كومانديرلەرگە جان-جاقتى كومەك كورسەتۋ جانە اسكەري قىزمەتشىلەردى تاربيەلەۋدى جەتىلدىرۋ ءۇشىن شىمكەنت گارنيزونىندا سەرجانتتار كەڭەسىنىڭ وتىرىسى ءوتتى, وعان باتالوندار, روتالار, ۆزۆودتار مەن بولىمشەلەر سەرجانتتارى قاتىستى, دەپ حابارلايدى Egemen.kz.
كەزدەسۋ بارىسىندا قىزمەتتىك جۇمىستى جەتىلدىرۋ جانە سەرجانتتاردىڭ جالپى مادەنيەتىن ارتتىرۋ, جوعارى ادامگەرشىلىك قاسيەتتەرىن تاربيەلەۋ جانە كومانديرلەرگە قۇرمەتپەن قاراۋ, سونداي-اق لاۋازىمدا جوعارىلاتۋ ءۇشىن كانديداتتاردى قاراۋ سياقتى ماسەلەلەر قارالدى.
وتىرىس بارىسىندا جاۋىنگەرلىك دايارلىق ساپاسىن ارتتىرۋ, اسكەري ءتارتىپتى نىعايتۋ جانە اسكەرلەر قىزمەتىن ۇيىمداستىرۋ, وفيتسەرلەرگە جەكە قۇرامدى وقىتۋ مەن تاربيەلەۋدە جان-جاقتى كومەك كورسەتۋ تاقىرىبى قوزعالدى.
3-سىنىپتى سەرجانت اسحات يساەۆ پەن اعا سەرجانت ورىنباسار كوشەرباەۆتى جاۋىنگەرلىك دايارلىق پاندەرى بويىنشا جانە جەكە قۇرامدى وقىتۋدا قول جەتكىزگەن تابىستارى ءۇشىن اشىق جانە جولداستىق سىن جاعدايىندا كەڭەستىڭ بارلىق قاتىسىپ وتىرعان مۇشەلەرىنىڭ اشىق داۋىس بەرۋى ارقىلى بىراۋىزدىق شەشىمىمەن «باتالون سەرجانتى» جوعارى تۇرعان لاۋازىمدارىنا ۇسىنىلدى.
ايتا كەتۋ كەرەك, سەرجانتتار كەڭەسىنىڭ شەشىمى ۇسىنىمدىق سيپاتتا بولادى جانە اسكەري ءبولىم كومانديرىنىڭ, سونداي-اق جوعارى تۇرعان كەڭەس توراعاسىنىڭ شەشىمىنە شىعارىلادى.