سولتۇستىك قازاقستان وبلىسىنىڭ قىزىلجار اۋدانىنداعى پەتەرفەلد اۋىلىندا كەڭەس وداعى جىلدارىندا نەمىس تۇرعىندار وتە كوپ بولىپ ەدى. ءبارى دە ەڭبەكقور ءارى مادەنيەتتى حالىق اۋىل كوشەلەرى مەن ۇيلەرىن قىزدىڭ جيناعان جۇگىندەي قۇلپىرتىپ قوياتىن.
كسرو تەمىر شىمىلدىعىن اشقان ساتتەن باستاپ نەمىستەر وزدەرىنىڭ تاريحي وتانىنا ورالدى. ولاردىڭ ورنىنا ينفراقۇرىلىمى جاقسى اۋىلعا جاپپاي قازاقتار قونىستانا باستادى. قازىر «پەتروپاۆل – مامليۋت» تراسساسىنىڭ بويىنداعى جارقىراعان جاقسى اۋىلدىڭ نەگىزگى تۇرعىندارى قازاقتار.
وسىنداعى ەكى قاباتتى مەكتەپ ءۇيى 1969 جىلى سالىنعان ەكەن. كۇتىممەن عانا تۇرعان عيماراتتىڭ 80 پايىزى ءبارىبىر توزعان. مىنە, وسى مەكتەپتى بيىل جەرگىلىكتى بيلىك مەملەكەت-جەكەمەنشىك ارىپتەستىگى شەڭبەرىندە جەرگىلىكتى كاسىپكەرگە سەنىمدى باسقارۋعا بەرگەن. ول مەكتەپتى جاڭعىرتۋعا بيىل جاز بويى 300 ملن تەڭگەدەي قاراجات قۇيىپ, قازىر ونى ادام تانىماستاي وزگەرتتى. مەكتەپتىڭ ءىشىن عانا ەمەس الدىن دا, سپورتتىق الاڭدارىن دا جايناتىپ, قاجەتتى جابدىقتارمەن جاراقتادى.
باسقارۋعا العان كاسىپكەر مەكتەپتى جوندەپ قانا قويماي, ونىڭ ءىشىن زاماناۋي جيھازدار مەن قۇرال-جابدىقتارعا دا تولتىرعان. سونىمەن قاتار قاجەتتى كومپيۋتەرلەر مەن ينتەراكتيۆتى تاقتالار دا بارلىق سىنىپ بولمەلەرىنە قويىلعان. مەكتەپ ديرەكتورى باۋىرجان تولەنوۆتىڭ ايتۋىنا قاراعاندا, جالتىراعان جيھازدار بالالاردىڭ ەستەتيكالىق قۇشتارلىعىن عانا ارتتىرماي, وقۋعا دەگەن بەلسەندىلىگىن دە ارتتىرۋدا ەكەن. مۇندايدا مۇعالىمدەر بىلىكتىلىگىن دە ارتتىرۋ الدا تۇرعان ماقساتتاردىڭ ءبىرى ەكەندىگى ايتىلدى. وسى ماقساتپەن مەكتەپ پەتروپاۆلداعى نازارباەۆ زياتكەرلىك مەكتەبىمەن ىنتىماقتاستىق ورناتىپتى. ونىڭ ماماندارى وسى مەكتەپكە كەلىپ, مۇعالىمدەردىڭ ءىت-تەحنولوگيا, شەت تىلدەرى بويىنشا بىلىكتىلىگىن ارتتىرۋعا كومەكتەسەدى.
مەكتەپتىڭ الداعى جوسپارلارىنىڭ قاتارىندا جاقىن اۋىلداردان كەلىپ وقيتىن بالالارعا ارناپ ينتەرنات ءۇيىن تۇرعىزۋ تۇر. ويتكەنى قازىر ىدىراپ جاتقان كەيبىر اۋىلداردىڭ مەكتەپتەرى كۇتۋسىز قالعان, ونداعى وقۋشىلاردىڭ اتا-انالارى بالالارىن پەتەرفەلد مەكتەبىنە بەرۋگە قۇشتار ەكەن. ء«بىز كورشى اۋىلداردىڭ بالالارىن قابىلداۋعا دايىنبىز. تەك ينتەرنات ءۇيىن سالدىرىپ الساق بولدى», دەيدى ديرەكتور. ايتا كەتەرلىگى, بۇل مەكتەپتە وقۋشىلارعا ءبىر مەزگىلدىك ىستىق تاماق تا تەگىن بەرىلەدى.
وبلىس اكىمى قۇمار اقساقالوۆتىڭ ايتۋىنا قاراعاندا, مەكتەپتەردى وسىلاي سەنىمدى باسقارۋعا العىسى كەلەتىن كاسىپكەرلەر وبلىستا بارشىلىق ەكەن. سونىڭ ءبىرى «رادۋگا» كومپانياسىنىڭ باس ديرەكتورى دميتري شاراپاەۆ. ول ءوزى وقىعان بەسكول سەلوسىنىڭ مەكتەبىن سەنىمدى باسقارۋعا الۋعا نيەت بىلدىرگەن. ءبىلىم بەرۋ سالاسىندا وسىنداي ىنتىماقتاستىقتىڭ بولاشاعى زور بولاتىن سياقتى.
سولتۇستىك قازاقستان وبلىسى