ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ازاماتتارعا جەكە قابىلداۋ وتكىزدى. اتىراۋ وبلىسىنىڭ بەلسەندى تۇرعىنى جانات ەسماعامبەتوۆا جەرگىلىكتى تۇرعىنداردى ءوز اۋلالارىندا اعاش ەگۋگە كوپتەپ تارتۋ قاجەتتىگى تۋرالى ۇسىنىس ءبىلدىردى.
«مەن 1-ءشى توپتاعى مۇگەدەك بولسام دا وتكەن جىلى ءوز اۋلامدا 57 اعاش وتىرعىزدىم. ءبىزدىڭ تۇرعىن ۇيدە 80 پاتەر بار. ولاردى دا قولداۋعا شاقىردىم. ەرەكشە بالالاردى وسى ىسكە ارالاستىرىپ, ولار ءوز ەسىمدەرى ىلىنگەن كوشەتتەر ەكتى. الەۋمەتتىك روليكتەر تۇسىردىك. اعارتۋشىلىق باعىتتاعى ۆيدەولاردى كوبىرەك دايىنداۋ قاجەت. ايتپەسە اۋلاعا ەگىلگەن اعاشتارعا جۇرت كيىمدەرىن جايىپ تاستاپ, زيان تيگىزىپ جاتىر. وسىنداي شارالاردى قالانىڭ باسقا دا تۇرعىندارى وتكىزگەنىن قالايمىز. وسى رەتتە «تابيعات» دەپ اتالاتىن قور قۇرۋدى ۇسىنامىز», - دەدى قالا تۇرعىنى. مينيستر مىرزاعاليەۆ بۇل باعىتتاعى جۇمىستاردى تولىعىمەن قولدايتىنىن, اعاشتارعا زيان كەلتىرۋگە قاتىستى زاڭ قاتايىپ جاتقانىن جەتكىزدى.«اعاشتى زاڭسىز كەسۋگە, كوشەت وتىرعىزۋعا قاتىستى ءتۇسىندىرۋ, اعارتۋ جۇمىستارىن كوبەيتۋىمىز كەرەك. بىرلەسە جۇمىس ىستەۋىمىز قاجەت. وتكەن جىلدىڭ سوڭىندا زاڭسىز اعاش كەسۋگە قاتىستى زاڭعا نورمالار ەنگىزىلىپ, جازا كۇشەيتىلدى. ونىڭ ۇستىنە پرەزيدەنتىمىز قىركۇيەكتەگى جولداۋىندا 5 جىل ىشىندە ورمان القابىندا 2 ملرد, ەلدى مەكەندەردە 15 ملن اعاش وتىرعىزۋعا تاپسىرما بەرگەن. ءار وبلىس ءۇشىن جەكە جوسپار ازىرلەدىك. اتىراۋدا الدىمەن جايىق وزەنى اينالاسىن قامتيمىز», - دەدى ماعزۇم مىرزاعاليەۆ. جەكە قابىلداۋعا جازىلعان اتىراۋ وبلىسىنىڭ تۇرعىنى, دارىگەر گۇلنار تالمانوۆا كلينيكالىق ەكولوگيا ورتالىعىن اشۋعا ۇسىنىس بەردى. مينيستر ەلىمىزدە ەكولوگيا مەن دەنساۋلىقتىڭ اراسىنداعى بايلانىستى تەرەڭ زەرتتەۋ قاجەتتىگىن اتاپ ءوتتى. ال ماڭعىستاۋ وبلىسىنىڭ تۇرعىندارى مەتالل قالدىقتارعا, قىزىلوردا وبلىسى تۇرعىنى ارالباي قۇزباقوۆ ەميسسيالىق تولەمدەرگە قاتىستى ماسەلەلەر كوتەردى.مينيستر ءار سۇراق بويىنشا ءتيىستى باسشىلارعا تاپسىرما بەرىلەتىنىن جەتكىزدى.