تاۋەلسىزدىك كۇنىنە وراي تۇركىستان وبلىسىنىڭ بىرقاتار تۇرعىنى باسپانالى بولىپ, قۋانىشقا كەنەلدى. سايرام اۋدانى اكىمدىگى تاراپىنان مۇقتاج رەتىندە ءبىرىنشى كەزەكتە تۇرعان 10 وتباسىنا باسپانا كىلتى تابىستالدى.
«نۇرلى جەر» مەملەكەتتىك باعدارلاماسى اياسىندا سايرام اۋدانىنداعى كوپ بالالى وتباسىلاردى تۇرعىن ۇيمەن قامتاماسىز ەتۋ ءۇشىن رەسپۋبليكالىق بيۋدجەت ەسەبىنەن 252 ملن تەڭگە قارجى بولىنگەن. بۇل قاراجاتقا 30 باسپانا الۋ جوسپارلانعان. قازىرگى تاڭدا سانيتارلىق-ەپيدەميالىق جانە تەحنيكالىق تالاپتارعا سايكەس كەلەتىن 26 تۇرعىنجاي ساتىپ الىندى. تاعى 4 ءۇيدىڭ تالاپقا سايكەستىگى انىقتالۋدا. اۋدان اكىمى ۇلاسبەك سادىبەكوۆ جوسپارعا سايكەس 30 باسپانا اۋدانداعى مەملەكەتتىك تۇرعىن ءۇي قورىنان باسپاناعا مۇقتاج رەتىندە تىركەلگەن كوپ بالالى وتباسىلارعا بەرىلەتىنىن ايتادى. بۇگىندە اۋدان اۋماعىندا باسپاناعا مۇقتاج رەتىندە 370 كوپ بالالى وتباسى تىركەلگەن.
ال تولەبي اۋدانىندا 46 وتباسى باسپانالى بولدى. ولاردىڭ ىشىندە 21 وتباسى – الەۋمەتتىك جاعىنان وسال توپ, 6 – اتا-اناسىنىڭ قامقورلىعىنسىز قالعان بالالار, 9 – كوپ بالالى وتباسى جانە 11 – مەملەكەتتىك قىزمەتكەرلەر. بۇگىندە تولەبي اۋدانى بويىنشا بارلىعى 3 879 ازامات تۇرعىن ءۇي كەزەگىندە تۇر. ونىڭ ىشىندە: اتا-اناسىنىڭ قامقورلىعىنسىز قالعان بالالار ساناتىندا – 293, حالىقتىڭ الەۋمەتتىك جاعىنان وسال توپتارى ساناتىندا – 1770, كوپ بالالى وتباسىلار – 385, مەملەكەتتىك, اسكەري جانە بيۋدجەتتىك مەكەمە قىزمەتكەرلەرى ساناتىندا 1431 ازامات تىركەلگەن. كەلەسى جىلى اۋداندا 20 پاتەرلىك 9 كوپ قاباتتى تۇرعىن ءۇيدى پايدالانۋعا بەرىپ, 180 وتباسىن تۇرعىن ۇيمەن قامتۋ جوسپارلانۋدا. تاۋەلسىزدىك كۇنى ورداباسى اۋدانى قاراقۇم اۋىلىنىڭ تۇرعىندارى ءۇشىن دە ۇمىتىلماس قۋانىش سىيلادى. جاڭا سپورت كەشەنى پايدالانۋعا بەرىلدى. جالپى, ورداباسى اۋدانىنىڭ سپورت سالاسىندا ايتۋلى جۇمىستار اتقارىلىپ كەلەدى. بيىل جەرگىلىكتى بيۋدجەت ەسەبىنەن ۇيالىجار مەن تەمىرلان اۋىلىنان اشىق الاڭشا مەن ستريت ۆوركاۋت اشىلعان بولاتىن. اۋدان ورتالىعىنداعى ساياباق تا وسىنداي نىسانمەن تولىقتى. كوپ قاباتتى ۇيلەردىڭ اۋلاسىندا 2 اشىق الاڭشا, «بايتەرەك» مەكتەبىنىڭ سپورت زالى مەن الاڭشاسى سالىندى.