"تۇڭعىش پرەزيدەنت كۇنى" مەرەكەسىنە ارنالعان سالتاناتتى جيىن ءوتتى

مەرەكەلىك ءىس-شارادا ەلىمىزدىڭ كەڭ بايتاق دالاسى, سۇلۋ تابيعاتى, نۇر-سۇلتان مەن شىمكەنت قالالارىنداعى ەلباسى اشقان كورىكتى جەرلەر مەن عيماراتتار, شىمكەنتتىڭ ءۇشىنشى مەگاپوليس اتانۋ تاريحى جايىندا بەينە روليك كورسەتىلدى.

شىمكەنت قالاسىنىڭ اكىمى مۇرات ايتەنوۆ سالتاناتتى جيىندا كوپشىلىكتى مەرەكەمەن قۇتتىقتاپ, مەرەكەنىڭ ءمان-ماڭىزىنا توقتالدى.

– سىزدەردى 1 جەلتوقسان – قازاقستان رەسپۋبليكاسىنىڭ تۇڭعىش پرەزيدەنتى كۇنىمەن شىن جۇرەكتەن قۇتتىقتايمىن! بۇل بارشا قازاقستاندىقتار ءۇشىن شىن مانىندەگى جالپىۇلتتىق مەرەكەگە اينالدى. بۇل ايتۋلى مەرەكەنىڭ ءمانى زور, ماڭىزى ەرەكشە. ولاي بولاتىنى, بۇل بابالار ارمانى – تاۋەلسىزدىككە جول اشقان اقجولتاي كۇن. وسىدان 29 جىل بۇرىن, ياعني 1991 جىلدىڭ 1 جەلتوقسانىندا ەلىمىز العاش رەت بۇكىلحالىقتىق سايلاۋ نەگىزىندە ءوزىنىڭ تۇڭعىش پرەزيدەنتىن سايلاعان بولاتىن. وسىلايشا پرەزيدەنتتىك ينستيتۋتتى ەنگىزۋ ارقىلى قازاق مەملەكەتى ءوز تاريحىنداعى جاڭا داۋىرگە قادام باستى. تاۋەلسىزدىگىن جاريالاپ, دەربەس ەل بولدى. مىنە, سودان بەرى ەلىمىزدىڭ تۇڭعىش پرەزيدەنتى, ەلباسى نۇرسۇلتان نازارباەۆتىڭ باسشىلىعىمەن قىسقا مەرزىمدە ءبىر عاسىرعا بەگىسىز جولدى ءجۇرىپ ءوتىپ, الەمدە وزىندىك ورنى بار ىرگەلى ەلگە اينالدىق.

ەلباسى حالىق بيلىگى مەن تاۋەلسىزدىك قاعيداتتارىنىڭ سيمۆولى ءارى كەپىلى. بۇكىل الەم مويىنداعان جاھاندىق بىتىمگەرلىك باستامالارىنىڭ اۆتورى. وڭتۇستىكتىڭ قاقپاسى ىسپەتتەس شىمكەنتكە رەسپۋبليكالىق ماڭىزى بار قالا مارتەبەسىن بەرىپ, ەلىمىزدە ميلليوننان استام تۇرعىنى بار جاڭا مەگاپوليستىڭ پايدا بولۋىنا جول اشتى. ەلباسىنىڭ وسى شەشىمىنىڭ ارقاسىندا سۇيىكتى قالامىز شىمكەنت ەكى جىلدىڭ ىشىندە شىرايى كىرىپ, شىنايى وركەندەۋگە بەت الدى. قىسقا مەرزىم ىشىندە قىرۋار شارۋالار اتقارىلدى. ەكونوميكاسى نىعايدى, الەۋەتتى ارتتى. ەلباسىنىڭ كورەگەندىگىنە شاھارىمىزدىڭ قازىرگى دامۋ بارىسى ايقىن دالەل, – دەدى قالا اكىمى. ءىس-شارا ودان ءارى قاراي تاۋەلسىزدىك جولىنداعى بابالاردىڭ كۇرەسىن بۇگىنگى جارقىن كۇنمەن ۇشتاستىراتىن « ۇلى دالا اماناتى» تەاترلاندىرىلعان كورىنىسىمەن جالعاستى.

سونداي-اق مەرەكەلىك جيىندا ج.شانين اتىنداعى شىمكەنت قالالىق اكادەميالىق قازاق دراما تەاترىنىڭ اكتەرلەرى, شىمكەنت قالالىق وپەرا جانە بالەت تەاترىنىڭ سوليستەرى, «قازىنا» بي ءانسامبلى جانە «شىمكەنت قالالىق مادەنيەت ءۇيى» كونتسەرتتىك ۇيىمىنىڭ انشىلەرى ونەر كورسەتتى.