ء«بىر ەل – ءبىر كىتاپ» رەسپۋبليكالىق اكتسياسى وقىرماندار اراسىندا قالىپتاسقان داستۇرگە اينالىپ كەلەدى. اتالعان جوبا قازاق ادەبيەتىنىڭ قازىنالى تۋىندىلارىن ناسيحاتتاۋ, وقۋ مادەنيەتىن قولداۋ جانە دامىتۋ, جاستاردى رۋحاني جانە پاتريوتتىق تاربيەگە باۋلۋعا باعىتتالعان.
مادەنيەت جانە سپورت مينيسترلىگىنىڭ قولداۋىمەن ۇلتتىق اكادەميالىق كىتاپحانا 15 جىل قاتارىنان ۇيىمداستىرىپ كەلە جاتقان اكتسيا اياسىندا تاڭدالعان كىتاپتار رەسپۋبليكالىق, وبلىستىق, قالالىق, اۋداندىق, اۋىلدىق جانە مەكتەپ كىتاپحانالارىندا كەڭىنەن ناسيحاتتالىپ ءجۇر.
جۋىردا 2021 جىلدىڭ جىل كىتاپتارىن تاڭداۋ بويىنشا ء«بىر ەل – ءبىر كىتاپ» اكتسياسى كوميسسياسىنىڭ كەزەكتى وتىرىسى بولىپ ءوتتى. بۇل جولى ەل تاۋەلسىزدىگىنىڭ 30 جىلدىعىنا وراي, جالپىحالىقتىق وقۋعا «تاۋەلسىزدىگىمىزدىڭ 30 جىلدىعىنا – 30 كىتاپ» رۋحاني-مادەني اكتسياسى ۇسىنىلىپ وتىر. جوبا اياسىندا پوەزيا جانرى بويىنشا مۇقاعالي ماقاتاەۆتىڭ ء«ومىرداستان», جۇمەكەن ناجىمەدەنوۆتىڭ «مەنىڭ قازاقستانىم», ۇلىقبەك ەسداۋلەتتىڭ «كيىز كىتاپ», سەرىك اقسۇڭقار ۇلىنىڭ «كوكەيىمدە كۇلتەگىننىڭ جازۋى» جيناقتارى, ال پروزا جانرى بويىنشا تىنىمباي نۇرماعامبەتوۆتىڭ «پەرىشتەلەردىڭ ءولىمى», توبىق جارماعامبەتوۆتىڭ «وتامالى», تۇرىسبەك ساۋكەتايدىڭ «جەلقايىق», ت.ب. شىعارمالارى تاڭدالعان. بۇدان بولەك دراماتۋرگيا, بالالار ادەبيەتى, اۋدارما جانرلارىندا دا بىرنەشە وقىلىمدى اۆتورلار قامتىلعان.