سقو پوليتسەيلەرى ءۇيدىڭ تەرەزەسىن بۇزىپ ءتۇسىپ, ءبىر ملن تەڭگەنىڭ زاتىن جىمقىرعان ۇرلىقتى اشتى. وقيعا قاراشانىڭ 6-سى كۇنى ع.مۇسىرەپوۆ اۋدانىندا بولعان. ءۇي يەسىنىڭ جوق ەكەنىن پايدالانعان ۇرى پلاستيكالىق تەرەزەنى مايىستىرىپ, ىشكە ەنىپ, التىن بۇيىمدارى مەن قۇندىز توندى ۇرلاپ كەتكەن. كەلتىرىلگەن شىعىن سوماسى 1 ملن تەڭگەدەن اسادى, - دەپ حابارلايدى Egemen.kz
جەدەل-ىزدەستىرۋ ءىس-شارالارىنىڭ ناتيجەسىندە بەينەباقىلاۋ كامەرالارىنداعى جازبالار زەردەلەنىپ, كۇدىكتىنى انىقتاۋعا سەپتىگىن تيگىزدى. ول بۇرىن سوتتى بولعان 1990 جىلعى اۋدان تۇرعىنى بولىپ شىقتى. الدىندا ول ءۇي يەسىنىڭ جوندەۋ جۇمىستارىنا جالداعان جۇمىسشىلارىنىڭ ءبىرى بولعان ەكەن.
اتالعان فاكتى بويىنشا قىلمىستىق كودەكسىنىڭ 188-بابىمەن ءىس قوزعالىپ, سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. كۇدىكتى ۇرلاعان زاتتاردى يەسىنە قايتاردى, وعان كەلۋ تۋرالى مىندەتتەمە تۇرىندەگى ماجبۇرلەۋ شاراسى قابىلداندى. «بەينەباقىلاۋ كامەرالارى — بوتەننىڭ مۇلكىن ۇرلاۋدى ەسكەرتۋدەگى جانە اشۋداعى ءتيىمدى قۇرال», - دەيدى ع. مۇسىرەپوۆ اۋدانى پب باستىعىنىڭ ورىنباسارى, پوليتسيا مايورى اسحات احمەتبەكوۆ.
سولتۇستىك قازاقستان وبلىسى