وت جاعىپ, كۇل شىعارعىسى كەلمەيتىن تۇرعىنداردىڭ قۋانىشىندا شەك جوق. وبلىس اكىمى قۇمار اقساقالوۆ قىزىلجار اۋدانىنىڭ ورتالىعى بەسكول سەلوسىنا جۇمىس ساپارىمەن بارعاندا وسىنداي ۇيلەردىڭ يەلەرىن ورتالىق قازاندىققا قوسىلۋلارىمەن قۇتتىقتادى, دەپ حابارلايدى Egemen.kz.
سونىڭ ىشىندە بەسكول سەلاسىنىڭ تۇرعىنى ولگا سكلياروۆانىڭ ۇيىنە كىرىپ, جىلۋدىڭ ورتالىقتاندىرىلعانىن ءوز كوزىمەن كورىپ, الەۋمەتتىك جەلىدەگى پاراقشاسىنا بىلاي دەپ جازدى: «مەن ءۇي يەسىنىڭ قاتتى قۋانىپ وتىرعانىن كوردىم. ەندى ولگا ۆالەنتينوۆنا وتىن, كومىر ساتىپ المايدى, وت جاعۋمەن ۋاقىتىن وتكىزبەيدى. وسىنىڭ ءوزى ول كىسىنىڭ وتباسىلىق بيۋدجەتىنە اجەپتاۋىر كىرىس كەلتىرىپ تۇر. ونىڭ ۇستىنە ءۇي جىلى ءارى تازا».
جالپى, سوڭعى ەكى جىلدا وسى بەسكول سەلوسىنداعى 85 ءۇيدىڭ 56 ورتالىق قازاندىققا قوسىلعان. قالعاندارى ۇيىنە جىلۋدى 2021 جىلى وتكىزەدى. سونىمەن قاتار وسى ەلدىمەكەندەگى 20 الەۋمەتتىك نىسان, 20 جەكەمەنشىك ءۇي مەن 4 دۇكەن ورتالىق قازاندىققا قوسىلىپ, ءبىر جەردەن جىلىتىلادى. الداعى ۋاقىتتا مۇنداعى وڭتۇستىك-شىعىس مولتەكاۋدانىندا جاڭادان ەكىنشى جىلۋ جۇيەلەرىنىڭ ورتالىعى سالىنباقشى. ول جىلۋمەن 100-دەن ارتىق ءۇيدى قامتاماسىز ەتەتىن بولادى.
كوپقاباتتى ۇيلەردىڭ ورتالىق جىلۋ جۇيەلەرىنە قوسىلۋلارى بەسكول عانا ەمەس, سەرگەەۆ, ياۆلەنكا سەلولارىندا دا قاراستىرىلىپ وتىر. ازىرگە سوڭعىلارىندا 1 ءۇي قوسىلدى. سونىمەن بارلىعى 57 ءۇي ورتالىقتاندىرىلعان جىلۋعا قول جەتكىزدى. بۇل بارلىعى 2,1 مىڭ تۇرعىن ورتالىقتاندىرىلعان جىلۋ جۇيەسىنە قول جەتكىزدى دەگەن ءسوز.
سولتۇستىك قازاقستان وبلىسى