بۇل كۇندە بىرقازان جەر بەتىنەن جويىلىپ بارا جاتقان قۇس رەتىندە «قىزىل كىتاپقا» ەنگىزىلگەن. ەلىمىزدە ەرتە زاماننان «كولدىڭ ەركەسى» اتانىپ كەتكەن بىرقازاننىڭ ەكى ءتۇرى مەكەن ەتەدى. ولار, اسىرەسە كاسپي, ارال تەڭىزدەرى مەن بالقاش كولىنىڭ ماڭىندا كەزدەسەدى. الايدا جۋىردا عانا جامبىل وبلىسىنىڭ اۋماعىنا دا بىرقازان قۇسىنىڭ كەلگەنى انىقتالدى.
جاقىندا جۋالى اۋداندىق پوليتسيا بولىمىنە ديحان اۋىلىنىڭ شەتىندەگى جىرادا دەنە تۇرقى ۇلكەن, ەرەكشە قۇستىڭ ۇشىپ كەتە الماي تۇرعانى جونىندە حابارلاما كەلىپ تۇسكەن. جەرگىلىكتى تۇرعىندار بىردەن مۇنىڭ كادىمگى قۇسقا ۇقسامايتىنىن بايقاعان. اتالعان جەرگە شۇعىل جەتكەن پوليتسيا قىزمەتكەرلەرى جىرا بويىنان وتە ءالسىز جانە وزدىگىنەن ۇشىپ كەتە المايتىن دارمەنسىز بىرقازاندى كورگەن. سونىمەن قاتار جۋالى اۋدانىنىڭ ورمان جانە جانۋارلار دۇنيەسىن قورعاۋ مەكەمەسىنەن ماماندار شاقىرىلعان. ناتيجەسىندە مۇنىڭ بىرقازان ەكەنى بەلگىلى بولعان. بۇل رەتتە پوليتسيا قىزمەتكەرلەرى سيرەك كەزدەسەتىن قۇستى قورعاپ, امان الىپ قالدى. قۇتقارىلعان بىرقازان جۋىق ارادا شىمكەنت قالاسىنداعى حايۋاناتتار باعىنا جىبەرىلەدى.
جالپى, بىرقازان قۇسىنىڭ قاسيەتى تۋرالى, سونىمەن قاتار وعان مۇحاممەد (عالەيھيسسالام) پايعامباردىڭ دا دۇعا ەتكەنى ادەبي دەرەكتەردە كوپ ايتىلادى. پايعامبار ءمادينا قالاسىنا كوشىپ بارىپ, ساحابالارىمەن بىرگە ءبىرىنشى مەشىتتى سالاتىن كەزدە سۋ تاپشىلىعى بولىپتى دەيدى. بىراق بىرقازان ءبىر ءسات تە دامىل تاپپاي, كولدەن سۋ تاسىپتى. سوندا قۇستىڭ ەڭبەگىنە ريزا بولعان پايعامبار «بىزگە كومەكتەسسەڭ, سەنى دە اللا جارىلقاسىن. ۇمبەتتەرىم قاي جەرگە قونىستانسا, سول جەردە كوبەيگىن», دەپ دۇعا ەتىپتى دەيدى. اڭىز بويىنشا بىرقازاننىڭ ادامدار ءومىر سۇرەتىن جەرلەردە, كولدەردە مەكەن ەتەتىنى سودان ەكەن دەسەدى...
جامبىل وبلىسى