ءالياداي قايسار ايگەرىم

بيىل «وڭتۇستىك» وڭىرلىك قولباس­شى­لىعىنىنىڭ «الەم جاۋىنگەرى» جانە «اسكەري مەديتسينالىق ەستافەتاسى» سايىستارىنىڭ ىرىكتەۋلەرىنەن 1-ورىن يەلەنىپ, «شەبەر» سايىسىنىڭ ۇزدىگى اتاندى.

بىرنەشە جىل قاتارىنان «دوستاستىق جاۋىنگەرى» دارەجەسىنە يە بولىپ, سەرجانتتار قۇرامى اراسىنداعى جارىستا جۇلدەلى ورىنداردى العان ايگەرىم قارۋلى كۇشتەر قاتارىندا وزىنە جۇكتەلگەن مىندەتتەردى ءمىنسىز ورىنداپ, اسكەري ماماندىقتى تابىستى مەڭگەرىپ ءجۇر. اسكەري بورىشىن ەرلەرمەن قاتار ورىنداپ, ەل ىرگەسىنە بەرىك قورعان بولا الاتىن, وتباسى قۇندىلىقتارىن تۋ ەتەتىن بىلىكتى اسكەري قىزمەتكەرلەر ساناتىندا جۇرگەن كىشى سەرجانت ايگەرىم قاليەۆا شىمكەنت گارنيزونىنداعى اسكەري بولىمدە كەلىسىمشارت بويىنشا قىزمەت ەتەدى. تۇركىستان وبلىسى ورداباسى اۋدانىنىڭ تۋماسى. شىمكەنت قالاسىنداعى قازاقستان حالىقتار دوستىعى ۋنيۆەرسيتەتىنىڭ «راديو­تەح­نيكا, ەلەكترونيكا جانە تەلەكوممۋنيكاتسيا» ماماندىعى بويىنشا ءبىلىم العان ايگەرىم 2014 جىلى اسكەر قاتارىنا شا­قىر­تى­لىپ, ارىس قالاسىنىڭ اسكەري بولىمىنە اتىستى قولداۋ روتاسىنداعى «مەرگەن» لاۋازىمىنان قىزمەتىن باستاعان. قازىرگى تاڭدا 35748 اسكەري بولىمىندەگى موتواتقىشتار باتالونىندا اسكەري قىزمەتىن اتقارىپ ءجۇر. ايگەرىمنىڭ قىزمەت بارىسىنداعى اتقارعان ىستەرى مەن جەتكەن جەتىستىكتەرىن ارىپتەستەرى دە ماقتان ەتەدى.

– ايگەرىم اسكەري ءومىردىڭ قيىنشىلىعى مەن تەمىردەي تارتىبىنە ءتوزىپ, ەر-ازاماتتارمەن تەڭ دەڭگەيدە قىزمەت اتقارۋدا. ول ءوزىنىڭ ءتارتىبى مەن قويىلعان تاپسىرمالاردى ۋاقتىلى ورىنداۋدا ارىپتەستەرىنە ۇلگى. مىنەزى ۇلى وتان سوعىسىندا ەلى ءۇشىن جانىن قيعان مانشۇك, ءاليا جانە حيۋاز اپالارىمىز سەكىلدى – قايسار. باتىرلىق, ەرجۇرەكتىلىك جانە وتانعا دەگەن سۇيىسپەنشىلىگىن ىسپەن دالەلدەپ جۇرگەن ارۋلارىمىزدىڭ ءبىرى. جاۋىنگەرلىك دايارلىق ساباقتارىندا ارقاشان ءوزىن جوعارى دەڭگەيدەن كورسەتەدى. وسىنداي باتىر ارۋىمىز ارامىزدا قىزمەت اتقاراتىنىن ماقتان ەتەمىز, – دەيدى باتالون سەرجانتى عالىمجان باتەشوۆ.

شىمكەنت