ءمالىم دە بەيمالىم بايسۋفينوۆتەر

اياقدوپشىلار اۋلەتى

ءبىر اۋلەتتىڭ ءۇش بۋىنىنىڭ, ياعني اكەسىنىڭ, بالاسىنىڭ جانە نەمەرەسىنىڭ كاسىبي تۇرعىدان فۋتبول ويناۋى – وتە سيرەك كەزدەسەتىن جاعداي. جوپەلدەمدە ونداي اۋلەت ويىڭىزعا ورالمايدى دا. ءيا, الەمدىك دەڭگەيدە مۇنداي مىسالداردى كەزدەستىرۋگە بولادى. ماسەلەن, يتاليالىق مالدينيلەردى الايىق. مىنە, ءدال وسىنداي اۋلەت قازاقستاندا دا بار. ول – بايسۋفينوۆتەر اۋلەتى. ءبىزدىڭ كەيىپكەرىمىز تالعاتتىڭ اكە­سى­ مارۋا ءابىلدا ۇلى – پاۆلودار وڭى­رىندەگى العاشقى كاسىبي فۋتبول­شى­لاردىڭ ءبىرى. مارۋانىڭ كەنجە ۇلى تالعات ءبايسۋفينوۆتىڭ فۋتبول­دان الىستاماعانى وزدەرىڭىزگە بەل­گىلى. كەزىندە ونىڭ «تراكتور», «اڭسات», «ەرتىس», «ەكيباستۋزەتس», «جەتىسۋ», «ۆوستوك» سەكىلدى كلۋبتاردا دوپ تەپكەنى ءمالىم. پاۆلوداردىڭ «ەر­تىسىن» جاتتىقتىرىپ, باپكەرلىك قى­رى­نان تانىلعانى دا بەلگىلى. ەندى مىنە, ۇلتتىق قۇرامانى جەتەگىنە الىپ وتىر. اتاسى مارۋا مەن اكەسى تالعاتتىڭ جولىن قۋعان تەمىر ءبايسۋفينوۆتىڭ كەلەشەگىنەن ءۇمىت كۇتەتىندەر كوپ. «اقسۋ», «ەرتىس», «وقجەتپەس» سەكىل­دى كلۋبتاردا ويناپ ۇلگەرگەن 22 جاس­تاعى تەمىر قازاقستاننىڭ 19 جاسقا دەيىنگى ۇلتتىق قۇراماسىنا دا ءجيى شاقىرىلدى. بۋىن ساباقتاستىعى دەگەن وسى ەمەس پە؟!

بۇل از دەسەڭىز, تاعى ايتارىمىز­ بار. تالعات ءبايسۋفينوۆتىڭ قىزى اينۇر دا – كاسىبي فۋتبولشى. ول – 17 جاسقا دەيىنگى قازاقستان ۇلتتىق قىزدار قۇراماسىنىڭ بەلدى ويىنشىسى. تالعاتتىڭ زايىبى يرينا اناتولەۆنا دا فۋتبولدان الىس ەمەس. يرينا – پاۆلودار فۋتبولى تاريحىنداعى وزىندىك ورنى بار چۋپاحيندەر اۋلەتىنىڭ وكىلى. ۋاقى­تىن­دا جۇبايىن جىگەرلەندىرىپ, قازىر ۇلى مەن­ نەمەرەلەرىن قايراپ وتىراتىن بەلگىلى اۋلەتتىڭ ۇيىتقىسى قاديشا قاپاسقىزى – بايسۋفينوۆتەردىڭ فۋتبولداعى ەڭ باستى جانكۇيەرى. مىنە, ءبىز ءۇشىن «بايسۋفينوۆتەر اۋلەتى» مەن «فۋتبولدىڭ» ەگىز ۇعىمداي ەستىلەتىنى دە سوندىقتان.

