بۇگىن «Egemen Qazaqstan» گازەتىندە مەملەكەت باسشىسى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسى جارىق كوردى, دەپ حابارلايدى Egemen.kz.
«بيىل قاستەرلى تاۋەلسىزدىگىمىزگە 30 جىل تولادى. بۇل – قايتا جاڭعىرعان قازاق مەملەكەتتىگىنىڭ, اتا-بابالارىمىز اڭساعان ازاتتىقتىڭ تۇعىرى نىعايا تۇسكەنىن ايگىلەيتىن ماڭىزدى بەلەس. تاريح تۇرعىسىنان العاندا, وتىز جىل – كوزدى اشىپ جۇمعانداي قاس-قاعىم ءسات. دەگەنمەن, بۇل كوپتەگەن حالىقتار ءۇشىن قيىندىعى مەن قۋانىشى, داعدارىسى مەن دامۋى الماسقان تۇتاس ءداۋىر دەۋگە بولادى. ءبىز دە وسىنداي جولدان ءوتىپ كەلەمىز», - دەلىنگەن پرەزيدەنت ماقالاسىندا.
وسى ورايدا مەملەكەت باسشىسى تاۋەلسىزدىگىمىزدىڭ ايشىقتى بەلەسى جەتىستىكتەرىمىز بەن كەمشىلىكتەرىمىزدى وي ەلەگىنەن وتكىزەتىن ماڭىزدى مەزەت ەكەنىن اتاپ ءوتتى.
«ازاتتىعىمىزدىڭ ايشىقتى بەلەسىنە شىققاندا ءاربىر سانالى ازاماتتى «وتىز جىلدا ءبىز قانداي جەتىستىكتەرگە جەتتىك؟», «كەلەر ۇرپاققا قانداي ەلدى اماناتتايمىز؟», «مەملەكەتتىگىمىزدى نىعايتا ءتۇسۋ ءۇشىن تاعى نە ىستەيمىز؟» دەگەن ساۋالدار تولعاندىرارى انىق. وسى تۇرعىدان العاندا, بۇل – ارمان-ماقساتتارىمىزدى توعىستىرىپ, بولاشاققا تىڭ سەرپىنمەن قادام باسۋ ءۇشىن وتكەنگە تاعى ءبىر مارتە ورالاتىن, جەتىستىكتەرىمىز بەن كەمشىلىكتەرىمىزدى وي ەلەگىنەن وتكىزەتىن ماڭىزدى مەزەت», - دەلىنگەن ماقالادا.