كەشە تۇنگى ساعات 23.40-تا وسكەمەندە «102» نومىرىنە ەر ادامنىڭ پونتون كوپىرىنەن سەكىرمەكشى بولىپ تۇرعانى تۋرالى قوڭىراۋ تۇسكەن. شاقىرتۋ تۇسە سالا ەكى مينۋتتىڭ ىشىندە وقيعا ورنىنا پوليتسيانىڭ «قىران-19» قۇرامى جەتكەن, دەپ حابارلايدى Egemen.kz
پوليتسيا لەيتەنانتى مەيرحان راكيشەۆ پەن پوليتسيا كىشى لەيتەنانتى باۋىرجان ريزابەكوۆ وقيعا ورنىنا كەلگەن بويدا كوپىردەن سالاقتاپ تۇرعان ازاماتتى بايقاعان. ءتارتىپ ساقشىلارى ونى قولىنان ۇستاپ قالۋعا تىرىسقانىمەن, جىگىت وزەنگە قۇلاعان.
جەتى قاراڭعى تۇندە پوليتسەيلەر الگى جىگىتتىڭ قاي مولشەردە اعىپ جارا جاتقانىنا كوز جەتكىزە الماعان. تەك وزەن بويىمەن جۇگىرىپ وتىرعان. ءسال ۋاقىتتان سوڭ وزەننىڭ ورتاسىنان "كومەكتەسىڭدەر" دەگەن داۋىس تالىپ شىققان. مۇنى ەستىگەن پوليتسەيدىڭ ءبىرى سۋعا ءتۇسىپ بارىپ, ارقانعا بايلانعان قۇتقارۋ شەڭبەرىن لاقتىرعان.
ابروي بولعاندا, ومىرمەن قوش ايتىسۋعا بەل بۋعان جىگىت شەڭبەردى ۇستاپ ۇلگەرەدى.
ساقشىلار جاعالاۋعا شىعارا سالىسىمەن جەدەل جاردەم كولىگىنە تاپسىرعان.
انىقتالعانداي, 26 جاستاعى ەر ادام ماس بولعان. ال نەگە ولمەك بولعانىن تۇسىندىرە المادى.
ايتا كەتۋ كەرەك, 2019 جىلى وسكەمەننىڭ پاترۋلدىك پوليتسەيلەرى كەز كەلگەن قيىن جاعدايدا كومەك كورسەتۋ ءۇشىن قاجەتتى قۇرالدارمەن جابدىقتالعان. بارلىق ءپاترۋلدى اۆتوكولىكتەر ارنايى قۇرالدارمەن ياعني, قۇتقارۋ كەۋدەشەلەرى, قۇتقارۋ شەڭبەرلەرى, تروستار, گيدراۆليكالىق قايشىلار, ءورت بالتالارى, ءورت سوندىرگىشتەر, ورتكە قارسى توسەمدەرمەن جابدىقتالعان.
– پوليتسەيلەر قىزمەتتىك اۆتوكولىگىندە بولعان قۇتقارۋ شەڭبەرىن قولدانىپ, سۋعا اعىپ بارا جاتقان ادامدى امان الىپ قال, – دەدى وسكەمەن قالاسى پب باستىعى ا.مۋلا.