بۇگىن قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ازاماتتاردى قابىلدادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ونلاين-كەزدەسۋدە ءتۇرلى ءوڭىر تۇرعىندارى مينيسترگە قورشاعان ورتانىڭ لستانۋى, بالىق شارۋاشىلىعىنىڭ دامۋىنداعى كەدەرگىلەر جانە قالدىقتاردى سۇرىپتاۋ, ەكولوگيالىق ءبىلىم ماسەلەلەرى بويىنشا سۇراقتار قويدى.
"تۇرعىنداردىڭ بەلسەندى ازاماتتىق پوزيتسياسى وتە ماڭىزدى. تابيعي رەسۋرستاردى قورعاۋ جۇمىسىنا جالاقى الاتىن ينسپەكتورلار مەن قورىقشىلاردىڭ عانا ەمەس, جەكەلەگەن ازاماتتاردىڭ اتسالىسىپ جاتقانىنا ءبىز العىس بىلدىرەمىز. ەرىكتىلەر ينستيتۋتىمەن دە بەلسەندى جۇمىس ىستەيمىز. ولار مينيسترلىككە جەرگىلىكتى جەرلەردەگى پروبلەمالاردى جەتكىزىپ وتىرادى", دەپ اتاپ ءوتتى ماعزۇم مىرزاعاليەۆ قابىلداۋ بارىسىندا.
قاراعاندى قالاسىنداعى "ەكو Plast kz" ەكولوگيالىق كومپانياسىنىڭ وكىلى ۆاديم اشەۋلەۆ قاتتى تۇرمىستىق قالدىقتاردى سۇرىپتاۋ بويىنشا اتقارىپ جاتقان اعارتۋ جۇمىستارى تۋرالى بايانداپ, ەكولوگيالىق مادەنيەتكە ۇلەس قوسۋعا دايىن ەكەندىگىن جەتكىزدى.
پاۆلودار وبلىسى اقسۋ اۋدانىنداعى بالىق شارۋاشىلىعى وكىلدەرى جەرگىلىكتى اتقارۋشى ورگاندار تاراپىنان كەلتىرىلەتىن كەدەرگىلەردى ايتىپ, شاعىم ءبىلدىردى. سونىمەن بىرگە سالاداعى مامان جەتىسپەۋشىلىگى مەن بالىق ونىمدەرىن وتكىزۋ پروبلەمالارى بويىنشا كومەك سۇرادى. ءوز كەزەگىندە ماعزۇم مىرزاعاليەۆ بالىق شارۋاشىلىعى بويىنشا وڭىرلىك باعدارلاما دايىندالىپ جاتقانىن, جەلتوقسان ايىندا ەلدىك باعدارلاما دايىن بولاتىنىن ايتتى.
باتىس قازاقستان وبلىسىنىڭ تۇرعىنى الەكسەي سۆەچنيكوۆتىڭ وڭىردەگى ەكولوگيالىق احۋال بويىنشا شاعىمىن تىڭداعان مينيستر الداعى ۋاقىتتا رەسەي فەدەراتسياسىنىڭ ءتيىستى ۆەدومستۆولارىمەن بىرلەسكەن شارالار قابىلداناتىنىن حابارلادى.
"وكىنىشكە قاراي باتىس قازاقستان وبلىسىندا ەكولوگيالىق جانە سۋ رەسۋرستارى پروبلەمالارى قازىر وتە وزەكتى. ونىمەن ءبىز تۇراقتى تۇردە اينالىسىپ كەلەمىز. جايىق وزەنىنىڭ پروبلەماسى بويىنشا كەشە رف تابيعي رەسۋرستار ءمينيسترى الەكساندر كوزلوۆپەن سويلەستىم. ەكەۋمىز وسى ماسەلەنى تالقىلاۋ ءۇشىن كەزدەسۋگە كەلىستىك", دەدى ماعزۇم مىرزاعاليەۆ.