جاڭاوزەندە جاڭا اۋىل قۇرىلادى

– بۇگىنگى كۇنى راحات اۋىلى حالقىنىڭ سانى – 45 848 ادامدى قۇرايدى. حالىق سانى جىل باسىمەن سالىستىرعاندا 2 555 ادامعا ءوسىپ وتىر. تولىعىراق توقتالار بولساق, بۇل ەلدى مەكەننىڭ حالقى 2017 جىلى – 32 111 ادامعا, 2018 جىلى – 38 267 ادامعا, 2019 جىلى – 43 293 ادامعا جەتتى. اۋىلدىڭ جالپى كولەمى – 4 605,2 گەكتار. وسى اۋىلداعى «اقسۋ», «مەرەي», «راحات» شاعىن اۋداندارى راحات اۋى­لىنىڭ قۇرامىندا قالىپ, «جۇلدىز» شاعىن اۋدانى جاڭادان قۇرىلاتىن كەندىرلى اۋىلىنىڭ قۇرامىنا كىرەدى, – دەدى جاڭاوزەن قالاسى اكىمىنىڭ ورىنباسارى نۇربەرگەن حۋديباەۆ.

راحات اۋىلىن ەكىگە بولۋگە مامان­داردىڭ جەتىسپەۋشىلىگى, حالىق سانى­نىڭ كۇرت ءوسۋى, كوممۋنالدىق قىزمەتتەر­­دىڭ ۋاقتىلى كورسەتىلمەۋى سەبەپ. ماسەلەن, 40 مىڭنان اساتىن ەلدى مەكەندە 18-20 مەملەكەتتىك قىزمەتكەر بولۋى ءتيىس. ال اۋىلدا مامان جەتىسپەۋشىلىگى انىق باي­قالادى.

– راحات اۋىلى بولىنگەن جاعدايدا بيۋدجەت شىعىندارىنىڭ كولەمى 771,2 ملن تەڭگەدەن 898,2 ملن تەڭگەگە دەيىن ۇلعايادى. ۇسىنىلعان بيۋدجەت شى­عىن­دارى كولەمىنىڭ ۇلعايعانى مەكتەپكە دەيىنگى ءبىلىم بەرۋ, تازالىق قىزمەتى, كوشە جارىعىنا قىزمەت كورسەتۋ مەن اۋىلدى اباتتاندىرۋ جۇمىستارى­نىڭ اۋقىمىنا بايلانىستى بولادى, – دەدى راحات اۋىلىنىڭ اكىمى وسەرباي تابىنشاەۆ.

كەلەشەكتە كەندىرلى اۋىلىندا دەن­ساۋلىق, ءبىلىم بەرۋ, سپورت, مادەنيەت, اۆتوموبيل جولدارى, ينجەنەرلىك-ينفراقۇرىلىم, مەملەكەتتىك قىزمەت كورسەتۋ, تۇرعىن ءۇي-كوممۋنالدىق شارۋا­شىلىعى مەن كاسىپكەرلىكتى دامىتۋ سالاسى دامىپ, جاڭا نىساندار بوي كوتەرەدى دەپ جوسپارلانعان.

سونداي-اق جاڭاوزەن قالاسىندا حا­لىق سانىنىڭ ارتۋى, بىرنەشە جىل داۋعا سەبەپ بولعان ەسكى ۇيلەر تۇرعىندارى­نىڭ جانايقايى, جۇمىسسىزدىق ماسەلە­سى كەيبىر وتباسىلاردى ءوز ەرىكتەرىمەن اق­تاۋ قالاسىنا كوشىرۋگە سەبەپ بولعان ەدى. جاڭاوزەن قالاسىنىڭ اكىمى ماقسات يباعاروۆتىڭ ايتۋىنشا, بيىل ءبىر اي ىشىندە – قىركۇيەكتىڭ 3-ءى مەن قازاننىڭ 3-ءى ارالىعىندا قۇجاتتار قابىلدانىپ, 600 تۇرعىن ءوتىنىش بەرگەن.

– جەرگىلىكتى مۇناي كومپانياسى مەن اكىمدىك تاراپىنان كەلىسىمشارت جا­ساقتالدى. بۇگىنگى كۇنى قول قويعان قۇ­جات دايىن. ەندى مەموراندۋم بويىنشا كوميسسيا وكىلدەرى 600 تۇرعىننىڭ ءوتىنىشىن قاراپ, 150 ادام ىرىكتەلەدى. كەلەسى جىلى دا 150 پاتەر بەرۋ جوسپارلانۋدا. ايتا كەتسەك, جالدامالى تۇرعىن ءۇي الەۋمەتتىك وسال توپتىڭ مۇشەلەرىنە, كوپبالالى جالعىزباستى انالارعا, ۇوس ارداگەرلەرىنە بەرىلەدى. وتكەن جىلى ءدال وسىنداي جالدامالى تۇرعىن ۇيگە 3,9 ملرد تەڭگە ءبولىنىپ, 394 جاڭاوزەندىك وتباسى باسپانالى بولدى, – دەگەن بولاتىن جاڭاوزەن قالاسىنىڭ اكىمى.

الەۋمەتتىك ماسەلە ەرتە مە, كەش پە شە­شىمىن تابادى, ەڭ باستى قۋانىش – «ەلگە ەل قوسىلسا – قۇت» دەگەندەي, اعا­يىن قاتارىنىڭ قالىڭداپ, قالاعا سىيماي جاتقانى بولىپ تۇر.

ماڭعىستاۋ وبلىسى