پاۆلودار وبلىسىندا 14 جاسار وقۋشىنى ءولتىردى دەگەن كۇدىكپەن قاماۋعا الىنعان ۆيكتور باحارەۆتىڭ قىلمىسىن ارنايى كەشەندى جۇرگىزىلگەن ساراپتاما قورىتىندىسى دالەلدەپ بەردى. بۇل تۋرالى «استانا» تەلەارناسى حابارلادى.
ەستەرىڭىزدە بولسا, ەۆگەنەۆكا اۋىلىندا ءىز-ءتۇسسىز جوعالىپ كەتكەن 8-سىنىپ وقۋشىسى اناستاسيا شاريپوۆانىڭ ءمايىتى اراعا ەكى اپتاعا جۋىق ۋاقىت سالىپ تابىلعان بولاتىن. وسى وقيعاعا بايلانىستى تەرگەۋ امالدارىن جۇرگىزگەن ءتارتىپ ساقشىلارى باستى كۇدىكتى رەتىندە ۆ. باحارەۆتى قولعا تۇسىرگەن ەدى. سول كەزدە ونىڭ ءوزى دە جاساعان قىلمىسىن مويىندادى. الايدا, مارقۇم بولعان قىزدىڭ اتا-اناسى ۆ. باحارەۆتىڭ كىنالى ەمەستىگىن ايتىپ, بالامىزدى ولتىرگەن ادام جاسىرىنىپ ءجۇر دەگەن-ءدى. جاقىن ارادا استاناداعى مەديتسينالىق ساراپتاما ورتالىعىندا جاسالعان گەنەتيكالىق ساراپتاما كۇدىكتىنىڭ وسى ىسكە قاتىسى بولعانىن دالەلدەپ بەردى. سوندىقتان قۇقىق قورعاۋ قىزمەتكەرلەرى بۇل وقيعا توڭىرەگىندە ايتىلعان باسقالاي پىكىرلەردى قاڭقۋ سوزگە جاتقىزىپ وتىر.
باقىتبەك كەنەش ۇلى.
دەرەككوز: «استانا» تەلەارناسى.