فۋتبولشىلار ءۇيى

پاۆلودار وڭىرىندە بايسۋفينوۆتەر اۋلەتىن بىلمەيتىن ادام كەمدە-كەم. ولارعا دەگەن قۇرمەت تە ەرەكشە. ويتكەنى ايماق فۋتبولىنىڭ دامۋىنا اۋلەتىمەن ۇلەس قوسقان ءدال وسى بايسۋفينوۆتەر عانا. مۇنداي اۋلەت وڭىردە بۇرىن-سوڭدى بولعان ەمەس. مۇنى جەرگىلىكتى جۋرناليست ستانيسلاۆ تيموفەەۆ ءوزىنىڭ «فۋتبولنىي كود مارۋا» اتتى كىتابىندا دا جازدى. اتى ايتىپ تۇرعانداي, كىتاپ مارۋا بايسۋفينوۆكە جانە ءوڭىر فۋتبولىنىڭ تاريحىنا ارنالعان. ءومىرى ءبىر كىتاپقا جۇك بولعان ادامنىڭ قانداي تۇلعا ەكەنىن وسىدان-اق اڭعارۋعا بولادى.

پاۆلودار فۋتبولىنىڭ بىلگىرى الەكساندر پراسولەنكونىڭ ايتۋىنشا, اياقدوپ ونەرى بۇل وڭىرگە 1915-1916 جىلدارى كەلگەن. ونى اكەلگەن – اۋستريالىق, چەحيالىق تۇتقىندار. سولارعا قاراپ جەرگىلىكتى جىگىتتەر ويناي باستاعان. تاريحي دەرەكتەرگە سۇيەنسەك, پاۆلوداردا قۇرىلعان العاشقى فۋتبول كلۋبى «زۆەزدوچكا» دەپ اتالادى. ال 1923 جىلدىڭ كوكتەمىندە «ياسترەب» دەگەن كلۋب ومىرگە كەلگەن. جەرگىلىكتى حالىق ءار سەنبى سايىن ەكى كوماندانىڭ تارتىسىن تاماشالاۋعا جينالادى ەكەن. پاۆلودارداعى العاشقى رەسمي ماتچ 1947 جىلدىڭ 2 مامىرىندا وتكەن. ءدال وسى كۇنى قالانىڭ قازىرگى ورتالىق ستاديونى پايدالانۋعا بەرىلدى. سونىڭ قۇرمەتىنە جانكۇيەرلەر فۋتبول ماتچىن تاماشالاعان. ال اتالعان ستاديوندا دوپ تەپكەن العاشقى قازاق – مارۋا بايسۋفينوۆ.

– قايىن جۇرتىم – باياناۋىل. دالىرەك ايتسام, اۋليەلى قىزىلتاۋ. اتام دا, ەنەم دە سول جاقتان. ەكەۋىنىڭ دە سۇيەگى – ك ۇلىك. ءماشھۇر جۇسىپكە تۋىستىعى بار. مارۋانىڭ اكە-شەشەسى 1930-جىلدارى رەسەيدىڭ ءنوۆوسىبىر ءوڭىرىن مەكەندەگەن. كۇيەۋىم 1934 جىلى سول جاقتا تۋىپتى. كەيىن پاۆلودارعا كوشىپ كەلگەن. ءسىرا, سوعىستان كەيىن بولسا كەرەك. ونىمەن 1956 جىلى ورتالىق ستاديوندا تانىستىم. سويتسەك, ءۇيىمىزدىڭ اراسى جاقىن ەكەن. بىراق سولاي بولا تۇرا, بۇعان دەيىن ءبىر-ءبىرىمىزدى كورمەپپىز. 1961 جىلى وسى اۋلەتكە كەلىن بولىپ ءتۇستىم, – دەيدى وتكەن كۇندەردى ەسكە العان قاديشا اپا.

بۇگىندە سەكسەننەن اسقان قاديشا قاپاسقىزى مارۋا سالعان ۇيدە تۇرادى. ونى بىلايعى جۇرت «فۋتبولشىلار ءۇيى» دەپ تە اتايدى. بۇلاي اتالۋىنىڭ وزىندىك سەبەپتەرى دە بار. بىرىنشىدەن, بۇل شاڭىراقتان فۋتبولشىلار شوعىرى شىققان. مارۋا, تالعات, تەمىر بايسۋفينوۆتەردەن بولەك, قاديشا اپانىڭ ۇلكەن ۇلى قايراتتىڭ بالاسى قايسار دا – كاسىبي فۋتبولشى. بۇگىندە بىلىكتى باپكەر رەتىندە تانىمال. ەكىنشىدەن, بۇل ۇيدەن فۋتبولشىلار ۇزىلگەن ەمەس. اسىرەسە مارۋا ءابىلدا ۇلىنىڭ ءتىرى كەزىندە, تالعات ءبايسۋفينوۆتىڭ پاۆلوداردا قىزمەت اتقارعان جىلدارىندا جاس فۋتبولشىلار, ارداگەرلەر وسىندا جينالىپ, ەستەلىكتەر ايتىپ, كەڭەس قۇراتىن. ۇشىنشىدەن, اتالعان ءۇيدىڭ قۇرىلىسىنا فۋتبولشىلار اتسالىسقان. ول تۋرالى جەرگىلىكتى سپورت ارداگەرى ياكوۆ بەردىڭ ەستەلىگىندە جازىلعان. «تۇتاس كوماندا بولىپ, مارۋانىڭ ءۇيىن سالۋعا كومەكتەستىك. ارنايى سەنبىلىك شاراسىن دا ۇيىمداستىراتىنبىز. فۋتبولشىلاردىڭ قولىمەن تۇرعى­زىل­عان بۇل ءۇيدىڭ بىزگە ىستىق بولاتىنى دا سوندىقتان», دەيدى ياكوۆ بەر.  

