الماتىداعى "دوستىق" سپورت كەشەنىندە گرەك-ريم كۇرەسىنەن وتكەن قازاقستان چەمپيوناتىندا 77 كيلو سالماقتا "ناعىز جان الىسىپ, جان بەرىسكەن" باسەكەلەردىڭ كۋاسى بولدىق, دەپ حابارلايدى Egemen.kz.
77 كيلو سالماقتا باس جۇلدە ءۇشىن تارتىس الماتى وبلىسىنىڭ قوس ساڭلاعى – اسحات دىلمۇحامەدوۆ پەن دەمەۋ جادىراەۆتىڭ اراسىندا ءوتتى. بۇل باسەكەنى بارشا ماماندار تاپجىلماي تاماشالادى. ءبىراز جىلدان بەرى وسى سالماقتىڭ تىزگىنى اسحاتتىڭ قولىندا. ونىڭ ازيا چەمپيونى جانە سول جارىستىڭ ءۇش دۇركىن جۇلدەگەرى دەگەن اتاقتارى بار. الەمدىك دودالاردا دىلمۇحامەدوۆ جەڭىس تۇعىرىنا سىنىق سۇيەم قالعاندا عانا ءسۇرىنىپ ءجۇر.
دەمەۋ 2017 جىلى پاريجدە وتكەن الەم چەمپيوناتىنىڭ كۇمىس جۇلدەگەرى. قۇرلىقتىڭ باستى دوداسىندا ەكى رەت جەڭىس تۇعىرىنا كوتەرىلدى. بىراق بۇل اتاقتارعا ول ءسال جەڭىل سالماقتاردا قول جەتكىزدى.
سوعان قاراماستان جادىراەۆ الماتىداعى جارىستا ءوزىن جاقسى قىرىنان كورسەتتى. فينالدا اسحاتتان 7:3 ەسەبىمەن ايلاسىن اسىرعان دەمەۋ ەل چەمپيونى اتاندى. ازيا چەمپيوندارى ماكسات ەرەجەپوۆ پەن تەمىرلان شادۋكاەۆ قولا مەدالدى قورجىندارىنا سالدى.