تۇڭعىش پرەزيدەنت كۇنى اياسىندا Yessenov University-دە 6 جاڭا سپورتتىق اشىق الاڭدارىنىڭ سالتاناتتى اشىلۋ ءراسىمى ءوتتى. اتالعان شاراعا اقتاۋ قالاسىنىڭ اكىمى نۇرداۋلەت قيلىباي مەن وليمپيادا ويىندارىنىڭ ەكى دۇركىن كۇمىس جۇلدەگەرى, اتالعان ۋنيۆەرسيتەتتىڭ تۇلەگى, ماڭعىستاۋلىق بوكسشى ادىلبەك نيازىمبەتوۆ قاتىسىپ, الاڭنىڭ لەنتاسىن قيدى. قالا اكىمى فۋتبول دوبىنا اۆتوگراف جازىپ, ءبىلىم ورداسىنا ەستەلىككە قالدىردى, دەپ حابارلايدى Egemen.kz.
الاڭنىن جالپى اۋماعى 4880 شارشى مەتردى قۇرايدى جانە الاڭدا 2 فۋتبول الاڭى, 2 تەننيس كورتى, 1 باسكەتبول, 1 ۆوللەيبول الاڭى جاساقتالعان. اشىق الاڭ 6 اي ۋاقىت ىشىندە سالىنعان بولاتىن.
-بۇگىن تۇڭعىش پرەزيدەنت كۇنىنە وراي ۋنيۆەرسيتەتىمىزدە جاڭا الاڭدار اشىلىپ جاتىر. ەلباسىمىزدىڭ دەنى ساۋ, باسەكەگە قابىلەتتى ۇلت قالىپتاستىرۋداعى وي-پىكىرلەرىن جاقسى بىلەسىزدەر. ال ۋنيۆەرسيتەتىمىزدە سپورت ماماندىعى بويىنشا مىڭعا جۋىق ستۋدەنت ءبىلىم الادى. سول سەبەپتى ەلباسى الدىمىزعا قويعان تاپسىرمالاردى ورىنداۋمەن بىرگە, ستۋدەنتتەرىمىزدىڭ تاجىريبەسىن ارتتىرۋ ءۇشىن مۇمكىندىك جاساپ وتىرمىز, دەيدى ۋنيۆەرسيتەت رەكتورى بەرىك باقىتجان ۇلى احمەتوۆ.