1 جەلتوقسانداعى جاعداي بويىنشا 12,3 مىڭ ادام تاريحي وتانىمەن تابىسىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ملن 69,5 مىڭ ەتنيكالىق قازاق ورالدى, دەپ حابارلايدى Egemen.kz.
وسى جىلى قازاقستانعا كەلگەن قانداستاردىڭ جارتىسىنان كوبى (54,2%) قىتايدان, 30,0% – وزبەكستاننان, 8,9% – تۇرىكمەنستاننان, 3,7% – موڭعوليادان جانە 3,2% باسقا ەلدەردەن.
كەلگەن ەتنيكالىق قازاقتار نەگىزىنەن الماتى (51,7%) جانە ماڭعىستاۋ (13,4%) تۇركىستان (5,6%) وبلىستارىنا, سونداي-اق نۇر-سۇلتان (4,1%) جانە شىمكەنت قالالارىنا (3,7%) قونىستاندى.
11 ايدىڭ قورىتىندىسى بويىنشا ەڭبەككە قابىلەتتى جاستاعى قونىس اۋدارۋشىلار سانى 57,2%-دى, ەڭبەككە قابىلەتتى جاستان كىشى 32,2%-دى جانە زەينەتكەرلەر 10,6%-دى قۇرايدى.