ءبىزدىڭ ەلىمىزدە ادامداردىڭ ەڭبەگىن قورعايتىن, ەڭبەك تۋرالى زاڭنامالاردىڭ بۇزىلماۋىن باقىلايتىن, ەڭبەكاقىنىڭ ۋاقتىلى تولەنۋىن تالاپ ەتە الاتىن, ۇجىمدىق كەلىسىمشارتتاردىڭ قاراپايىم ەڭبەك ادامىنىڭ مۇددەسىن قولداۋىنا مونيتورينگ جاسايتىن, كاسىبي ناۋقاستار مەن وندىرىستىك جاراقاتتار بويىنشا ساراپتار جاساپ, كىمنىڭ كىنالى ەكەنىن انىقتايتىن جانە ەڭبەك ادامىن قولدايتىن قوعامدىق نەگىزدەگى كاسىپوداقتارمەن قاتار ارنايى مەملەكەتتىك قىزمەت تە بار. ونىڭ رەسمي اتاۋى مەملەكەتتىك ەڭبەك ينسپەكتسياسى.
بيىلعى قازان ايىنا دەيىن سولتۇستىك قازاقستان وبلىسىندا وسى قىزمەتتىڭ باسشىسى بولىپ قايرات پىشەنباەۆ دەگەن بىلىكتى ازامات جۇمىس ىستەگەن ەدى. ول ءۋاليحانوۆ اۋدانىنىڭ اكىمى بولىپ اۋىسقان سوڭ قازىر ونىڭ ورنىنا مارات وماروۆ تاعايىندالدى.
مىنە, وسى قىزمەت جىل باسىنان بەرى ەڭبەك زاڭناماسىنىڭ ساقتالۋى بويىنشا 187 تەكسەرىس جۇرگىزىپ, 584 بۇزۋشىلىق انىقتاعان ەكەن. سونىڭ ىشىندە 142 ملن تەڭگە ەڭبەكاقىنىڭ ۋاقتىلى تولەنبەگەنىن انىقتاعان.
وسى بۇزۋشىلىقتار ءۇشىن 43 لاۋازىمدى تۇلعا اكىمشىلىك جاۋاپكەرشىلىككە تارتىلعان. ال ولارعا سالىنعان ايىپپۇلدىڭ كولەمى 8 ملن. تەڭگەدەي بولعان. ەڭبەك قاۋىپسىزدىگى مەن ەڭبەك ادامىن قورعاۋ بويىنشا جۇرگىزىلگەن 87 تەكسەرىس ەڭبەكتى قورعاۋ بويىنشا 123, ەڭبەكقاۋىپسىزدىگى بويىنشا 52 بۇزۋشىلىق تاپقان. جىل باسىنان بەرى وبلىس كاسىپورىندارىندا 32 باقىتسىز جاعدايلار بولعان. سولاردىڭ كەسىرىنەن 35 ادام جاپا شەككەن. سونىڭ التاۋى قازا تاپقان.
مۇنداي جاعدايلار اۋىلشارۋاشىلىعى كاسىپورىندارىندا كوبىرەك كەزدەسەدى. ماسەلەن, بيىلعى كۇزدە تايىنشا اۋدانىنداعى «استىق ستەم» جشس تراكتورشىسى سۇرلەم باسىپ جۇرگەندە «كيروۆەتس» تراكتورىن اۋدارىپ العان. مەحانيزاتوردىڭ ءوزى جانشىلعان كابينانىڭ ىشىندە قالىپ, العان جاراقاتتان سول جەردە كوز جۇمعان.
وسى وقيعا بويىنشا مەملەكەتتىك ەڭبەك ينسپەكتسياسى مۇقيات تەكسەرىس جۇرگىزىپ, ايىپتى مەحانيزاتوردىڭ ءوزى مەن جۇمىس بەرۋشى ەكەنىن انىقتادى. مارقۇمنىڭ كامەلەتكە تولماعان 4 بالاسىنا ساقتاندىرۋ كومپانياسىنان وتەماقى تولەنەدى. بۇدان باسقا دا بارلىق جاعدايلار ەڭبەك زاڭنامالارىنا سايكەس تەكسەرىلگەن. وسىعان بايلانىستى 66 جۇمىس بەرۋشىگە مىندەتتى تۇردە ورىندالۋعا ءتيىستى نۇسقامالار بەرىلگەن.
وندىرىستىك اپاتتار مەن جاراقاتتاردىڭ الدىن الۋ ءۇشىن مەملەكەتتىك ينسپەكتسيا اپتا سايىن ەڭبەك ءتارتىبىن ساقتاۋ جونىندە وبلىس كاسىپورىندارى وكىلدەرىنىڭ قاتىسۋىمەن سەمينار-كەڭەستەر وتكىزىپ تۇرادى.
جۋىردا وسى ەڭبەك ينسپەكتسياسى قىزمەتى باستىعىنىڭ ورىنباسارى م.ساباعاتوۆ ەڭبەكاقى تولەۋ بويىنشا زاڭنامالاردىڭ ساقتالۋىنا جاسالعان مونيتورينگتىڭ ناتيجەلەرى تۋرالى ايتىپ بەردى. تەكسەرىس 17 كاسىپورىندا جۇرگىزىلگەن. وسىلاردا جۇمىس ىستەيتىن 1852 ادامعا كاسىپورىندار 200 ملن. تەڭگەدەن ارتىق ەڭبەكاقى بەرەشەك بولعان. وسىعان بايلانىستى جۇمىس بەرۋشىلەرگە ورىندالۋى مىندەتتى نۇسقامالار بەرىلگەن. سونىمەن بىرگە ولارعا 3,1 ملن. تەڭگەنىڭ ايىپپ ۇلى سالىنعان.
ەڭبەك ينسپەكتسياسىنا ءتۇسىپ جاتاتىن ارىز-شاعىمدار دا كوپ. وسى جىلدىڭ 9 ايىندا عانا ولاردىڭ سانى 646 بولعان. سونىڭ 90 پايىزى ەڭبەك قاتىناستارىنا بايلانىستى شاعىمدار. ەڭبەك قاۋىپسىزدىگى تۋرالى جاسالاتىن ارىزدار از عانا.
وبلىستا جامان ىندەتكە بايلانىستى شەكتەۋ شارالارى ەنگىزىلگەننەن بەرى ارىز-شاعىمدار ونلاين- رەجىمدە نەمەسە ەلەكتروندىق نۇسقا تۇرىندە قابىلداناتىن بولدى. شاعىمنىڭ ۇلگىلەرى ينسپەكتسيانىڭ رەسمي سايتىندا كورسەتىلگەن.
سولتۇستىك قازاقستان وبلىسى