«اۋىل» حالىقتىق-دەموكراتيالىق پاتريوتتىق پارتياسى ورتالىق كوممۋنيكاتسيالار قىزمەتىندە «ەل اماناتى» جالپىۇلتتىق ساۋالداماسىنىڭ قورىتىندىسىن جاريالادى. «اۋىل» پارتياسىنىڭ مۇشەلەرى وتكىزگەن ءباسپاسوز ءماسليحاتىندا ساۋالداماعا رەسپۋبليكا بويىنشا 212 658 قازاقستاندىقتىڭ قاتىسقانى ايتىلدى. پارتيا توراعاسىنىڭ ورىنباسارى تولەۋتاي راقىمبەكوۆ حالىق ەڭ وزەكتى دەپ كورسەتكەن ماسەلەلەرگە توقتالدى.
«پارتيالىق اكتيۆ ساۋالداما نەگىزىندە 14 پروبلەمانى ايقىنداپ الدى. ولاردىڭ ىشىندە جەتەۋىن ساۋالداماعا قاتىسۋشىلار 100 پايىز ەڭ وزەكتى ماسەلە رەتىندە كوتەرىپ وتىر. ولار: شەتەل ازاماتتارىنا جەردىڭ جالعا بەرىلۋىنە جانە ساتىلۋىنا تىيىم سالۋ, جاڭا الەۋمەتتىك ساياساتتى قۇرۋ, ءار بالاعا جاردەماقى بەرۋ, اۋىلدى ەلدى مەكەندەردە وڭتايلاندىرۋ جىلدارىندا جابىلىپ قالعان مەديتسينالىق مەكەمەلەردىڭ جۇمىسىن جانداندىرۋ, بۇكىل اۋىلدى, ونىڭ ىشىندەگى شالعايداعى اۋىلداردىڭ بارلىعىن ينتەرنەتپەن قامتاماسىز ەتۋ, شاعىن جانە ورتا بيزنەس وكىلدەرى مەن فەرمەرلەرگە 2-4 پايىزبەن نەسيە بەرۋ, سونىمەن قاتار ولاردىڭ كوممۋنالدىق شىعىندارىن سۋبسيديالاۋ, اتاجۇرتقا ورالاتىن قانداستاردىڭ قازاقستان رەسپۋبليكاسىنىڭ ازاماتتىعىن الۋىن جەڭىلدەتۋ, ءتيىمسىز باعدارلامالارعا ميللياردتاپ قاراجات جۇمساۋدى توقتاتۋ», دەدى ت. راقىمبەكوۆ.
ساۋالداماعا قاتىسقاندار 14 سۇراقتان باسقا, وزدەرىن الاڭداتىپ جۇرگەن پروبلەمالاردى دا كورسەتكەن. سونىڭ ىشىندە 17 854 بيۋللەتەندە قوسىمشا ماسەلەلەر كورسەتىلگەن. مىسالى, 1000-نان استام ادام ساۋالداماداعى 10 پروبلەمالىق ماسەلەنى بەلگىلەگەن. ونىڭ ىشىندە اۋىز سۋ, گازبەن جابدىقتاۋ, ينتەرنەت بويىنشا 3 671 ۇسىنىس كەلىپ ءتۇستى. 2 787 ادام اۋىل شارۋاشىلىعى وندىرۋشىلەرىن مەملەكەتتىك قولداۋدى جەتىلدىرۋ, نەسيەلەر مەن سۋبسيديالاردىڭ قولجەتىمدىلىگى, كووپەراتسيا نەگىزىندە ءادىل باعالار بويىنشا اۋىل شارۋاشىلىعى ونىمدەرىن ساتىپ الۋ جانە وتكىزۋ جۇيەسىن قۇرۋدى قولداعان. ەل تۇرعىندارى ازىق-ت ۇلىك قاۋىپسىزدىگىن قامتاماسىز ەتۋ, باعانىڭ وسۋىنە جانە قۇرامىندا گمو بار ونىمدەردى ساتۋعا جول بەرمەۋ ماسەلەسىن دە وزەكتى دەپ تاپقان. سونداي-اق 2 758 رەسپوندەنت يپوتەكانى تولەۋگە مۇمكىندىك بولماعان جاعدايدا تۇرعىن ءۇيدى كەيىن ساتىپ الۋ مۇمكىندىگىن قاراستىرا وتىرىپ, جالعا بەرىلەتىن تۇرعىن ءۇي ساناتىنا اۋىستىرۋ تۋرالى ۇسىنىس جاساعان. 2 448 رەسپوندەنت جاستار ءۇشىن جۇمىس ورىندارىن اشۋدى, ونىڭ ىشىندە زەينەتكەرلىك جاستى تومەندەتۋ ارقىلى ونى كوبەيتۋدى ۇسىندى. پاندەمياعا بايلانىستى قىزمەتىن ءىشىنارا نەمەسە تولىق توقتاتقان كاسىپكەرلەرگە 2 جىلعا دەيىن نەسيەلىك دەمالىس بەرۋ تۋرالى 2 141 ۇسىنىس كەلىپ تۇسكەن. ودان بولەك 1 793 ادام تۇرعىن ءۇي الۋ, شارۋاشىلىق جۇرگىزۋ جانە كاسىپكەرلىك قىزمەت ءۇشىن كرەديتتەر بەرە وتىرىپ, جۇمىس كۇشى ارتىلعان وڭتۇستىك وڭىرلەردەن جۇمىس كۇشى تاپشى سولتۇستىك وڭىرلەرگە ىشكى كوشى-قوندى ىنتالاندىرۋ تۋرالى ايتقان. ستۋدەنتتەر ءۇشىن اۆتوبۋستاردا, پويىزداردا جانە ۇشاقتاردا ءجۇرۋ تاريفتەرىن 30 پايىزدان باستاپ 50%-عا دەيىنگى جەڭىلدىكتى قالپىنا كەلتىرۋ تۋرالى ۇسىنىستى 2 مىڭعا جۋىق ادام قولدادى. ال سپورت الاڭدارى مەن ستاديوندار سالۋ, ءار اۋىلدا دەنساۋلىق ساقتاۋ جانە مادەنيەت مەكەمەلەرىن قالپىنا كەلتىرۋ بويىنشا 1 174 ۇسىنىس كەلگەن. ەڭ وزەكتى ماسەلەلەردىڭ وندىعىن سۋارمالى جانە جايىلىمدىق جەرلەردى قالپىنا كەلتىرۋ جانە ءتيىمدى پايدالانۋ قورىتىندىلادى.
پارتيا وكىلدەرى ساۋالداما ناتيجەسىندە انىقتالعان ماسەلەلەر مەن ۇسىنىستار پارتيا باعدارلاماسىنا ەنەتىنىنە سەندىردى.