ەكىنشى توقسان دا ونلاين رەجىمدە وتەدى

بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىسى ءبىلىم باسقارماسىنىڭ باسشىسى اسقار  سەيداليەۆ ءمالىم ەتتى.

بۇگىنگى تاڭدا 311 مەكتەپكە دەيىنگى ۇيىمدا 36 540 بالا  تىركەلگەن. شتاتتىق رەجيمدە جۇمىس ىستەيتىن بالاباقشالاردا بارلىعى 2770 پەداگوگ جانە 3121 تەحنيكالىق قىزمەتكەر جۇمىس ىستەيدى.

-بالاباقشالاردا سانيتارلىق-ەپيدەميولوگيالىق, دەزينفەكتسيالىق جۇمىستار تالاپقا ساي جۇرگىزىلەدى. بۇل ورايدا, باسقارما تاراپىنان بارلىق بالاباقشالارداعى سانيتارلىق تالاپتاردى كۇشەيتۋ جونىندە تاپسىرمالار بەرىلدى,دەدى اسقار سەيداليەۆ.

ايتا كەتەيىك, ءبىرىنشى توقساندا 156 مەكتەپتە 158 673 وقۋشى  (141 كۇندىزگى مەكتەپتە 156655,  10 جەكەمەنشىك – 1378, 6 كەشكى – 694), مەكتەپالدى دايارلىق سىنىبىندا 9330 بالا وقىدى. جاڭا  وقۋ جىلىندا 1 سىنىپقا 18 601 بالا قابىلداندى. قاراقيا اۋدانى, اققۇدىق ورتا مەكتەبىندەگى 27 وقۋشى شتاتتىق رەجيمدە وقىدى.

ءى توقساندا 128 مەكتەپتە تەك 1 سىنىپتار ءۇشىن كەزەكشى سىنىپتار اشىلىپ, وندا 1 سىنىپ وقۋشىلارىنىڭ جالپى كونتينگەنتىنىڭ 83% وقىدى (15 295 وقۋشى). قالعان وقۋشىلار اتا-انالارىنىڭ قالاۋىمەن ءۇي جاعدايىندا قاشىقتىقتان وقىتىلدى.

قاشىقتىقتان وقيتىن 2-11 سىنىپ وقۋشىلارى ءۇشىن mektep.edu.kz پلاتفورماسى قولدانىلدى جانە ولار  darynonline.kz, bilimland.kz, edupage.kz تسيفرلى ءبىلىم بەرۋ رەسۋرستارىن كونتەنت-رەسۋرس رەتىندە پايدالاندى.  

وقۋ جىلى باستالعاننان بەرى كوروناۆيرۋس ينفەكتسياسىمەن وبلىس مەكتەپتەرىنىڭ 8وقۋشىسىنىڭ جانە 1 مۇعالىمنىڭ اۋىرعانى انىقتالدى. قازىرگى كەزدە ولاردى وقشاۋلاۋ شارالارى الىندى, وتباسى مۇشەلەرى كارانتين رەجيمىنە كوشىرىلدى. كەزەكشى سىنىپتار وقيتىن ءبىلىم بەرۋ مەكەمەلەرىنە  قاتاڭ سانيتارلىق-ەپيدەميولوگيالىق تالاپتاردى ساقتاۋ بويىنشا جۇمىستار كۇندەلىكتى باقىلاۋدا.

قازىرگى كەزدە 1 سىنىپتارداعى 15295 (83%) وقۋشى ءاربىر سىنىپتا 15 بالادان اسپايتىن كابينەتتە, ارا قاشىقتىقتى ساقتاۋ جانە كۇندەلىكتى تەرمومەتريا جاساۋ ارقىلى ۇيىمداستىرىلعان 138 (128 مەملەكەتتىك مەكتەپتىڭ, 10 جەكەمەنشىك مەكتەپتىڭ) كەزەكشى سىنىپتا وقيدى. ال, قالعان 2-11 سىنىپتاردىڭ وقۋشىلارى قاشىقتىقتان وقىتۋدى جالعاستىرادى.

قاراقيا اۋدانى اققۇدىق ورتا مەكتەبى (شاعىن جيناقتى مەكتەپ) شتاتتىق رەجيمدە وقىتىلا بەرەدى. سپيكەردىڭ ايتۋىنشا, قاشىقتىقتان وقىتۋدى قامتاماسىز ەتۋ ماقساتىندا جەرگىلىكتى بيۋدجەت ەسەبىنەن 8100 كومپيۋتەر, رەسپۋبليكالىق بيۋدجەتتەن     22 541 كومپيۋتەر ساتىپ الىنىپ, قاجەت وقۋشىلارعا تاراتىلىپ بەرىلدى.

​-تەحنيكالىق جانە كاسىپتىك ءبىلىم بەرۋ ۇيىمدارى تولىقتاي قاشىقتىقتان وقىتۋدى جالعاستىرۋدا. تجكب ۇيىمدارى  وقۋ پروتسەسىندە kollege.edu.kz ءبىلىم بەرۋ پلاتفورماسىن قولدانادى. سونىمەن قاتار, كوللەدج ستۋدەنتتەرى مەن وقىتۋشىلارى قر بجعم قاراستى «كاسىپقور» حولدينگى رەسمي سايتىنىڭ, وبلىستىق وقۋ-ادىستەمەلىك كابينەتىنىڭ Google DISK وقىتۋ ماتەريالدارىن جانە وقىتۋشىلاردىڭ اۆتورلىق باعدارلامالارىن  پايدالانادى, دەدى ا. سەيداليەۆ.  

ماڭعىستاۋ وبلىسى

​