كوروناۆيرۋس ىندەتى ەلىمىزدە العاش كۇشەيە باستاعاندا ءدارى-دارمەك تاپشىلىعى قاتتى سەزىلدى. ال قازىر ىندەتتىڭ ىقتيمال ەكىنشى تولقىنىنىڭ قاۋپى ءتونىپ تۇرعان شاقتا وسىنداي قاتەلىكتەرگە قايتادان ۇرىنباس ءۇشىن وڭىرلەردە تۇراقتاندىرۋ قورلارى ۇيىمداستىرىلدى. سونىڭ اياسىندا سۇرانىسقا يە دارىلىك پرەپاراتتاردى ساتىپ الۋ ءۇشىن كوتەرمە ديستريبيۋتورلارعا قايتارىمدى نەگىزدە قاراجات ءبولىندى.
ورتالىق كوممۋنيكاتسيالار قىزمەتى الاڭىندا دەنساۋلىق ساقتاۋ مينيسترلىگى سانيتارلىق-ەپيدەميالىق باقىلاۋ كوميتەتى توراعاسىنىڭ ورىنباسارى نۇرلىبەك اسىلبەكوۆ ءدارى-دارمەكپەن قامتاماسىز ەتۋ شارالارى جونىندە كەڭىنەن مالىمدەدى. ونىڭ ايتۋىنشا, اتالعان ماقساتقا وڭىرلەرگە 17,9 ملرد تەڭگە ءبولىندى.
«قازىرگى كەزدە ءدارىحانالاردا حالىقتىڭ دارىلىك زاتتارعا قاجەتتىلىگىن قامتاماسىز ەتۋ ءۇشىن دارىلىك زاتتار جەتكىلىكتى. مونيتورينگتىك توپتار 1 640-تان اسا ءدارىحانانى تەكسەرىپ, شەكتى باعادان اسىرىلىپ, ساتىلعان دارىلىك زاتتاردىڭ 199 اتاۋىن انىقتاعان. اتالعان كەزەڭدە 174 ملن تەڭگە سوماسىندا شەكتى باعانىڭ ارتۋىنىڭ 876 فاكتىسى, 39,4 ملن تەڭگە سوماسىندا دارىلىك زاتتاردى زاڭسىز وتكىزۋدىڭ 347 فاكتىسى انىقتالدى. سونداي-اق 1 223 اكىمشىلىك حاتتاما تولتىرىلىپ, 213 ملن-نان اسا ايىپپۇل سالىندى. زاڭسىز اينالىمنان 10 ملن-نان اسا دارلىك زات الىندى, دەدى ن.اسىلبەكوۆ.
سونىمەن قاتار ۆەدومستۆوارالىق كوميسسيانىڭ تاپسىرماسىمەن ىندەتتىڭ جاڭا تولقىنىنا دايىندىق ماقساتىندا بىرىڭعاي ديستريبيۋتور بىرقاتار شارالار قابىلدادى. بۇل تۋرالى «سك – فارماتسيا» جشس باسقارما توراعاسى ەرحات ەسقاليەۆ جان-جاقتى مالىمەت بەردى.
«بىرىنشىدەن, بارلىق مەديتسينالىق ۇيىمداردا ايلىق قوردى قالىپتاستىرۋ قولعا الىندى. بۇگىندە بىرىڭعاي ديستريبيۋتور 20 ملرد تەڭگەدەن اسا سوماعا 91 دارىلىك زات كولەمىن جەتكىزدى. ول تەز قالپىنا كەلتىرىلىپ وتىرادى. ەكىنشىدەن, پنەۆمونيا مەن كۆي بار ناۋقاستاردى انتيبيوتيكتەرمەن جانە دەنە قىزۋىن تۇسىرەتىن ءدارى-دارمەكپەن تەگىن امبۋلاتورلىق قامتاماسىز ەتۋ ۇيىمداستىرىلدى. شامامەن 2 ملرد تەڭگە سوماسىنا 1 ملن-عا جۋىق ادامدى قامتۋ جوسپارلانعان. ۇشىنشىدەن, «قاۋىپسىزدىك جاستىعى» دەپ اتالاتىن ەكى ايلىق ءدارى-دارمەكتەر قورى قۇرىلدى. ستاتسيونارلاردا ايىنا 60 مىڭ پاتسيەنت بولادى دەگەن بولجاممەن كوروناۆيرۋس ينفەكتسياسىن ەمدەۋگە ارنالعان ءدارى-دارمەكتەردىڭ 44 اتاۋى ساتىپ الىنادى, – دەدى ە.ەسقاليەۆ.
ونىڭ ايتۋىنشا, ازىرگە 44 اتاۋدان ءدارى-دارمەكتىڭ 39 ءتۇرى ساتىپ الىندى. گۋمانيتارلىق كومەك شەڭبەرىندە قاجەتتى ءدارى-دارمەكتى جەتكىزۋ ماسەلەسى قوسىمشا پىسىقتالۋدا. تومەندەمەيتىن قور كولەمى بەكىتىلگەن كەستەگە سايكەس بىرىڭعاي ديستريبيۋتوردىڭ 4 حابىنا دارىلىك زاتتارعا پايىزدىق اراقاتىناستا قاجەتتىلىك فاكتىسى بويىنشا جەتكىزىلەدى. تومەندەمەيتىن قور دەنساۋلىق ساقتاۋ مينيسترلىگىنىڭ بولجامى نەگىزىندە مەديتسينالىق ۇيىمداردىڭ وتىنىمدەرىنەن تىس قالىپتاستىرىلعان جانە ناقتى وڭىردە ناقتى پوزيتسيالار بويىنشا اۋرۋدىڭ ءورشۋى جاعدايىندا پايدالانىلادى. پايدالانىلاتىن كولەم جەدەل تۇردە قوسىمشا ساتىپ الۋمەن تولىقتىرىلادى. وسى تسيكلدى تولىقتىرۋ ءۇشىن ەكى اي ۋاقىت جەتكىلىكتى.