– ءبىز ستاديوندا تانىسىپ, تابىس­تىق. ستاديونعا مارۋانىڭ – كومان­دا­داعى جالعىز قازاقتىڭ ونەرىن تا­ماشالاۋعا, وعان قولداۋ كورسەتۋگە با­راتىنبىز. وقۋشى كۇنىمىزدەن ما­رۋاعا جانكۇيەر بولدىق. ول – جەر­گىلىكتى كلۋبتاعى جالعىز قازاق ءارى كوماندا كاپيتانى. وزگە ۇلت وكىلدەرىنىڭ ىشىنەن سۋىرىلىپ العا شىعۋدىڭ ءوزى ول كەزدە ەرلىكپەن پارا-پار. 1956-1961 جىلدارى جەرگىلىكتى كوماندادا مارۋادان باسقا قازاق ويناعان جوق. ودان كەيىن قازاق جاستارىنان ەركىن قوجاحمەتوۆ شىقتى. قازاقتار وسىلاي بىرتىندەپ كوبەيە بەردى, – دەيدى قاديشا اپا بايسۋفينوۆا.

تالاپشىل تالعات

مارۋا ءابىلدا ۇلى «ۇلدارىمنىڭ ءبىرى ءىزىمدى جالعاسا ەكەن» دەپ ارمانداپتى. ول ارمانى دا ورىندالدى.

– تۇڭعىشىم, مارقۇم قايرات تا, ورتانشى ۇلىم راحات تا, كەنجەم تالعات تا فۋتبول ويناپ ءوستى. راحات­ الماتىداعى سپورت-ينتەرناتتا وقىدى.­ الايدا دارىگەرلەر ونىڭ دەن­ساۋ­لىعىنا بايلانىستى سپورتپەن شۇ­عىلدانۋىنا تىيىم سالدى. مارۋا ۇلدارىنىڭ فۋتبولشى بولعانىن كور­گىسى كەلدى. ارمانىن تالعات جۇزەگە اسىردى. كەنجەمىز بالا كۇنىنەن سپورت­قا قۇمار ەدى. تەلەديداردان سپورت باسەكەلەرىن بوساتپايتىن. سول كەز­دەگى فۋتبولشىلاردىڭ, حوككەي­شى­لەردىڭ اتى-ءجونىن جەتى اتاسىن ايتقانداي جاتقا سوعاتىن. تالعات 10 جاسقا تولعاندا الماتىعا كوشتىك. مارۋا مۇندا بەس جىلداي كاسىپوداق ۇيىمىنىڭ وقۋىن وقىدى. تالعات الماتىدا فۋتبولعا تۇبەگەيلى بەت بۇردى. العاشقى باپكەرى – يۋري ەرەمين. كەزىندە مارۋامەن بىرگە ويناعان. 1983 جىلى پاۆلودارعا قاي­تا ورالدىق. تالعات جاتتىعۋىن تاس­تاعان جوق. مۇندا ونى اناتولي كازا­كوۆ جاتتىقتىردى. 1984 جىلى «تراكتور» كومانداسىنا الىندى. وسى­لايشا, تالعاتتىڭ فۋتبولداعى جارقىن ساتتەرى باستالدى. ونىڭ ءار جە­تىستىگىنە قۋاندىق. بىراق قۋانى­شىمىزدى سىرتقا شىعارا بەر­مەي­تىن­بىز.­ ەنەم وتە ىرىمشىل ەدى. 14 قۇرساق كوتەرگەن. سودان جالعىز قالعانى – مارۋا. سوندىقتان ول بالالاردى اسا ەركەلەتپەي, «جامان بالا», «قارا بالا» دەپ وتىراتىن. ءبىز دە ول كىسىنىڭ قاس-قاباعىنا قاراپ, ۇلىمىزدىڭ جەتىستىگىنە ىشتەي قۋانعانىمىزبەن, سىرتقا بىلدىرمەۋگە تىرىساتىنبىز, – دەيدى قاديشا اپا.

