سقو پوليتسەيلەرى كامەلەتكە تولماعاندار تاراپىنان جانە ولارعا قاتىستى قۇقىق بۇزۋشىلىقتىڭ الدىن الۋ جۇمىستارىن كانيكۋل كەزىندە جانداندىرا ءتۇستى, دەپ حابارلايدى Egemen.kz.
جاستار كوپ جينالۋى مۇمكىن دەگەن ورىنداردا رەيد جۇرگىزىلۋدە. جالعا بەرىلەتىن پاتەرلەر مەن كوتتەدجدەر ەرەكشە نازاردا بولدى. پوليتسەيلەرمەن بىرگە پەتروپاۆل قالاسى پروكۋراتۋراسىنىڭ, ءبىلىم بەرۋ ۇيىمدارىنىڭ, ونىڭ ىشىندە قورعانشىلىق جانە قامقورشىلىق ورگاندارىنىڭ وكىلدەرى, كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ حاتشىسى قويان-قولتىق جۇمىس جاسادى. اتالعان جۇمىس "دەمالىس" جەدەل-پروفيلاكتيكالىق ءىس-شاراسى اياسىندا 11 قاراشادان باستاپ كۇشەيتىلدى. ءجپىش العاشقى كۇنى 17 وتباسى تەكسەرىلىپ, 4 اكىمشىلىك حاتتاما تولتىرىلدى.
رەيد كەزىندە سەگىزىنشى جانە التىنشى سىنىپتىڭ ەكى وقۋشىسىنىڭ الكوگولدىك ىشىمدىك ءىشۋ ارەكەتى انىقتالدى. جاسوسپىرىمدەرمەن جانە ولاردىڭ اتا-انالارىمەن پروفيلاكتيكالىق اڭگىمە جۇرگىزىلدى. كەيبىر اتا-انالاردىڭ جاۋاپكەرسىزدىگى قاۋىپتىلىكتىڭ تاعى ءبىر فاكتورى بولىپ تابىلادى. 11 قاراشادا كامەلەتكە تولماعانداردىڭ ىستەرى جونىندەگى كوميسسيا 35 جاستاعى ايەل مەن 29 جاستاعى بىرگە تۇراتىن ادامىنا قاتىستى يۋۆەنالدىق پوليتسيا جيناعان ماتەريالدى قاراستىردى. 5 ايلىق بالاسى بولا تۇرا ەكەۋى دە جۇمىس ىستەمەيدى, ىشىمدىكتى اسىرا پايدالانادى. ەر ادام تۋىسىنىڭ ۇيىندە تۇرعاندا ماساڭ كۇيدە جانجال شىعارعانى ءۇشىن ۇيدەن قۋىلعان. قولىندا بالاسى بار ولار قاراۋسىز قالعان اۆتوكولىكتىڭ سالونىندا تۇنەپ شىققان. كوميسسيا بوبەكتىڭ تاعدىرىن شەشتى: ول سابيلەر ۇيىنە جىبەرىلدى. اتا-انالار ىشىمدىكتەن باس تارتۋعا, جۇمىسقا ورنالاسىپ, تۇرعىن ءۇي ماسەلەسىن شەشۋگە ۋادە بەردى. ۋادەلەرىن ورىنداماعان جاعدايدا اتا-انا قۇقىعىنان ايىرۋ ماسەلەسى قارالاتىن بولادى. وسىنداي جاعدايلاردى بولدىرماۋعا باعىتتالعان تۇرمىسى تومەن وتباسىلاردى تەكسەرۋ جۇرگىزىلدى.