تۇركىستان وبلىسىنىڭ اكىمى ومىرزاق شوكەەۆ قالاداعى قۇرىلىس الاڭدارىن ارالاپ, جۇرگىزىلىپ جاتقان جۇمىس بارىسىن باقىلادى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
سالىنىپ جاتقان دەمالىس ورىندارىنىڭ ءمان-جايىمەن تانىسىپ, جاۋاپتى سالا باسشىلارىنا تاپسىرمالار بەردى. وبلىس باسشىسى «تۇركى باعى» مەن ياسساۋي كوشەسى بويىنان سالىنىپ جاتقان جەلىلىك ساياباقتىڭ قۇرىلىسىمەن تانىستى. بۇگىنگى تاڭدا جەردى تەگىستەۋ جۇمىستارى 30% اياقتالىپ, سۋ ساقتاۋ قويماسىن (رەزەرۆۋار) ورناتۋعا دايىندىق جۇمىستارى جۇرگىزىلىپ جاتىر.
سونداي-اق ءوڭىر باسشىسى «كەرۋەن ساراي» تۇرعىن ۇيلەر كەشەنىنىڭ قۇرىلىسىمەن تانىستى. قازىرگى تاڭدا كوپقاباتتى تۇرعىن ۇيلەردىڭ ىرگەتاسى قالانىپ, قۇرىلىس-مونتاجداۋ جۇمىستارى قارقىندى جۇرگىزىلۋدە. اۋقىمدى جوبا الداعى قاراشا ايىندا پايدالانۋعا بەرىلەدى دەپ كۇتىلۋدە.
بۇدان سوڭ, ومىرزاق ەستاي ۇلى عىلىمي-امبەباپ كىتاپحاناسىندا بولدى. نىساننىڭ سىرتقى جانە ىشكى ارلەۋ, ينجەنەرلىك جەلىلەرىن مونتاجداۋ جانە قۇرال-جابدىقتاردى ورناتۋ جۇمىستارى جۇرگىزىلۋدە. كىتاپحانا الداعى اقپان ايىندا ەل يگىلىگىنە بەرىلمەك.
سونىمەن قاتار ءوڭىر باسشىسى حالىقارالىق تۋريزم جانە مەيماندوستىق ۋنيۆەرسيتەتىن ارالاپ, ونداعى اتقارىلىپ جاتقان جۇمىستارمەن تانىستى. تۇركىستانداعى كومەكشى مەكتەپ-ينتەرناتى جاتاقحانانىڭ قۇرىلىس الاڭىن ارالاپ كوردى. جاتاقحانانىڭ قۇرىلىسى اياقتالعان. عيمارات ينجەنەرلىك جۇيەلەرمەن قامتاماسىز ەتىلگەن.
ايماق باسشىسى رۋحاني-مادەني ورتالىقتاعى اباتتاندىرۋ جۇمىستارىمەن تانىستى. قوجا احمەت ياساۋي كەسەنەسىنىڭ اۋماعىن اباتتاندىرۋ 4 كەزەڭمەن جۇزەگە اسۋدا. جوسپارلانعان ءىستىڭ جارتىسىنان استامى اياقتالعان. «ازىرەت سۇلتان» قورىق-مۇراجايىنىڭ اۋماعىنداعى 9 گەكتار اۋماق اباتتاندىرىلۋدا. قۇرىلىس جۇمىستارى وندىرىستىك كەستەگە سايكەس ءجۇرىپ جاتىر. كوپجىلدىق كوشەتتەر ەگىلىپ, ينجەنەرلىك جەلىلەر تارتىلعان, اياقجولدار توسەلگەن.
«تۇڭعىش پرەزيدەنت ساياباعىنىڭ» اۋماعىنداعى قۇرىلىس تا وبلىس اكىمىنىڭ باستى باقىلاۋىندا. 38 گەكتار اۋماق تۇتاستاي جاسىل جەلەككە ورانادى. كوگالداندىرىلىپ, جاساندى كولدىڭ تىرەۋ قابىرعالارىنىڭ بەتون جۇمىستارى اياقتالىپ, گابيونمەن قاپتالعان. باس قاقپاسى ورناتىلىپ, ءمارمار تاسپەن قاپتالۋدا.