جانكۇيەرلەر تالعات ءبايسۋفينوۆ­تى تالاپشىل ادام, قاتال باپكەر رە­تىندە جاقسى بىلەدى. ويىن ىرىكپەي ايتادى. ونىسى كەيدە باسشىلارعا ۇنا­ماي دا قالادى. سوعان قاراماستان, تالعات مارۋا ۇلى العان بەتىنەن, بەرگەن سەرتىنەن تايعان ەمەس.

– وكىنىشكە قاراي, بىزدە كەيدە تالانتتار تاسادا قالىپ قويادى. ۇز­دىكتەردىڭ ورنىن جوعارى جاقتا اعا-كوكەلەرى بار ورتا دەڭگەيدەگى نەمەسە دارىنسىز سپورتشىلار باسادى. دوپتى ءتۇزۋ تەبە الماسا دا, سو­لاردىڭ جۇلدىزى جارقىرايدى. تالعات «ەرتىستىڭ» باس باپكەرى بولىپ تۇر­عاندا « ۇلىڭا ايتشى, مەنىڭ بالامدى كومانداعا السىن», دەپ مازامدى العاندار كوپ بولدى. «تالعات مەنىڭ نەمەرەمە كوماندادان ورىن بەرمەدى», دەپ ارالاسپاي كەتكەندەرى قانشاما. فۋتبولدا مۇنداي اعايىنشىلىق جۇرمەيدى. تالعات – تۋعان اعاسىنىڭ ۇلى راسۋلدى «دەڭگەيىڭ تومەن!» دەپ كومانداعا الماعان ادام. تانىستىڭ, تۋىستىڭ بالاسىنا مۇمكىندىك بەرە بەرسەك, فۋتبول وسپەيدى. ادالدىق كەرەك. تالعاتتىڭ باپكەر رەتىندەگى قا­تالدىعى, مىنەزدىلىگىنىڭ ارتىندا ادالدىق تۇر. ءوزىم دە قاتالدىقتى, ءتار­تىپتى سۇيەمىن. بۇل مىنەزدەر باپكەرگە كەرەك, البەتتە. تالعات – فۋتبولعا جان-تانىمەن بەرىلگەن جان. جەڭىلسە, جۇرەگى اۋىرادى. ءنار تاتپايدى. ونىڭ مىنەزىن, جايىن بىزدەن ارتىق ەشكىم دە بىلمەيدى. قاس-قاباعىنا قاراپ وتىرامىز, – دەيدى قاديشا اپا.

جۇلدىزدى شاق

تالعاتتىڭ باپكەرلىك قىزمەتتەگى جارقىن ساتتەرىنىڭ ءبىرى – پاۆلوداردىڭ «ەرتىسىن» باسقارعان جىلدار. بۇعان دەيىن «ەسىل-بوگاتىر» مەن «اقسۋ­دى» جاتتىقتىرعان ول, 2008 جىلى «ەرتىسكە» اۋىستى. وندا دا باس باپ­كەر­لىك قىزمەت بىردەن بۇيىرعان جوق. تەك 2010 جىلى عانا كلۋبتىڭ تاع­دىرى تالعاتقا ءبىرجولا سەنىپ تاپسىرىلدى. ول جەرگە قاراتقان جوق. 2010 جىلى جانكۇيەرلەرىن قۋانتا الماي جۇرگەن كلۋبتى جۇلدەگەرلەر قا­تارىنا ىلىكتىردى (3-ءشى ورىن). 2012 جىلى «ەرتىس» چەمپيوناتتىڭ كۇمىس جۇلدەگەرى اتاندى.

