2025 جىلعا دەيىن قازاقستاندا مەملەكەتتىك-جەكەشەلىك ارىپتەستىك قارجىسىنا 20 كوپسالالى اۋرۋحانا سالىنادى. ونىڭ ءبىرى ماڭعىستاۋ وبلىسىندا بوي كوتەرەدى, دەپ حابارلادى ماڭعىستاۋ وبلىسى كوممۋنيكاتسيالار ورتالىعى.
ورتالىق حابارلاۋىنشا, بۇل ءوز كەزەگىندە ايماقتا اۋرۋحانا تاپشىلىعى ماسەلەسىن شەشىپ, حالىققا جوعارى تەحنولوگيالىق مامانداندىرىلعان دارىگەرلىك كومەك كورسەتۋ قاجەتتىلىگىن وتەيدى. ناۋقاستارعا شۇعىل مەديتسينالىق جاردەم بەرۋگە مۇمكىندىك تۋعىزىپ, وڭىردە مەديتسينالىق ءتۋريزمنىڭ دامۋىنا ىقپال ەتەدى.
ماڭعىستاۋ وبلىسى اكىمىنىڭ ورىنباسارى گۇلميرا قالمۇراتوۆانىڭ توراعالىعىمەن وتكەن جيىنعا تۇرىك ينۆەستورلارى قاتىستى. كەزدەسۋدە قر دەنساۋلىق ساقتاۋ ءمينيسترىنىڭ كەڭەسشىسى باتىربەك ءابدىلدين, ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى جامال جامانباەۆا مەن «ادالدىق الاڭى» جوبالىق كەڭسەسىنىڭ جەتەكشىسى دايراباي ۇسىپباەۆ تا بولدى.
ايتا كەتەيىك, بۇل اتالعان جوبانىڭ بارلىق تەتىگى ەگجەي-تەگجەيلى تالقىلانعان العاشقى كەزدەسۋ.
«اتالمىش جوبا وزىق تەحنولوگيالاردى قولدانىسقا ەنگىزىپ, حالىققا مەديتسينالىق كومەك كورسەتۋ ساپاسىن ارتتىرادى. دارىگەرلەرگە بارلىق جاعداي جاسالىپ, اۋرۋحاناعا قارالۋشىلاردىڭ قاۋىپسىزدىگى ءۇشىن ءتيىستى ءىس-شارالار الىنادى دەپ سەنەمىن. قازىرگى ۋاقىتتا بۇل نىسان قوعامعا وتە قاجەت», دەدى گۇلميرا مۇراتقىزى.