اقتاۋدا اۋادان شىققان جاعىمسىز ءيىس تۇرعىنداردى بەيجاي قالدىرمادى. اسىرەسە الەۋمەتتىك جەلىلەردە دابىل قاققان كوپشىلىك ەكولوگتەردىڭ ماسەلەنىڭ مان-جايىن انىقتاۋ ءۇشىن جۇمىستانۋىنا سەپ بولدى. ەكولوگتەر ۋاقىت وتكىزبەي يىستىڭ قايدان شىعىپ جاتقانىن انىقتاۋ ماقساتىندا وندىرىستىك مەكەمەلەردىڭ سانيتارلىق-قورعاۋ ايماعىنان جوسپاردان تىس اۋا ساپاسىنان سىناما الۋ جۇمىستارىن جۇرگىزدى. ناتيجەسىندە اقتاۋدا ازوت ديوكسيدى مەن مەتاننىڭ شەكتى رۇقسات ەتىلگەن كونتسەنتراتسياسىنان اسىپ كەتكەنىن انىقتادى.
ماڭعىستاۋ وبلىسى بويىنشا ەكولوگيا دەپارتامەنتىنىڭ حابارلاۋىنشا, زەرتحانالىق باقىلاۋ ناتيجەلەرىنە سايكەس اقتاۋ قالاسىندا اتموسفەراعا لاستاۋشى زاتتار شىعارىندىلارىنىڭ شەكتى رۇقسات ەتىلگەن كونتسەنتراتسيادان اسىپ كەتكەنى بايقالادى. اتاپ ايتقاندا, ازوت ديوكسيدىنىڭ شەكتى رۇقسات ەتىلگەن كونتسەنتراتسياسى 1,5 ەسە بولسا, مەتان 1,8 ەسە ارتقانى بايقالادى. سونىمەن قاتار «قازگيدرومەت» رمك ماڭعىستاۋ فيليالىنىڭ مەتەورولوگيالىق دەرەكتەرى دە اقتاۋ قالاسىنىڭ 15 جانە 33 شاعىن اۋداندارىنداعى ستاتسيونارلىق بەكەتتەردە ازوت ديوكسيدى مولشەرىنىڭ ارتقانىن راستاپ بەردى. بۇل رەتتە جەلدىڭ باعىتى «شىعىس سولتۇستىك-شىعىس» باعىتىنا سەكۋندىنا 4/5 مەتر, ساعات 18:00-دەن 23:00-گە دەيىن «شىعىس وڭتۇستىك-شىعىس» باعىتىنا سەكۋندىنا 2/4 مەترگە وزگەرگەنى بەلگىلى بولدى.
لاستاۋشى زاتتاردىڭ شىعۋى «ماەك-قازاتومونەركاسىپ» جشس, «قازازوت» اق, «كاسپي بيتۋم» جشس, «Mangystau Oil Refining» جشس, «اقتاۋ تەڭىز پورتى» اەا, «قازترانسويل» اق سياقتى باسقا دا كاسىپورىندار جاعىنان بايقالادى. ەكولوگيا دەپارتامەنتى اۋانى لاستاۋ كوزدەرى جوعارىدا اتالعان كاسىپورىنداردىڭ قىزمەتىمەن بايلانىستى دەگەن بولجام جاساپ وتىر.
ەكولوگيا كودەكسىنىڭ 117, 118-باپتارىن باسشىلىققا الا وتىرىپ, وبلىستىق ەكولوگيا دەپارتامەنتى جوسپاردان تىس تەكسەرۋ ءۇشىن ماڭعىستاۋ وبلىسىنىڭ مامانداندىرىلعان تابيعات قورعاۋ پروكۋراتۋراسىنا جۇگىنبەك. اتالعان دەپارتامەنتتىڭ ءباسپاسوز قىزمەتى تەكسەرۋدىڭ ناتيجەلەرى تۋرالى قوسىمشا حابارلاناتىنىن جەتكىزدى.
ماڭعىستاۋ وبلىسى