كورونوۆيرۋس ينفەكتسياسىمەن كۇرەسكە اتسالىسقان 100 مەديتسينا قىزمەتكەرىنە اقمولا وبلىسى, بۋرابايدا ورنالاسقان ششۋچينسك دەمالىس ورنىنا تەگىن جولداما بەرىلدى. سونداي-اق, كاسىپوداق ۇيىمدارىنىڭ مۇشەلەرىنە 30 پايىزدىق جەڭىلدىكپەن دەمالىس ورىندارىنا جولداما قاراستىرىلدى. بۇل تۋرالى وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا وبلىستىق كاسىپوداقتار ورتالىعىنىڭ توراعاسى سەرىك سەرماعامبەتوۆ مالىمدەدى.
توتەنشە جاعداي جاريالانعان ناۋرىز ايىنان باستاپ وبلىستاعى كاسىپوداق ۇيىمدارىمەن بارلىعى 37 453 500 تەڭگە قاراجات قولداۋ شارالارىنا جۇمسالدى. ونىڭ ىشىندە 28 ميلليون 851 مىڭ قاراجاتقا قايىرىمدىلىق كومەك كورسەتىلسە, 8 ميلليون 602 مىڭ قاراجات كاسىپوداق ۇيىم مۇشەلەرىنە بەتپەردە, انتيسەپتيك سەكىلدى قورعانىش قۇرالدارى الىندى. پاندەمياعا بايلانىستى وبلىستىق كاسىپوداقتاردىڭ ارنايى شتابى قۇرىلدى. ەڭبەك ۇجىمدارىنداعى احۋالعا قاتىستى كۇندەلىكتى مونيتورينگ جۇرگىزدى.
– وزدەرىڭىز بىلەسىزدەر, كارانتين تالاپتارى كۇشەيتىلگەن تۇستا كوپشىلىگى قاشىقتىقتان جۇمىس جاسادى. جۇمىسشىلاردىڭ اقىلى, اقىسىز دەمالىسقا شىعۋى, قاشىقتىقتان جۇمىس جاساۋى, ەڭبەككە جارامسىزدىق تۋرالى شۇعىل اقپاراتتار جيناقتادىق. ءتۇرلى ماسەلەلەر تۋىندادى. ۆاحتالىق جۇمىسكەرلەردىڭ جۇمىس رەجيمدەرى, ولاردىڭ تەستتەن ءوتۋى, جۇمىسقا بارماعان جۇمىسكەرلەردىڭ جالاقىسى ساقتالۋى, قالاداعى ۇزدىكسىز جۇمىس جاسايتىن ستراتەگيالىق ماڭىزى بار جۇمىس ورىندارىنىڭ, مەديتسينا مەكەمەلەرى جۇمىسكەرلەرىنىڭ جۇمىسقا قاتىناۋى. كەمشىلىكتەردى دەر كەزىندە انىقتاپ, قالىپقا كەلتىرۋىنە اتسالىستىق. ارنايى قىزۋ جەلىسىن ىسكە قوستىق. بۇگىنگە دەيىن 886 حابارلاما ءتۇسىپ, بارلىعىنا جاۋاپ بەرىلدى, - دەدى وبلىستىق كاسىپوداقتار ورتالىعىنىڭ توراعاسى سەرىك سەرماعامبەتوۆ.