تالعات باسقارعان جىلدارى پاۆ­لو­دار­لىق كلۋب ۋەفا-نىڭ ەۋروپا ليگاسىندا دا جاقسى ونەر كورسەتتى. 2011-2012 جىلعى ماۋسىمنىڭ ءبى­رىنشى ىرىكتەۋ كەزەڭىندە پولشانىڭ «ياگەللونياسىن» ۇتىپ (جالپى ەسەپ – 2:1), پاۆلودارعا ناعىز فۋتبول تو­يىن تارتۋ ەتتى. ەكىنشى ىرىكتەۋ كە­زەڭىندە دە جامان ويناعان جوق. گرۋزيانىڭ «مەتاللۋرگ» كوماندا­سىمەن سىرت الاڭدا تەڭ ءتۇسىپ (1:1), ءوز الاڭىندا 0:2 ەسەبىمەن ۇتىلدى. 2013-14 جىلعى ماۋسىمدا دا تال­عات باستاعان جىگىتتەر جەرگىلىكتى جان­كۇيەرلەردىڭ ءۇمىتىن اقتادى. ەۋروپا ليگاسىنىڭ ءبىرىنشى ىرىكتەۋ كەزەڭىندە بولگاريانىڭ «لەۆسكي» كومانداسىن جارىس جولىنان شىعاردى (جالپى ەسەپ – 2:0). ەكىن­شى كەزەڭدە بوسنيا جانە گەر­تسەگوۆينانىڭ «شيروكي بريەگ» كو­مانداسىنا ەسە جىبەردى (جال­پى ەسەپ – 3:4). فۋتبول ماماندا­رى «ەرتىس» ەكى ماۋسىمدا دا ەكىنشى كەزەڭ­نەن ادەيى ءسۇرىندى» دەگەن پىكىر اي­تىپ ءجۇر. شىندىققا جاناساتىن سە­كىلدى. ويتكەنى سول كەزدە كلۋبتىڭ ەۋروپا ليگاسىنىڭ ءۇشىنشى كەزەڭىنىڭ شەتەل­دەگى ويىندارىنا بارا الاتىن مۇمكىندىگى جوق ەدى. ۇجىمنىڭ قارجىلىق جاعدايى تىم تومەن بولاتىن. سويتكەن كلۋب اقىرى قارجىلىق قيىندىقتارعا بايلانىستى 2020 جىلى ەل چەمپيوناتىن دا جالعاستىرا الماي, ورتا جولدا توڭقالاڭ استى. ول ەندى بولەك اڭگىمە.

قالاي دەسەك تە, تالعات بايسۋفينوۆ پاۆلودارلىق جانكۇيەرلەردى ەۋروپا ليگاسىنداعى تاماشا ويىندارىمەن ءتانتى ەتتى. «ەرتىسكە» ەندى ەشقاشان جانكۇيەر بولماستاي بولىپ تۇڭىلگەن جەرگىلىكتى حالىقتى ستاديونعا قاي­تا جيناعان دا وسى تالعات ەدى. تالعات­پەن بىرگە كومانداعا ۇجىمدىق رۋح,­ جانكۇيەرلىك مادەنيەت كەلدى. بۇ­رىن جانكۇيەرلەر 12 مىڭدىق ستا­ديون­نىڭ ءار جەرىندە تاۋىققا شاشىل­عان تارىداي بولىپ وتىرسا, تالعات مارۋا ۇلىنىڭ كەزىندە ستاديوندا ينە شانشىر ورىن بولمايتىن جاع­دايعا جەتتى. اسىرەسە ەۋروپا ليگا­سىنىڭ ماتچتارى كەزىندە بيلەت تاپپاي سان سوعىپ قالاتىندار كوبەيدى. پاۆلودارلىقتاردىڭ فۋتبولعا دەگەن ماحابباتىن قايتا وياتقان تالعات بايسۋفينوۆ جەرگىلىكتى حالىقتىڭ سۇيىكتى پەرزەنتىنە اينالدى.

