ماڭعىستاۋدا دارىگەرلەردىڭ ۇستىنەن قىلمىستىق ءىس قوزعالدى

ماڭعىستاۋ وبلىستىق اۋرۋحاناسىنىڭ بىرنەشە دارىگەرىنە قاتىستى سوت وتىرىسى باستالدى. بۇل تۋرالى «استانا» تەلەارناسى حابارلادى.

2011 جىلى دانيار يماشەۆ جول اپاتىنا ءتۇسىپ, جەرگىلىكتى جەردەگى اۋرۋحاناعا تۇسەدى. العاشىندا دارىگەرلەر ءحالى اۋىر ەمەس ەكەنىن ايتىپ, اتا-اناسىنا وتا جاسالعان ۋاقىتتان كەيىن ءبىر اپتا ىشىندە دانياردىڭ ساۋىعىپ كەتەتىنىنە سەندىرگەن ەدى. الايدا, دانيار سول مەزگىلدە 7 ساعاتتان سوڭ كوز جۇمدى. قايعىلى قازانى دارىگەرلەر جۇرەك توقتاۋىمەن تۇسىندىرگەن بولاتىن. ال ساراپشىلار جاساعان قورىتىندىدا وكپەگە قان كەتكەندىگى كورسەتىلگەن. قاراما-قايشىلىقتىڭ اقيقاتىنا جەتۋ ءۇشىن دانياردىڭ اناسى سوتقا قايتادان ارىز جازدى. سونىمەن, ارادا 3 جىل وتكەندە بولعان ءىستى تياناقتى زەردەلەۋ ماقساتىمەن سوتقا انەستەزيولوگ, تراۆماتولوگ جانە حيرۋرگ شاقىرتىلىپ وتىر.

قۇقىق قورعاۋ قىزمەتكەرلەرىنىڭ ايتۋىنشا, ەگەر وسى جولى دارىگەرلەردىڭ سالعىرتتىعى انىقتالسا, ولار 2 جىلعا دەيىن باس بوستاندىعىنان ايرىلۋى مۇمكىن. «بالامنىڭ ولىمىنە قاتىستى قوزعالعان قىلمىستىق ءىس جوعالىپ كەتتى.مەديتسينالىق كارتا جانە باسقا دا قاجەتتى قۇجاتتاردى تابا المادىق. وسى ولقىلىقتى ىشكى ىستەر دەپارتامەنتى قولعا العاننان كەيىن عانا قايتادان ءىس سوتتتا قارالاتىن بولىپ ۇيعارىلدى. ەندى مەن ادىلدىك ورنايدى دەگەن سەنىمدەمىن»,-دەيدى مارقۇمنىڭ اناسى گۇلنار يماشەۆا.

باقىتبەك كەنەش ۇلى.

دەرەككوز: «استانا» تەلەارناسى