سەنات دەپۋتاتى ءلاززات سۇلەيمەن پرەزيدەنت قاسىم-جومارت توقاەۆتىڭ «Egemen Qazaqstan» گازەتىندە جاريالانعان «تاۋەلسىزدىك بارىنەن قىمبات» اتتى ماقالاسىنا قاتىستى پىكىر ءبىلدىردى, دەپ حابارلايدى Egemen.kz.
قاسىم جومارت كەمەل ۇلى توقاەۆ پرەزيدەنت بولعان كۇننەن باستاپ ساليقالى, اشىق ساياسات جۇرگىزىپ كەلەدى. "تاۋەلسىزدىك بارىنەن قىمبات" ماقالاسىمەن دە مەملەكەت باسشىسى كۇرمەۋى قيىن ماسەلەلەردى ەڭسەرۋ جولدارى تۋرالى باتىل ويلارىمەن ءبولىسىپ وتىر دەپ ەسەپتەيمىن.
العاشقى نازار اۋدارعانىم - جەتىستىكتەرىمىز بەن كەمشىلىكتەرىمىزدى وي ەلەگىنەن وتكىزۋدىڭ ماڭىزدىلىعى تۋرالى پىكىرى. تاۋەلسىزدىگىمىز تۇعىرلى بولۋى, مەملەكەتىمىزدى ساقتاۋ ءۇشىن ءبىز جەتىستىكتەرىمىزدى باعالاي الاتىن, كەمشىلىكتەرىمىزگە تۋرا قاراپ, تۇزەتۋدىڭ جولدارىن پايىمداۋعا قابىلەتتى قوعام بولۋىمىز شارت.
ەكىنشىدەن, ازاماتتارىمىزدىڭ ەكونوميكالىق ءوسىمنىڭ يگىلىگىن سەزىنە الماسا, ودان قايىر جوق,- دەپ تىكەلەي ايتۋى. بۇل باعىتتا قوعام كۇتكەندەي شەشىمدەر قابىلداۋ ماڭىزدى. ال ناقتى اتقارىلىپ جاتقان ىستەر دە از ەمەس. مىسالى, ەلمەن كەزدەسۋلەردە مۇعالىمدەر وتباسىنىڭ قازىرگى ۋاقىتتا 600 مىڭنان استام جالاقى الاتىنىن ايتقاندا, ولارمەن بىرگە قۋاندىق.
ەلباسى ن.ءا. نازارباەۆتىڭ كوشباسشىلىعىمەن تابىستى وتكەن ءۇش ونجىلدىقتىڭ بەرەكەسىن بەكەمدەپ, ءتورتىنشى ونجىلدىقتا قۋاتتى ەل, جەتىلگەن ۇلت بولۋدى ق.توقاەۆ باستى ماقسات - ۇلتتىق يدەيا دەڭگەيىنە كوتەرىپ وتىر دەپ تۇسىنەمىن. مەملەكەت باسشىسى ول ءۇشىن ساياسي جانە ەكونوميكالىق رەفورمالار مەن سانانى جاڭعىرتۋ ۇدەرىسىن جالعاستىرۋ, ۇلتتىڭ زاماناۋي تالاپتارعا بەيىمدەلگەن جاڭا بىرەگەيلىگىن قالىپتاستىرۋ قاجەت ەكەنىن اتاپ ءوتتى. ال بۇل بيىككە قازاقستاندىقتاردىڭ, مەملەكەتتىڭ, قوعامنىڭ بىرلەسكەن ءىس-قيمىلىنىڭ ناتيجەسىندە عانا قول جەتكىزۋگە بولادى. مەملەكەت باسشىسىنىڭ - ەلدى ءسۇيۋ, جەردى ساقتاۋ, قازاقتىڭ تىلىندە سويلەۋ جانە ءار ازاماتتىڭ ەلدىڭ دامۋى مەن وركەندەۋىنە ات سالىسۋى تۋراسىندا ايتقانى - تاعدىرشەشتى ماڭىزعا يە.
پرەزيدەنتتىڭ مەملەكەتتىك ءتىلدى ءبىلۋ تۋرالى وي-پىكىرىنىڭ ورىندالۋىنىڭ باستى جولى "قازاقتىڭ قازاقپەن قازاقشا سويلەسۋى". ونى ءار ازامات ءوز جاۋاپكەرشىلىگىنە الماي, ناتيجەنىڭ بولۋى ەكىتالاي ەكەنىن ۋاقىت تا كورسەتتى. مۇنى قازاق ەلى ازاماتتارىنىڭ تۇسىنەتىن ۋاقىتى باياعىدا جەتتى دەپ سانايمىن. ارقايسىمىز ءوز وتباسىمىزدا, ءوز بالالارىمىزبەن, اعايىن-تۋىس, كورشى-قولاڭ, باۋىرلارىمىزبەن قازاقشا سويلەسۋ جاۋاپكەرشىلىگىن ءوز مويىنىمىزعا الۋىمىز كەرەك, ەشكىمدى ايىپتاماي, دوستىق كوڭىلمەن ايتىلعان اۋىزەكى اڭگىمەنىڭ ءوزى العا ىلگەرىلەۋشىلىك بولار ەدى.
سونىمەن بىرگە پرەزيدەنت ق.توقاەۆتىڭ ماقساتى - حالىق ۇنىنە قۇلاق اساتىن مەملەكەت, ادىلەتتى, زايىرلى قوعام قۇرۋ. بۇل ءبىزدىڭ قوعامنىڭ دا ورتاق ماقساتىنا اينالۋعا ءتيىس.