16 قاراشادان بەرى سقو پوليتسەيلەرى «مال ۇرىسى» جەدەل-پروفيلاكتيكالىق ءىس-شاراسى رەجىمىندە جۇمىس جاساۋدا. مال ۇرلىعىنا جول بەرمەۋ, بۇرىن جاسالعان قىلمىستاردى اشۋ بويىنشا جۇمىس كۇشەيتىلدى.
كريمينالدىق پوليتسيا باسقارماسىنىڭ جانە اقجار اۋدانى پب جەدەل ۋاكىلدەرى بۇرىن جاسالعان مال ۇرلىعىنىڭ ءتورت ەپيزودىن اشتى. ۇرلىق اۋداندىق جشس-ءدىڭ بىرىندە جاسالعان. ونىڭ يەسى 5 قويىنىڭ ۇرلانعانىن ايتىپ, 30 قاراشا كۇنى پوليتسياعا جۇگىنگەن. پوليتسەيلەر ەكى كۇدىكتىنى انىقتادى. ولاردىڭ بىرەۋى وسى جشس-تە بۇرىن باقتاشى بولىپ جۇمىس ىستەگەن, مال قاشاسىنا بىلدىرمەي كىرىپ-شىعۋ جولدارىن بىلگەن. كەيىن ۇرلىقتىڭ بىرنەشە رەت جاسالعانى بەلگىلى بولدى. جالپى سوماسى 680 مىڭ تەڭگە بولاتىن 17 قوي ۇرلانعان. قازىرگى ۋاقىتتا كۇدىكتىلەر تەرگەۋ يزولياتورىندا قاماۋدا, قىلمىستىق كودەكستىڭ «مال ۇرلىعى» بابى بويىنشا سوتقا دەيىنگى تەرگەۋ جۇرگىزىلىۋدە.
«كۇدىكتىلەردىڭ ايتۋىنا قاراعاندا ولار قوي ەتىن تاكسيمەن كوكشەتاۋعا اپارىپ تاپسىرىپ وتىرعان, - دەپ ءتۇسىندىردى سقو پد كپب باستىعى, پوليتسيا پولكوۆنيگى پەتر كليموۆ.
وپەراتسيانىڭ العاشقى كۇنى بۇرىن جاسالعان ءتورت ۇرلىقتىڭ بەتى اشىلدى. 15 ادام ەسەپكە قويىلدى, ونىڭ ۇشەۋى - «مال ۇرلاۋشى», جەتەۋى - «قاساپشى», بەسەۋى - «ۇرلانعان مالدىڭ ەتىن ساتىپ الۋشى» ساناتتارى بويىنشا جازالانادى. سونىمەن قاتار 62 اۆتوماشينا, ەت ونىمدەرىن ساۋدالايتىن 34 ورىن تەكسەرىلدى.
سولتۇستىك قازاقستان وبلىسى