ايتپاقشى, تالعات بايسۋفينوۆ­تەن كەيىن «ەرتىستە» توقىراۋ كەزەڭى باس­تالدى. ءبىر جىلدا ءۇش باپكەردى اۋىس­تىرعان جاعدايلار دا ورىن الدى. ءدال وسىنداي كەلەڭسىزدىك ءبىر ەمەس, ءۇش ماۋسىمدا تىركەلگەن ەكەن. تەك بولگاريالىق مامان ديميتار دي­ميتروۆتىڭ كەلۋىمەن عانا كوماندا­نىڭ جاعدايى دۇرىستالدى. ول كەتكەن سوڭ تاعى دا قيىن كەزەڭدەر باس­تالدى. سول تۇستا جەرگىلىكتى حالىق «ەرتىستى» توقىراۋدان تەك تالعات باي­سۋفينوۆ قانا الىپ شىعا الادى دەپ, سۇيىكتى پەرزەنتىنە ۇلكەن سەنىم ارتتى. الايدا فۋتبولدىڭ اقشاسىن تالان-تاراجعا سالىپ ۇيرەنگەن ءوڭىر­دىڭ جوعارى شەندىلەرى ونى اتتاپ باس­تىرمادى. سەبەبى ولار تالعاتتىڭ اناۋ-مىناۋعا يلىكپەيتىنىن, وزگەنىڭ ايتقانىمەن جۇرمەيتىنىن, قىسقا­سى, وزدەرىنە ىڭ­عايسىز ادام ەكەنىن جاقسى بىلەتىن ەدى.

ەلدىڭ ءۇمىتى

تالعات بايسۋفينوۆ وسىمەن ەكىنشى رەت قازاقستان ۇلتتىق قۇراماسىنىڭ تىزگىنىن ۇستادى. بۇعان دەيىن باس قۇرامانى 2016 جىلدىڭ ناۋرىزىنان 2017 جىلدىڭ اقپانىنا دەيىن جاتتىقتىرعان ەدى. تۇپ-تۋرا 11 اي باسقاردى.

وسى ۋاقىت ىشىندە ول سەنىم ارتۋ­عا تۇرارلىق جاتتىقتىرۋشى ەكە­نىن دالەلدەپ ۇلگەردى. وعان ءدال سول كەزەڭدەگى ۇلتتىق قۇرامانىڭ ستاتيس­تيكالىق كورسەتكىشتەرى دالەل بولا الادى. تالعات مارۋا ۇلىنىڭ جەتەك­شىلىگىمەن باس قۇرامامىز 8 ويىن وت­كىزدى. ونىڭ ەكەۋىندە جەڭىسكە جەتىپ, ۇشەۋىندە تەڭ ءتۇستى. ءۇش ويىندا ۇتىلدى. فيفا-نىڭ ۇلتتىق قۇرامالار رەيتينگىندە 2015 جىلدى 132-ءشى ورىنمەن تامامداعان قازاقستاندى 2016 جىلى جۇزدىكتىڭ قاتارىنا ەنگىزدى (98-ءشى ورىن). ءتىپتى تالعات بايسۋفينوۆ باسقاراتىن قۇ­راما فيفا-نىڭ 2016 جىلدىڭ قىر­كۇيەك ايىنداعى رەيتينگىندە 83-ءشى ورىنعا دەيىن كوتەرىلدى. مۇنداي جە­تىستىك ەل فۋتبولىنىڭ تاريحىندا بۇ­رىن-سوڭدى تىركەلگەن ەمەس.

ۇلتتىق قۇرامانى تەگىن-اق باس­قارۋعا دايىن ەكەنىن رەسمي تۇردە تا­لاي مارتە مالىمدەگەن تالعات باي­سۋفينوۆ – قازاقستان ۇلتتىق قۇراما­سىن جاتتىقتىرعان ءتورتىنشى قازاق جانە باس كومانداعا ەكىنشى مارتە جەتەكشىلىك ەتكەن العاشقى باپكەر. 28 جىلدا ءبىزدىڭ قۇرامانى 17 باپ­كەر جاتتىقتىرعان ەكەن. ونىڭ ىشىندە ۇلتتىق كومانداعا تالعاتتان بو­لەك, باقتيار بايسەيىتوۆ, باۋىرجان باي­مۇحامەدوۆ, سەرىك بەردالين سەكىلدى قا­زاق باپكەرلەرى جەتەكشىلىك ەتكەن.

تالعات ءبايسۋفينوۆتىڭ الدىندا ۇلكەن مىندەت تۇر. ول – 2022 جىلى قاتاردا وتەتىن الەم چەمپيوناتىنىڭ ىرىكتەۋ كەزەڭىندە جاقسى ناتيجە كورسەتۋ. ەلدىڭ ەندىگى ءۇمىتى – ەرتىستىڭ پەرزەنتىندە.