سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2020 جىلعى 3 جەلتوقساندا وتەتىن سەنات وتىرىسىنىڭ كۇن ءتارتىبىن تالقىلادى, دەپ حابارلايدى Egemen.kz.
پالاتانىڭ جالپى وتىرىسىندا قازاقستان رەسپۋبليكاسى جوعارعى سوتىنىڭ سۋديالارىن سايلاۋ جانە قىزمەتىنەن بوساتۋ ماسەلەسى قارالادى. سونداي-اق سەناتورلار ءماجىلىس ماقۇلداعان «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەرسونال بەرۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن قارايدى.
سونىمەن قاتار بيۋرودا ماجىلىستەن كەلىپ تۇسكەن زاڭ جوبالارى تۇراقتى كوميتەتتەرگە ءبولىنىپ بەرىلدى.
ودان بولەك, دەپۋتاتتار «جاڭا جاعدايداعى ەكونوميكالىق دامۋ: قازاقستان شاعىن جانە ورتا كاسىپكەرلىكتى قولداۋ جانە دامىتۋ سالاسىنداعى مەملەكەتتىك ساياساتتى جانە قۇقىقتىق رەتتەۋدى جەتىلدىرۋ» تاقىرىبىنا ارنالعان پارلامەنتتىك تىڭداۋعا دايىندىق بارىسىن پىسىقتادى. اتالعان ءىس-شارا 2020 جىلعى 4 جەلتوقساندا وتەدى.