جەزقازعاننىڭ تاريحي-ارحەولوگيالىق مۋزەيىندە پۋبليتسيست, اقىن, جازۋشى باۋبەك بۇلقىشەۆ پايدالانعان ەت تاباق (استاۋ) ساقتاۋلى تۇر. «بۇل جادىگەر كوركەمدىك تۇرعىدا شەبەر جاسالماسا دا, ونىڭ تاريحي قۇندىلىعى, تاربيەلىك ءمانى وتە زور», دەيدى اتالعان مۋزەيدىڭ ديرەكتورى راۋشان قاپاروۆا.
اعاشتان ويىپ جاسالعان بۇل ىدىس تاريحي تۇلعانىڭ جاقىن تۋىسى انەس ساعىمباەۆتىڭ قولىندا 1981 جىلعا دەيىن بولىپتى. ال وسى جىلدىڭ قاراشا ايىندا ول كىسى جاقسىدان قالعان جادىگەردى ءوز قولىمەن اكەلىپ مۇراجايعا تاپسىردى.
باۋبەك بۇلقىشەۆ – ۇلىتاۋ ءوڭىرىنىڭ ۇلانى. الماتى ساۋدا-قارجى تەحنيكۋمىندا وقي ءجۇرىپ, شىعارماشىلىقپەن اينالىسقان. ولەڭدەرى ءباسپاسوز بەتتەرىندە ءجيى جاريالانىپ تۇردى. «بالالىق شاق» پوەماسى, «اۋىلدان الماتىعا» اتتى اڭگىمەسى جارىققا شىقتى. «لەنينشىل جاس» (قازىرگى «جاس الاش»), «قازاقستان پيونەرى» (قازىرگى «ۇلان») گازەتتەرىندە ەڭبەك ەتكەن.
ۇلى وتان سوعىسىنداعى قاندى شايقاستارعا العاشقى كۇندەردەن باستاپ قاتىسىپ, ەرلىكتىڭ جارقىن ۇلگىسىن كورسەتتى. جالىندى كوسەمسوز شەبەرى, ەرجۇرەك جاۋىنگەر ماسكەۋدى قورعاۋ, ۋكراينانى ازات ەتۋ شايقاستارىنىڭ بەل ورتاسىندا بولعان. سوعىس كەزىندە جازعان شىعارمالارىنىڭ باسىم كوپشىلىگى «كومسومولسكايا پراۆدا» گازەتىندە جاريالانىپ تۇردى. ەسىل ەر 1944 جىلدىڭ باس كەزىندە قازا تاپقان.
ۇلى وتان سوعىسىندا باتىرلىعىمەن عانا ەمەس, جالىندى پۋبليتسيست رەتىندە كوزگە تۇسكەن باۋبەك بۇلقىشەۆتىڭ ء«ومىر مەن ءولىم», «شىعىس ۇلىنا حات», «زامان بىزدىكى», «جاۋىزدىق پەن ماحاببات» اتتى شىعارمالارى قان مايداننىڭ ورتاسىندا جۇرگەن جاۋىنگەرلەرگە مىقتى رۋح بەرگەن, ولاردىڭ جىگەرىن جانىپ, نامىسىن وياتقان.