتىلگەن ەدى. سوعان سايكەس, «اليانس» تپك جانە Azala Textile جشس توقىما كاسىپورىندارىن «وڭتۇستىك» ەەا سۋبايماقتارىنا قوسۋعا بايلانىستى جۇمىس جالعاسىپ جاتىر. وسىعان دەيىن 2019 جىلى جەڭىل ونەركاسىپتىڭ سالالىق باعىتتارى «استانا جاڭا قالا» ەەا قىزمەتىنىڭ باسىم تۇرلەرىنىڭ تىزبەسىنە ەنگىزىلگەن بولاتىن. بۇعان قوسا ەەو الاڭىندا جەڭىل ونەركاسىپ كاسىپورىندارى پايدالاناتىن شيكىزاتقا كەدەندىك باجدى تومەندەتۋ ماسەلەسى دە قاراستىرىلىپ جاتقانىن ايتا كەتكەن ورىندى.
قۇزىرلى ورگان اياق كيىم تاۋارلارىن تاڭبالاۋ جانە باقىلاۋ بويىنشا قاناتقاقتى جوبانى جۇزەگە اسىرىپ جاتىر. ءتيىستى جول كارتاسى, سونداي-اق اياق كيىم تاۋارلارىن تاڭبالاۋ جانە قاداعالاۋعا قاتىستى بۇل جوبانى جۇرگىزۋدە ادىستەمەلىك ۇسىنىمدار بەكىتىلدى. بۇدان بولەك, جەڭىل ونەركاسىپتىڭ كەيبىر تاۋارلارىن تاڭبالاۋعا بايلانىستى وسىعان ۇقساس جوبالار ورىندالىپ كەلەدى.
بيىل 274 جۇمىس ورنىن قۇرۋعا ارنالعان 5,429 ملرد تەڭگە ينۆەستيتسياعا 5 جوبانى ىسكە اسىرۋ كوزدەلىپ وتىر. بىلتىرعى جەلتوقسانداعى دەرەكتەرگا سايكەس, سالادا 1 210 كاسىپورىن بار. ونىڭ 97%-ى شاعىن كاسىپورىندار. سالادا جۇمىسپەن قامتىلعانداردىڭ سانى – 20,6 مىڭ ادام.