الماتى وبلىسىنداعى قارابۇلاق اۋىلىنىڭ تۇرعىندارى اۋىز سۋدىڭ ازابىن تارتىپ وتىرعانىنا 20 جىلدان استى. بۇل تۋرالى «24» kz حابارلادى.
ءۇيىنىڭ اۋلاسىنان قۇدىق قازۋعا شاماسى كەلمەيتىن وتباسىلار تەنتەك وزەنىنەن سۋ تاسىپ ىشۋگە ءماجبۇر. جەرگىلىكتى اتقارۋشى بيلىك وكىلدەرىنىڭ ايتۋىنشا, بۇل اۋىلعا مەملەكەتتىك «اق بۇلاق» باعدارلاماسى بويىنشا بولاشاقتا قۇبىر تارتۋ جوسپاردا بار.
مۇنداعى تۇرعىنداردىڭ اۋىز سۋدىڭ ازابىن تارتقانى سونشالىق, اۋەلى قۇدىق سۋىن تۇندىرىپ, سوسىن قايناتىپ ىشەدى ەكەن.«سۋدى تۇندىرىپ ىشپەسەڭ, ىشىندە قۇم بار. اۋىلدا بۇيرەكتەرى اۋىرعاندار, ودان تاس الدىرعاندار كوبەيىپ كەتتى. وسى سۋدىڭ اسەرىنەن»,-دەيدى قارابۇلاق اۋىلىنىڭ تۇرعىنى راحمەت جۇماشەۆ.
وسى وڭىردەگى الاكول اۋدانىندا 56 اۋىل بولسا, 39 اۋىل ءالى اۋىز سۋعا تولىق جارىماي وتىر. جالپى, 2002-2008 جىلدارى 8 اۋىلعا قۇبىر تارتىلعان ەكەن. ال 2010 جىلدان بەرى 5 اۋىلعا عانا سۋ بەرىلگەن.
«مەملەكەتتەن ۇلكەن قاراجات بولىنگەندىكتەن, ءبىز جوبالاۋ جۇمىستارىنا كوپ كوڭىل ءبولىپ وتىرمىز. بيىلعى جىلى 4 اۋىلدىڭ جوبالاۋ جۇمىستارىن دايىنداۋدى جوسپارلادىق. وسىنداي قارقىنمەن 2018 جىلى اۋىلداردى 70 پايىز اۋىز سۋمەن قامتۋعا مۇمكىندىك جاسالادى»,-دەيدى الاكول اۋداندىق تكش ءبولىمىنىڭ باستىعى ماقسات جۇلقايناروۆ.
جوسپار ورىندالىپ جاتقانىمەن, اۋداندىق پروكۋراتۋرا جاسالعان جۇمىسقا قاتىستى تالاي زاڭسىزدىقتى انىقتاعان. ماسەلەن, اۋداندىق تۇرعىن ءۇي-كوممۋنالىق شارۋاشىلىعى ءبولىمىنىڭ بۇرىنعى باسشىسى ءۇشارال قالاسىنا سۋ قۇبىرىن جۇرگىزگەن «تەح مونتاج» مەردىگەر مەكەمەسىمەن سىبايلاسىپ, اتقارىلماعان اكتىلەرگە قول قويعان.
«سىبايلاس جەمقورلىققا قاتىستى قىلمىستىق ءىس انىقتالدى. اۋداندىق كوممۋنالدىق ءبولىمىنىڭ باسشىسى بوتاباەۆ دەگەن ازامات مەردىگەردىڭ جاسالماعان جۇمىسىن جاسالدى دەپ قابىلداۋ جونىندە اكت تولتىرعان. قازىرگى كەزدە بوتاباەۆ سوتتالدى»-دەيدى الاكول اۋدانىنىڭ پروكۋرورى ەرلان اڭداباەۆ.
باقىتبەك كەنەش ۇلى.
دەرەككوز: «24 kz»