شىمكەنتتە ستاتسيونارلىق پوليتسيا بەكەتتەرى تاۋلىك بويى قىزمەت كورسەتۋدە, دەپ حابارلايدى Egemen.kz Polisia.kz سايتىنا سىلتەمە جاساپ.
شىمكەنت قالاسىنىڭ اۋماعىندا ازاماتتاردىڭ قاۋىپسىزدىگىن قامتاماسىز ەتۋ جانە قوعامدىق ءتارتىپتى ساقتاۋ ماقساتىندا ادامدار كوپ شوعىرلاناتىن جەرلەردە پوليتسيا دەپارتامەنتىنىڭ 15 ستاتسيونارلىق بەكەتى تاۋلىك بويى جۇمىس ىستەيدى. ءاربىر ستاتسيونارلىق بەكەتتە ءۇش اۋىسىممەن ەكى قىزمەتكەردەن كەزەكشىلىككە ءتۇسىپ, ءتارتىپتى قاداعالايدى.
ستاتسيونارلىق بەكەتتەردىڭ بارلىعى زاماناۋي تەحنيكامەن, اتاپ ايتقاندا ءپورتاتيۆتى بەينەتىركەۋىشتەرمەن, راديوستانتسيالارمەن جانە پلانشەتتەرمەن جابدىقتالعان.
«ستاتسيونارلىق بەكەتتەر 181 سىرتقى بەينەباقىلاۋ كامەراسىمەن جابدىقتالىپ, ولار پوليتسيا دەپارتامەنتىنىڭ جەدەل باسقارۋ ورتالىعىنا قوسىلعان. ولار جول قاۋىپسىزدىگىن قامتاماسىز ەتۋ, قوعامدىق ورىنداردا, كوشەلەردە قىلمىستىڭ الدىن الۋ بويىنشا قىزمەت اتقارادى. بيىل كامەرالاردىڭ كومەگىمەن 25 قىلمىس اشىلىپ, 47 602 اكىمشىلىك حاتتاما تولتىرىلدى», دەدى شىمكەنت قالاسىنىڭ پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى مۋحتار بۋحارباەۆ.
ستاتسيونارلىق بەكەتتەر ءىس جۇزىندە ءوز تيىمدىلىگىن كورسەتىپ وتىر. مىسالى, قوعامدىق ورىنداردا جاسالعان قىلمىستار سانى وتكەن جىلمەن سالىستىرعاندا 26,6 پايىزعا, ال كوشەلەردە جاسالاتىن قىلمىستار 21,5 پايىزعا تومەندەگەن. ازاماتتار ءوتىنىش, ارىز نەمەسە جەكە ماسەلەسىمەن كەز-كەلگەن ۋاقىتتا وسى بەكەتتەردە قىزمەت ەتەتىن قىزمەتكەرلەرگە جۇگىنىپ, ءتيىستى كومەك الا الادى.