Telegram قولدانۋشىلارى اراقپەن تىنىس الۋ جولى كورسەتىلگەن ۆيدەو نۇسقاۋلىقتى تاراتۋدا. روليك كەيىپكەرىنىڭ ايتۋىنشا, ول وسىلايشا جوتەلدەن قۇتىلعان. COVID-19 جۇقتىرعاندا دا وسى ءادىستى قولدانۋ ۇسىنىلادى. ەمدەۋدىڭ بۇل جولى دەنساۋلىق ءۇشىن پايدالى ما, زيان با؟ بۇل سۇراقتىڭ جاۋابىن پۋلمونولوگ ەلەنا ميرزو ايتىپ بەردى, دەپ حابارلايدى Egemen.kz StopFake.kz سايتىنا سىلتەمە جاساپ.
ايتا كەتەيىك, بۇعان دەيىن وسى جولمەن كوروناۆيرۋستى ەمدەۋدى ورىس تەكتەس يتاليالىق دارىگەر دە ۇسىنعان بولاتىن. ول COVID-19 جۇقتىرعان سوڭ اراق بۋىمەن ينگالياتسيا جاساۋ ارقىلى تەز ەمدەلىپ شىققانىن ايتقان. بۇل ۇسىنىستاردى ءارتۇرلى ەلدەردىڭ دارىگەرلەرى, سونىڭ ىشىندە جوعارى ساناتتاعى تانىمال پەدياتر ەۆگەني كوماروۆسكي دە جوققا شىعاردى.
2020 جىلعى كوكتەمدە جاريالانعان ۆيدەو Youtube-تان ءوشىرىلدى. بىراق بۇل يدەيانى ۇستانۋشىلار جاڭا ۆيدەولار تۇسىرىپ, الەۋمەتتىك جەلىلەردە تاراتۋدا.
12 جىلدىق تاجىريبەسى بار پۋلمونولوگ ەلەنا ميرزونىڭ پىكىرىنشە, «اراقپەن ينگالياتسيا» جاساۋ ەم بولمايدى جانە زيان كەلتىرۋى مۇمكىن.
«اراقپەن تىنىس الۋعا بولمايدى. سپيرت بۋىنىڭ برونحتىڭ شىرىشتى قابىعىنا تيگىزەر اسەرى تۋرالى كلينيكالىق زەرتتەۋلەر كوپ. الكوگولدىڭ اسەرى برونح دەمىكپەسىن اسقىندىرىپ جىبەرەدى. سپيرت بۋى تىنىس الۋ جولدارىنىڭ رەاكتيۆتىلىگىنىڭ قوزدىرعىشى بولىپ تابىلادى, برونحوسپازم دامۋى مۇمكىن. ەشكىم دە بۇلاي ەمدەلە المايدى – ساۋ ادامدار دا, ناۋقاستار دا, تىنىس الۋ جۇيەسىنىڭ پاتولوگياسى بار ادامدار دا», – دەيدى ەلەنا ميرزو.
ۆيدەو استىنان جازىلعان پىكىرلەردە وسى ءادىستى قولدانۋشىلاردىڭ ءبىرى: «سپيرت نەمەسە اراق بۋى وكپەدەگى كوبىكتى باسادى. تەكسەرگىسى كەلگەندەر حيميالىق پنەۆمونيتتى قالاي ەمدەيدى دەگەن اقپاراتتى ىزدەڭىزدەر» دەپ جازعان.
دارىگەردىڭ ايتۋىنشا, وكپە ءىسىنۋى كەزىندە كوبىك پايدا بولعاندا سپيرت قولدانىلاتىنى راس, بىراق بۇل رەانيماتسيا جاعدايىندا ارنايى جابدىقتىڭ كومەگىمەن جاسالادى.
– وكپە ءىسىنۋى – كوكتامىرلىق گيپەرتەنزيا جانە الۆەوليارلى وكپە ءىسىنۋى داميتىن ءجىتى سولقارىنشالىق جەتكىلىكسىزدىگى. مۇنداي پاتسيەنتتەردە – قاتتى ەنتىگۋ, ىسىلداۋ, كوبىكتەنەتىن قاقىرىق سياقتى بەلگىلەر بولادى – بۇل اۋىر جاعداي جانە شۇعىل كومەك كورسەتۋدى قاجەت ەتەدى. وكسيگەنوتەراپيا جانە ءوجج كەزىندە كوبىكتەنۋدى ازايتۋ ءۇشىن تۇراقتى تۇردە وتتەگى بەرە وتىرىپ, ينگالياتسيالىق تۇردە ەتيل ءسپيرتى (30%) قولدانىلادى. مۇنىڭ بارلىعى رەانيماتسيا بولىمشەسىندە گەموديناميكانى باقىلاي وتىرىپ, مەديتسينا قىزمەتكەرلەرىنىڭ تاۋلىك بويعى باقىلاۋىمەن جۇزەگە اسىرىلادى. ءۇي جاعدايىندا ولاي ىستەۋگە بولمايدى, – دەيدى قاراعاندى مەديتسينا ۋنيۆەرسيتەتى كلينيكاسىنىڭ دارىگەرى ەلەنا ميرزو.
دارىگەرلەردىڭ اتاپ وتۋىنشە, ۇيدە اراقپەن ينگالياتسيا جاساۋ كوروناۆيرۋستىڭ الدىن الۋدا دا كومەكتەسپەيدى. بۇل رەتتە قاراپايىم گيگيەنا ساقتاۋ ەرەجەلەرى قولدى ءجيى جۋ, ماسكا تاعۋ جانە ارا قاشىقتىقتى ساقتاۋ كەرەك.