كەيىنگى جىلدارى الەمدىك سپورت جۇلدىزدارى شوۋ باسەكەلەرىن ۇيىمداستىرۋدى داستۇرگە اينالدىردى. بۇرىندارى تەك اتاقتى فۋتبولشىلار كارەراسىن اياقتاۋ ماقساتىندا ارىپتەستەرىمەن دوستىق ويىندارىن وتكىزىپ جۇرسە, ەندى بۇل قاتارعا كاسىپقوي بوكسشىلار دا قوسىلدى. ماسەلەن, 2017 جىلى كىشى امەريكالىق فلويد مەيۆەزەر مەن ارالاس جەكپە-جەك شەبەرى كونور ماكگرەگور جانكۇيەرلەرگە شوۋ ۇيىمداستىرعان بولاتىن.
كۇنى كەشە مۇنداي شوۋدىڭ وزىق ۇلگىسىن كەزىندە كاسىپقوي بوكستىڭ شوقجۇلدىزى اتانعان مايك تايسون مەن كىشى روي دجونس كورسەتتى. اۋەلگى جوسپار بويىنشا قىركۇيەكتە جۇدىرىقتاسۋى ءتيىس بولعان قوس الىپ جانكۇيەرلەردىڭ قىزىعۋشىلىعىن وياتۋ ماقساتىندا جەكپە-جەك مەرزىمىن ەكى اي كەيىنگە شەگەرگەن بولاتىن. راسىمەن, بۇل جوسپارلارى جۇزەگە اسىپ, جەكپە-جەكتى كۇتكەن الەم جانكۇيەرلەرى بىلاي تۇرسىن, قازاقستاندىقتاردىڭ دا قاراسى قالىڭ بولدى. ونى الەۋمەتتىك جەلىدەگى جازبالاردان دا انىق اڭعاراسىڭ.
سونىمەن جەكپە-جەك الاقانىن ىسقىلاپ, تاعاتسىزدانا كۇتكەن بوكسسۇيەر قاۋىمنىڭ كوڭىلىنەن شىقتى ما؟ بۇعان ء«يا» نەمەسە «جوق» دەپ ءۇزىلدى-كەسىلدى ءدال باعاسىن بەرە المايمىز. ويتكەنى جانكۇيەرلەر ەكى بوكسشى دا ءوز داۋىرىندەگىدەي قولدى-اياققا تۇرماي جۇلقىنىپ تۇراتىن قارقىن بولمايتىنىن, ەكەۋىندە دە قارسىلاسىن نوكاۋتقا جىبەرەردەي جويقىن سوققى جوق ەكەنىن ءاۋ باستا-اق ءبىلدى. تەك 50-دەن اسقان بوكسشىلاردىڭ قازىرگى جاعدايى, موسقال تارتقان شاعىندا ءبىزدى قانداي ارەكەتتەرىمەن تاڭعالدىرادى ەكەن دەگەن قىزىعۋشىلىق بولعانى راس.
ءسويتىپ ەكى مينۋتتان 8 راۋندقا جوسپارلاعان ايقاستا جەڭىمپازدىڭ ەسىمى انىقتالمادى. تورەشىلەر ەكەۋىن دە رەنجىتپەيىن دەدى مە, ايتەۋىر جەكپە-جەكتىڭ تەڭ اياقتالعانىن مالىمدەدى. دەيتۇرعانمەن, ءبىزدىڭ كوزىمىزگە مايك تايسون باسىمىراق ءارى ءدوپ سوققىنى كوپ جۇمساعانداي كورىندى. العاشقى ەكى راۋندتا بەلسەندى بولعان روي دجونس كەيىنگى ءتورت راۋندتا ۇزاق ۋاقىت كەزدەسپەگەن دوستارداي تايسوندى قۇشاقتاي بەرگەنى جەكپە-جەكتىڭ شىرايىن كەتىرگەندەي اسەر قالدىردى. وسىلايشا رينگتە 16 مينۋت ونەر كورسەتكەن ەكى بوكسشى 1 ميلليون دوللار تابىس تاپتى. ايتا كەتەيىك, مايك تايسون ەڭ كەيىنگى جەكپە-جەگىن 2015 جىلى وتكىزگەن بولسا, روي دجونس ەكى جىل بۇرىن عانا شارشى الاڭعا شىققان ەدى.