تۇڭعىش پرەزيدەنت كۇنى نۇر-سۇلتان قالاسىندا «نۇرلى جەر» مەملەكەتتىك كوممۋنالدىق قۇرىلىس باعدارلاماسى جانە قازاقستان يپوتەكالىق كومپانياسى مەن ەلوردا اكىمدىگى اراسىندا قول قويىلعان كەلىسىم اياسىندا جاڭا پاتەرلەردىڭ كىلتتەرىن تاپسىرۋ سالتاناتتى ءراسىمى ءوتتى. ءىس-شاراعا قالا اكىمى التاي كولگىنوۆ جانە «قازاقستان يپوتەكالىق كومپانياسى» يپوتەكالىق ۇيىمى» اق باسقارما توراعاسى ءادىل مۇحامەدجانوۆ قاتىستى.
ءبىر بولمەلى 106 پاتەردەن تۇراتىن ون ەكى قاباتتى جاڭا ءۇي تىلەنديەۆ داڭعىلىنان وڭتۇستىككە قاراي, سارىبۇلاق وزەنىنىڭ بويىندا, ش.قوسشىعۇل ۇلى كوشەسىندە ورنالاسقان. بارلىق پاتەر كەزەكتە تۇرعاندارعا تازا ارلەنگەن جانە قونىستانۋعا دايىن كۇيىندە بەرىلەدى. جالعا الۋ قۇنى 1 شارشى مەتر ءۇشىن ايىنا 1 455 تەڭگەنى قۇرايدى. پاتەر العانداردىڭ اراسىندا دارىگەرلەر, مەدبيكەلەر, عىلىمي قىزمەتكەرلەر, زەرتحاناشىلار, وقىتۋشىلار, تاربيەشىلەر, الەۋمەتتىك قىزمەتكەرلەر, پوليتسيا جانە تجد قىزمەتكەرلەرى, سونداي-اق نۇر-سۇلتان قالاسى توتەنشە جاعدايلار دەپارتامەنتىنىڭ ءورت ءسوندىرۋ جانە اپاتتىق قۇتقارۋ جۇمىستارى قىزمەتىنىڭ قۇتقارۋشىلارى مەن قىزمەتكەرلەرى بار.
«تۇڭعىش پرەزيدەنت نۇرسۇلتان نازارباەۆتىڭ الەۋمەتتىك باستامالارىن ىسكە اسىرۋدىڭ ناتيجەسىندە ەلىمىزدىڭ كوپتەگەن ازاماتى جەڭىلدىكتى شارتتارمەن تۇرعىن ءۇي الۋدا. وسى جىلدىڭ جازىندا ءبىزدىڭ كومپانيا مەن نۇر-سۇلتان قالاسىنىڭ اكىمدىگى اراسىندا دەنساۋلىق ساقتاۋ, ءبىلىم بەرۋ قىزمەتكەرلەرى, مادەنيەت جانە سپورت قايراتكەرلەرى, سونداي-اق پوليتسيا جانە تجد قىزمەتكەرلەرى قاتارىنان جەرگىلىكتى اتقارۋشى ورگاندا كەزەكتە تۇرعاندارعا «نۇرلى جەر» باعدارلاماسى بويىنشا كەيىننەن ساتىپ الۋ قۇقىعىمەن تۇرعىن ءۇي بەرۋ تۋرالى كەلىسىمگە قول قويىلدى. وسى الەۋمەتتىك ماڭىزى بار جوبانى ىسكە اسىرۋعا ءبىز كوپ جىلدىق تاجىريبەمىزدى ەسكەرە وتىرىپ كىرىستىك. بۇگىن ءبىز وتە ماڭىزدى, اسىرەسە وسىنداي قيىن ۋاقىتتا, الەۋمەتتىك سالا وكىلدەرىنە كىلتتەرىن تابىستايمىز», دەدى «قازاقستان يپوتەكالىق كومپانياسى» يۇ» اق باسقارما توراعاسى ءادىل مۇحامەدجانوۆ.
بەرىلەتىن پاتەرلەردىڭ اۋدانى 37-دەن 53 شارشى مەترگە دەيىن. جالداۋ مەرزىمى – 20 جىل. جالداۋ مەرزىمى اياقتالعاننان كەيىن پاتەرلەر تۇرعىنداردىڭ مەنشىگىنە وتەدى. مەرزىمىنەن بۇرىن وتەۋگە موراتوري جوق, جالعا الۋشىلار تۇرعىن ءۇيدى قالدىق قۇنى بويىنشا كەز كەلگەن ۋاقىتتا ساتىپ الا الادى.
«تۇڭعىش پرەزيدەنت كۇنى قالا تۇرعىندارىنىڭ تاعى ءبىر بولىگى ءوز پاتەرلەرىندە قونىس تويىن تويلايدى. بۇگىن مۇعالىمدەر, مەديتسينا قىزمەتكەرلەرى, تجد, جپ قىزمەتكەرلەرى, الەۋمەتتىك قىزمەتكەرلەر, مادەنيەت جانە سپورت قايراتكەرلەرى باسپانالارىنا كىردى. اتالعان پاتەرلەر قازاقستان يپوتەكالىق كومپانياسىمەن بىرگە, جىلدار بويى باسپانانى كۇتىپ, كەزەكتە تۇرعان تۇلعالارعا ساتىلدى. وسى باعدارلاما بويىنشا مىڭعا جۋىق پاتەر جوسپارلانعان. 350-دەن استامى تاراتىلدى, بۇگىن 100-دەن استام وتباسى باسپانالارىنا كىردى», دەدى ەلوردا اكىمى التاي كولگىنوۆ.